VOV4.M’nông: Bôk nău kan rƀŏng lam dak hun hao wăng sa-rêh jêng nkual rnoi mpôl đêt n’hanh nkual yôk lvang 2021-2030 na nê̆ dơi mbơh ƀư ta ntŭk bah bôk năm aơ, lơ mĭn ton têh bah Chính phủ ƀư tĭng ăp nău rƀŏng hun hao nâp nâl, rƀŏng tât đăp mpăn “Mô geh nuĭh ntlơi bah kơi”. Nuĭh nchih nău Đài TNVN ôp Kruanh n’gâng kan, Chủ nhiệm UBDT Hầu A Lềnh mpeh trong kan nchrăp an bôk nău kan geh nkô̆ nău têh aơ mbơh ƀư geh săk rnglăy.

Kruanh n’gâng kan, Chủ nhiệm UBDT Hầu A Lềnh.

- Ơi Kruanh n’gâng kan, năm 2022 lah năm bôk năm bôk nău kan rƀŏng tĭng lam dak hun hao wăng sa rêh jêng nkual rnoi mpôl đêt n’hanh nkual yôk na nê̆ mbơh ƀư lvang 1 ta bah dâng. Dăn Kruanh n’gâng kan an gĭt mpeh ăp nkô̆ nău mbra dơi kơl lor tâm nău pă prăk an lvang 1 bah bôk nău kan rƀŏng tĭng lam dak rơh aơ rgum tâm ăp nău n’hanh m’hâm nău kan mêh ?

- Kruanh n’gâng kan Hầu A Lềnh: Tâm bôk nău kan rƀŏng tĭng lam dak hun hao wăng sa rêh jêng nkual rnoi mpôl đêt n’hanh nkual yôk lvang 2021-2030 n’hanh lvang ngoăy 2021-2025 geh 10 nău nchrăp ƀư rgop nsum. Yơn lah, gay ntơm tâm năm 2022, geh n’gâng tơm an ăp năm bah kơi tay, Ủy ban Dân tộc lĕ tâm ban ŭch đah ăp n’gâng kan, nău kan trung ương n’hanh ndơ̆ tâm trong nchrăp tâm pă prăk. Nĕ lah rgum mkra lor lah nău mpeh jay gŭ, neh gŭ, neh tuch tăm, dak dŏng. Aơ lah ăp nău nuĭh ƀon lan dŭt ŭch. Tal 2 lah jêh mpeh trong ƀư dŏng kơp dơn ngoăy đah Trung ương n’hanh ƀon lan an geh du tơm prăk dŭt n’hâm têh.

Tal 3 lah rgum an rgâl mrô n’hanh uănh khlay ndâk njêng trong ăp rnoh mrô, rnoh an ƀư uănh lah săk rnglăy tâm rnôk ƀư tĭng bôk nău kan. Hăn ndrel đah ăp nău kan aơ, ri mpôl hên tâm pă du gâl prăk tâm năm 2022 an ăp nău kan êng kơt nău kan dak si, nău ntĭm nti, nău văn hóa, n’ăp mât njrăng bri dak rnă njrăng, jêh nĕ trong kan nkoch trêng, rgŏ jă, jêh nĕ nău ntĭm nti, n’hao nău blău an rmôt cán bộ mât uănh ta ăp gưl tâm nău mbơh ƀư bôk nău kan. N’hanh uănh tât nău Ban ntĭm rđău Trung ương an tât ƀon lan gay đăp mpăn geh tâm ban ŭch đah Trung ương đah ƀon lan.

- Ơ ! Ndrĭ Kruanh n’hanh kan năl lah m’hâm mpeh ăp nău dơh n’hanh jêr jŏt rnôk mbơh ƀư bôk nău kan rƀŏng tĭng lam dak tâm rnôk neh dak dôl geh khuch dŭt hô mpeh wăng sa rêh jêng yor chôt srê Covid-19 đŏng ?

- Kruanh n’gâng kan Hầu A Lềnh: Mpeh ăp nău dơh bah bôk nău kan, ri lor lah tâm nău ntrŭnh ntuh kơl bah Thủ tướng Chính phủ lĕ tŏng ăp pă tơm prăk an bôk nău kan lah 104.000 rmen, lvang bah aƀaơ tât năm 2025. Trong nkoch mbơh lĕ lăp n’hanh nuĭh ƀon lan lĕ dơi wât nău aơ bôk năp.

