VOV4.M’nông: Mhe rlau, rđau kan Đảng ndrel Ngih dak hŏ geh rơh mâp măt ntoh măt nŭih Quốc hội lah nŭih rnoi mpôl đê̆ gưl 15. Ntoh nau tâm nar mâp, Kruanh Quốc hội Vương Đình Huệ ntoh nau ŭch ndrel rnơm lah, ăp ntoh măt Quốc hội nŭih rnoi mpôl đê̆ mô rlu ƀư ăp nau kan ueh ngăn bah nơm, mro nsôih, tâm di đah nau rnơm ŭch bah cử tri lam dak, ngăn lah nŭih ƀon lan, cử tri nkuăl rnoi mpôl đê̆ ndrel gôl yôk.

            Kruanh Quốc hội Vương Đình Hụê lah rjăp, Đảng ndrel Ngih dak mro uănh năl nau tâm rnglăp rnoi mpôl geh nau khlay đah dak nơm, du neh dak geh 54 rnoi mpôl oh nô ndrel rêh, ndrel tâm kơl tâm rnôk ndâk neh dak ndrel mât neh dak bah jŏ jong ndrel tâm ban du nau kan kơl an nau tâm rnglăp rnoi mpôl, tâm nau tâm ban, tâm rnglăp, tâm ryơk ndrel hun hap. Ăp nau kan kơl an tât nŭih rnoi mpôl đê̆, geh ƀư rjăp tâm ăp bản Hiến pháp bah dak CHXHCN Việt Nam. Ăp năm rlau aơ, hŏ geh ăp nau ntrŭnh kơl an hun hao văng sa, rêh jêng đah nkuăl rnoi mpôl đê̆ ndrel gôl yôk, nau rêh drăp dnơ, nuih n’hâm bah kônh wa ăp nhoat geh hun hao, rgâl mhe, ƀư rgâl nau ueh bah nkuăl rnoi mpôl đê̆ ndrel gôl yôk.

            Yơn lah, yor nau ntơm geh dêh, nkuăl ƀư nau kan hôm jêr ngai, bri mih nar mô ueh ri geh âk nau khuch bah rgâl mhe trôk nar, vay rdâng đah nau khuch, nau nâp dŏng ri mô tŏng. Ndri ma rnôk aơ, nkuăl rnoi mpôl đê̆ ndrel nkuăl yôk hôm lah ntŭk mbrơi hun hao, nau geh bah nŭih rnoi mpôl đêư dêh rđil đah nau geh nsum bah lam dak, geh nau mra tâm ƀah lơn ma hô.

            Tâm nuih n’hâm ăp nau ntrŭnh bah Trung ương, lơ 18/11/2019, Quốc hội hŏ ntrŭnh nau mrô 88 ân ƀư Bôk nau kan hun hao văng sa, rêh jêng nkuăl rnoi mpôl đê̆ ndrel gôl yôk lvang năm 2021-2030, nchŏng kloh: “Ăp nau kơl an hun hao văng sa, rêh jêng, neh dak, rnă njrăng nkuăl rnoi mpôl đê̆ ndrel gôl yôk ân geh ăp ntil, rƀŏng tât nau hun hao nâp nâl ndrel ƀư ueh nau dơi, geh dăng bah nkuăl ndrel nuih n’hâm nsôih êng bah rnoi mpôl đê̆”, ndrel đah nkô̆ nau ngăn ndrel mpŏng ŭch ndrel nsôih chính trị prêh.

            Gay dơi geh nau nê ndrel ŭch geh nau ndal rnôk aơ, Kruanh Quốc hội Vương Đình Huệ đă ăp ntoh măt Quốc hội lah nsum, ngăn lah Hội đồng Dân tộc ndrel ăp ntoh măt lah nŭih rnoi mpôl đê̆ gưl XV bol ma nau kan tâm ăp rmôt ân geh kơl an, rgop ndrel đah Quốc hội rgum uănh, gay ntŭk kan geh tât nau nau tam bah ăp nau kan:

            ‘Nchrăp, nsôih ndrel ndal lơn tay ăp nau kan nchrăp ndâk nau kan mêt uănh, gay ntŭk kan geh nau dơi gay ƀư ăp nau dơi tĭng tâm di nuih n’hâm nsôih kan bah Quốc hội, lŏ mât ân nâp tâm di nuih n’hâm nsôih hao, tâm kơl, tâm pă ăp nau ueh đah ăp rnoi mpôkl, đah ăp nkuăl, nau râng kan ngăn, geh săk tam bah ăp rmôt kan đah nkuăl rnoi mpôl đê̆, n’hao lơn tay nau tâm rnglăp lam rnoi mpôl. Ntoh măt Quốc hội lŏ ân geh n’hao lơn tay nau gĭt mpeh nau kan rnoi mpôl đah ăp gưl, n’gâng kan, mặt trận, rmôt kan ăp gưl tâm ntrong kan chính trị, ƀư ueh nau kan tâm ban, tâm rnglăp, tâm ryơk tâm kơl ndrel hun hao, ntô̆ n’hao nau nkah ndrel njrăng ăp nau ƀư mhĭk, nau ƀư ndăn tâm nau kan rnoi mpôl, tâm nkhah nau tâm rnglăp lam rnoi mpôl, rklaih nau mĭn prêng, mô nănh bah rnoi mpôl”.

            Kruanh Quốc hội Vương Đình Huệ ŭch, ăp ntoh măt Quốc hội lah nŭih rnoi mpôl đêư ân nsôih mĭn, đă ndrel ƀư ngăn ăp nau mĭn, nau ntrŭnh, ntrong kan rnoi mpôl bah Đảng ndrel Ngih dak nơm jêng ăp nau kan, nkô̆ nau, nau ƀư ngăn, uănh kơl an nau đăp mpăn geh săk tam đah nau ntrŭnh, ntrong kan bah Ngih dak tâm nkuăl yôk, n’har bri, nkuăl rnoi mpôl đê̆, rgum ndâk nkuăl rnoi mpôl đê̆ ndrel gôl yôk hun hao ngăch mpeh văng sa văn hoá, rêh jêng, nâp mpeh rnă njrăng, neh dak, tâm rnglăp đah nau hun hao nsum bah lam dak, tâm di đah nau kan khlay ngăn bah neh dak.

            Kruanh Quốc hội đă ăp ntoh măt Quốc hội lah nŭih rnoi mpôl đê̆ rgum kơl nchră nau ndâk njêng, rgâl nkra, ntop tay ăp nau kan pháp luật ân tâm di đah nau ngăn ndrel nau đă n’hao nau ntuh kơl, kơl an hun hao nkuăl rnoi mpôl đê̆ hun hao nau kan ntĭm nti, dak si, n’hao nau gĭt blau, blau kan, n’hao nau nâp cán bộ tâm dâng, đăp mpăn nau rêh jêng, hun hao nâp nâl, ndrel ma hun hao văng sa rêh jêng ndrel mât ntŭk ntu, hun hao văng sa rêh jêng ndrel mât đăp mpăn neh dak, ndâk njêng ƀon lan mhe, njêng nau ueh tâm nau kan rgâl mhe, ƀư ueh, mât ndrel ƀư tĭng kơt ăp nau vay ơm ueh mpeh nau ơm tâm nsum mpôl ăp rnoi mpôl Việt Nam./.

Nŭih rblang: H’Thi