VOV4.M’nông: Rmôt hăn kan mêt uănh bah Quốc hội gưl XV hŏ pah kan tâm 2 n’gor Lâm Đồng ndrel Gia Lai mpeh nau ƀư nau têm nkrem, njrăng mpŭng lir lvang năm 2016-2021. Tĭng nê, rmôt kan mêt uănh hŏ đă ăp nkuăl mbơh ăp nau tă dơi geh, ăp nau nkol, nkô̆ nau ndrel nau đă gay ma lŏ pah kan ƀư têm nkrem njrăng mpŭng lir tâm lam n’gor tâm rơh mhe.

            Tâm Lâm Đồng, rmôt kan mêt uănh bah Quốc hội yor Thượng tướng Trần Quang Phương, Uỷ viên Trung ương Đảng, Groi Kruanh Quốc hội leo bôk hŏ geh nar pah kan đah UBND n’gor Lâm Đồng mpeh nau ƀư têm nkrem, njrăng mpŭng lir 2016-2021.

            Mbơh tâm nar pah kan ân saơ, n’gor Lâm Đồng hŏ rgum mât ân nâp nau sŏk dŏng tơm prăk ngih dak, đăp mpăn sŏk tâm di, tŏng, rdâng nau roh rui, n’huch rnon soay. Têm nkrem tơm prăk, rgop nsum nau kan, ndâk nau têm nkrem gay ƀư ntơm bah nau ntop pă tơm prăk, ndâk nau kan têm nkrem ntơm bah bôk ndrel n’ăp tâm rnôk ƀư kan, ƀư rjăp nau nchrăp tơm prăk ngih dak geh HĐND n’gor ân ƀư. Tâm nau trok tâm ân geh ƀư ƀa ƀơ lvang năm 2016-2021, nkuăl hŏ têm nkrem tâm rnôk ndâk, năl, ân bư nau kan, trok dŏng, mât nau dŏng tơm prăk ngih dak geh rlau 3.380 rmen.

            Kruanh rmôt kan mêt uănh, Thượng tướng Trần Quang Phương-Groi Kruanh Quốc hội rƀŭn mbơh hŏ geh kơp dơn, rnê prêh mpeh nau kan nsôih bah n’gor mpeh nau kan têm nkrem, njrăng ,pŭng lir rlvang năm 2016-2021 bah Lâm Đồng, rne eprêh nau mbơh bah UBND, HĐND ndrel rmôt kan ntoh măt Quốc hội bah n’gor Lâm Đồng geh tŏng ăp. Groi Kruanh Quốc hội đă n’gor ân ƀư kloh nau kan têm nkrem njrăng mpŭng lir tâm n’gor tâm rơh tât. Đă uănh nau dơi tâm nau bư n’hele nau kan pháp luật mpeh nau têm nkrem, njrăng mpŭng lir. Kơp uănh nkô̆ nau ƀư têm nkrem njrăng mpŭng ma nau tơm lah nau sŏk tơm prăk, mât drăp ndơ bah ngih dạk, neh ntu nsum, ntŭk pah kan, drăp ndơ geh nsum ma neh, máy móc ndơ dŏng, mât neh ntu, ndơ dŏng, mât nau pah kan, dăp rgum ntrong kan, n’huch lơi biên chế gay ƀư ân sakư tam lơn...

            Tâm Gia Lai, rmôt kan mrô 2 tâm rmôt kan mêt uănh bah Quốc hội yor uỷ viên Rnâng kan rđau kan Trung ương Đảng, Kruanh Uỷ ban tơm prăk-Ngân sách bah Quốc hội Nguyễn Phú Cường ƀư kruanh rmôt hŏ geh nar pah kan đah UBND n’gor Gia Lai mpeh nau ƀư têm nkrem, njrăng mpŭng lir lvang năm 2016-2021. Tĭng nau mbơh, lvang năm 2016-2021, n’gor Gia Lai têm geh rlau 4.368 rmen. Tâm nê, ƀư nau têm nkrem dŏng geh 10% gay ma n’hao nau rgala prăk khay rlau 1.154 rmen...

            Tâm nar pah kan, ăp nŭih kan mêt uănh bah Quốc hội đă rđau kan UBND n’gor Gia Lai ndrel ăp ntŭk kan ƀư kloh ăp nau kan kơt: Nau kan mât, njrăng bri, ăp nau kan ntuh kơl ndâk ƀư mbrơi, nchră tơm prăk ODA tâm nkuăl, ƀư nau kan trong hoch dak Ia Mor ê geh ƀư tam nau dơi tŏng tŏ, ăp nau jêr tâm nau nkra điện mhe, nau kan mât, dŏng tơm dak, neh dak, nau kan ƀư ân gleh, n’huch biên chế...

            Ntoh nau tâm nar mêt uănh, Kruanh Uỷ ban tơm prăk-Ngân sách bah Quốc hội Nguyễn Phú Cường rnê prêh nau kan bah n’gor Gia Lai mpeh nau ntrŭnh ƀư nau kan têm nkrem, jrăng mpŭng lir. Nkre, đă ngor lŏ ƀư geh săk tam nau kan aơ geh nau ƀư tâm ăp rmôt, nkuăl, n’hao nau kan mêt uănh, kơl rđau ntrŭnh ƀư ăp nau kan hôm mbrơi, geh nau kan ngăn đah ăp nau kan ê ntơm ndâk, năn lah ăp nau kan ê năn jêh, geh nau mât, dŏng, ƀư ndơ ơm geh ân tâm di, tâm ban ma nau ntrŭnh...

            Kruanh Uỷ ban tơm prăk-Ngân sách bah Quốc hội Nguyễn Phú Cường kŏ đă Kruanh UBND n’gor Gia Lai rđau ăp ntŭk kan, rmôt kan geh tât lŏ rgum âk nau rgop mbơh bah rmôt kan mêt uănh, ntop tay, ƀư jêh ăp nau đă, nau mbơh bah n’gor ndrel mra rgum ăp nau mbơh bah Uỷ ban Rnâng kan  Quốc hội tâm rơh ơm ngăn./.

            Nŭih rblang: H’Thi