VOV4.M'Nông: Nuh srê COVID-19 ntoh ta lĕ rngôch ăp n'gor, nkual ƀon têh lam dak, hŏ geh âk nai ntĭm n'hanh kon se nti ntưp rêng ji. Gay đăp mpăn, bên di tâm nô nău mhe, uănh tĭng nău geh ngăn ngăn, ăp n'gor geh âk trong ntĭm n'hanh nti rdâng lơh ngăch ngăr gay kon se dơi tât nhih nti.

          Ntrŏng năl nuh srê COVID-19 hôm tât krit nji, yơn nhih nti mô dơi ntĭl mpông lĕ rngôch jêng ăp n'gor, nkual ƀon têh đăp mpăn ntŭk ntĭm nti rdâk njêng trong ntĭm nti na nê̆ nkre đah ntĭm nti pơk sŏng dăng bah ngai gay năn ngăch rgâl trong ntĭm nti tĭng nô nău geh nuh srê ta n'gor. Trong nkra ma ăp n'gor an ƀư aƀaơ nê lah an kon se nti ta ăp xã, phường, thị trấn đăp mpăn mô lah geh ma nău nuh srê đêt dơi hăn tât na nê̆ tât nhih nti.

Wa Nguyễn Thế Bình, Giám đốc Sở Giáo dục n'hanh Đào tạo n'gor Hà Giang an gĭt, kalơ nuih n'hâm ƀư ntĭm n'hanh nti ngăch ngăr tĭng nău tât bah nuh srê, Ủy ban nhân dân n'gor hŏ n'glêh an kon se nti ăp nkual đăp mpăn hăn plơ̆ nti tay ntơm bah kêng dŭt khay 11- lôch 4 pơh an kon se nti manh rlu hăn tât nhih nti gay njrăng, n'gang nuh srê:

“Đah ntŭk ma geh rnoh nuh srê gưl 1, gưl 2, ăp nhih nti leo ƀư nti ngăn kơt ơm n'hanh tĭng ƀư jăp ăp trong nkra gay njrăng n'gang nuh srê. Đah gưl 3, gưl 4 ri ăp nkuâl dja manh an kon se nti rlu hăn tât nhih nti n'hanh an ƀư trong ntĭm nti êng, mbra tĭng ƀư nti pơk sŏng dăng, mbra ƀư jao bài tập, mô lah jao phiếu kơt nti, jao trong nchrăp kơt nti an ăp kon se nti, mô lah ôn tập, tiăr nti tay ma nău jao bài tập sĭt ta jay an ăp kon se. Tât rnôk dja ri lam n'gor hŏ geh 430 nhih nti tâm lĕ rngôch rnoh 633 nhih nti an kon se plơ̆ kơt nti tay, geh 68%”.       

Rnôk geh nuh srê, ăp n'gor mô ir ƀư lhăt ntĭl mpông bah nhih nti lam n'gor, nkual ƀon têh, rgâl tâm nê nchih wăr n'glĕ tĭng jrô nti, tĭng nuĭh kon se nti, nai ntĭm geh tât dơm; leo ƀư uănh năl COVID-19 n'hanh rgâl jêng nti pơk sŏng dăng, mô lah manh rlu hăn tât nti gay ôp uănh, ƀoi tĭng, lôch nê ngăch an kon se nti hăn tât nhih nti. Kơt ta n'gor Hòa Bình, lôch rnôk ntoh nuh srê COVID-19, Ủy ban nhân dân n'gor n'glêh an kon se nti, sinh viên, nuĭh nti ta ăp ntŭk ntĭm nti lam n'gor manh rlu nău nti mâp na nê̆ ta nhih nti tâm 2 nar gay tĭng ƀư pah kan ôp  uănh, sơch luh n'hanh chuh vaccine njrăng n'gang Covid-19. Lôch nê, ăp nhih nti hŏ lor nchrăp leo ƀư ntĭm nti ngăch ngăr tât tĭng jrô nti, nsrôih gay kon se nti dơi tât nhih nti, đăp mpăn ăp tŏng ăp trong njrăng n'gang nuh srê. Wa Bùi Thị Kim Tuyến, Giám đốc Sở Giáo dục n'hanh Đào tạo n'gor Hòa Bình mbơh gĭt:

“Ta lam n'gor ri hôm geh nhih nti leo ƀư an ăp kon se hăn tât nhih nti kơt ơm đŏng, yơn geh nhih nti leo ƀư nti pơk sŏng dăng n'hanh mô dơn nê tâm nhih nti geh jrô nti ma geh F0 ri jrô nti nê nti pơk sŏng dăng bah ngai, hôm ăp jrô nti êng ƀa ƀă nti ngăn kơt ơm. Yơn lah ân lôch sơch ăp nuĭh F1 geh tât êng ƀa ƀă lah mô geh ntưp da dê, ri mơ đăp mpăn an ăp kon se nti lĕ ma nai ntĭm nti”.

Wa Nguyễn Việt Hà, Groi kruanh Jrô kan Chính trị Tư tưởng, Sở Giáo dục n'hanh Đào tạo n'gor Vĩnh Phúc an gĭt, du đêt nhih nti ta du đêt nkuâl Sông Lô, Vĩnh Tường, Yên Lạc, nkual ƀon têh Phúc Yên n'hanh Vĩnh Yên dôl ƀư ntĭm nti pơk sŏng dăng gay njrăng n'gang nuh srê. Gay đăp mpăn nkô̆ bôk nău kan năm nti, ăp nhih nti leo ƀư tĭng trong ntĭm nti rgâl an tâm di đah nău dơi geh kơt nti bah ngai da dê.

“Đah ăp nuĭh rnôk rgâl jêng nti pơk sŏng dăng ri lah tĭng trong kơt nti jăch ndăn, manh bên di dŭt ngăch dơm. Lôch rnôk nuh srê hŏ mât kân dơi ăp tơm ntưp rêng ri ăp nhih nti rgâl jêng ntĭm nti rgum mâp na nê̆ dĭl. Gay đăp mpăn săk blău rnôk an ƀư ntĭm nti pơk sŏng dăng, ăp nhih nti hŏ sơch ăp trong tâm ntêng lêng nău nti tâm di ta ăp môn gay đăp mpăn rpaih bôk nău kan trong nchrăp bôk nău kan ntĭm nti hŏ ndơ̆ luh”.

          Bộ Giáo dục n'hanh Đào tạo rnê âk, trong leo ƀư ntĭm n'hanh nti ta ăp n'gor aƀaơ lah dŭt ngăch ngăr da dê đah nău nsrôih bah ir tât khuch bah nuh srê tât nău kan bah nhih nti. Trong leo ƀư nkre đah ăp trong ntĭm nti bah ăp n'gor nkre kơl đăp mpăn an nuĭh ntĭm n'hanh nti, nkre ƀư lôch jêh bôk nău kan ma hôm mât dơi săk blău ntĭm nti đŏng. Aơ lah rnoh ŭch tât kan ma Bộ Giáo dục n'hanh Đào tạo hŏ ndơ̆ luh ntơm bah bôk năm nti, Bộ hŏ ntĭm nti n'hanh ăp n'gor dôl an ƀư ngăch ngăr tât tĭng nhih nti, gay ƀư lôch jêh trong nchrăp năm nti./.

VOV 4- Nuĭh rblang: Điểu Thân