Ăp nău nchrăp ƀư jêt tâm bôk nău kan dơi ndâk njêng tĭng nkô̆ nău rgum nsum nău ŭch kơt tâm rnôk uănh kơp tay dŭt na nê̆ ăp ntŭk, ăp n’gâng kan, ăp nău kan, jêng nău mbơh ƀư nău aơ tâm di đah nău ŭch khlay ngăn, ŭch ngăn, ma geh trong jâng ntrôl gay mât uĕh nău dơi bah nuĭh ƀon lan, rŭn hao êng gay rklaih ach o.

Yơn lah, hôm e âk đŏng nău dŭt jêr jŏt. Rlet rlău chôt srê năm mhe rlău, nău rêh bah kônh wa dôl jêr jŏt mâp âk jêr jŏt lơn tay. Kơt nĕ, nău nsrôih bah nuĭh ƀon lan mbra jêr jŏt. Ăp nău manh bah ăp ntŭk lĕ jêr lơn dŭt âk nkôp đah bôk năp mĭn lah bôk nău kan.

Bah meng nĕ ăp nău n’hêl na nê̆ dơi ntoh tay tâm rnôk ƀư tĭng bôk nău kan, ntĭt nsa kơt ntoh rnăk ach o mhe ntoh xă ach o jêh nău uănh kơp lŏ ji ngot ach o năm 2021 tĭng rnoh ƀư tâm di ach o âk trong mhe. Kơt nĕ, nău pơk hvi tay nuĭh, ntop tay ntŭk mbra ƀư hŭch rnoh ntuh kơl. Lah mô ntuh kơl tât ăp thôn nĕ mbra ƀư jêr an nuĭh ƀon lan, an geh du nău rblang ơh n’hanh ntop tay tâm di.

Nĕ lah ăp jêr jŏt ma mpôl hên mĭn bah năp măt n’hanh dôl geh âk trong mkra gay tâm rgop đah ăp n’gâng kan, nău kan, ƀon lan gay mkra ăp nău aơ.

- Đak âk jêr jŏt kơt Kruanh n’gâng kan mhe nkoch, gay mbơh ƀư bôk nău kan geh săk rnglăy bôk năp dâl ri ăp nău kan geh tât n’hanh ăp ntŭk mbra moh nău ƀư gay nking n’gang nu nău mpŭng lir, đê̆ đŏng sa khâm rnôk mbơh ƀư ăp nău nchrăp ƀư rgop nsum mêh ?

- Kruanh n’gâng kan Hầu A Lềnh: Gâp an lah nău nking n’gang mpŭng lir tâm rnôk ƀư tĭng bôk nău kan, đê̆ đŏng ăp nău sa khâm, mô dơi mô geh. Yơn tĭng nuih n’hâm ntĭm rđău bah Đảng n’hanh ngih dak, ăp sam ƀŭt, nău ntrŭnh mpeh trong ƀư, nău kan, pă gưl mkra bah ăp gưl mbra ƀư n’hŭch lĕ rngôch ăp nkô̆ nău nĕ. Tâm nĕ geh du trong mkra dŭt n’hâm khlay. Nĕ lah nău ndâk njêng sam ƀŭt sam tra an năl kloh nău kan, nău dơi mkra n’hanh dŭt khlay, nĕ lah nău kan bah tĭng gưl.

Bah meng nău mbơh ƀư du trong rjăp bah trong ngih pah kan mât uănh ngih dak ri an rgŏ jă groi nđôi bah Quốc hội, Hội đồng nhân dân ăp gưl n’hanh lơn lah tât râng groi nđôi bah Mặt trận Tổ quốc, ăp rmôt chính trị rêh jêng n’hanh groi nđôi bah nuĭh ƀon lan, kơt lah bah ăp ngih pah kan nkoch mbơh. Gâp an lah mbơh ƀư tâm ban lĕ rngôch ăp trong mkra aơ mbra n’hŭch dŭt đêt ăp nău lah ntuh kơl mô di, tih ntŭk, tih nuĭh mô lah ăp sŏk sa rmiănh nău kơl. Mpôl hên lĕ lah nău aơ tâm rnôk ndâk njêng ăp sam ƀŭt sam tra, nău ntrŭnh.

- Ơ! Dăn lah uĕh kruanh n’gâng kan lĕ an mông nar an bôk nău kan ?

Nuĭh rblang: Y Sưng Phê Ja