Bôk nău kan yor n’gâng kan leo kan tahen n’har bri n’gor Kon Tum tâm rgop đah n’gâng kan ta ntŭk ƀư, lĕ ndơ̆ tết ơm sĭt đah nuĭh ƀon lan ta n’har bri. Bâh ơm ôi, dŭt âk ƀon lan bâh 11 thôn bâh xã n’har bri Ia Đal lĕ rgum ta ntŭk ƀư bôk nău kan. Ta aơ ƀon lan geh tât râng âk nău pah kan rhơn Tết, kơt lah tâm rlong nklâm banh chưng, tâm rlong klup còn, têk rse, ntrôl mâng...Ăp rnăk vâl geh nău rêh jêr jŏt geh cán bộ tahen n’har bri mbơh tơih tât drăp ndơ tăch mô sŏk prăk gay ma săch kho ao mhe, dơn phe, ngi, dak măm, bột ngọt. Ta bôk nău kan, mpôol kan tahen n’har bri n’hanh n’gâng kan ta ntŭk lĕ pă an 400 cờ ngih dak, rlău 250 nklâm ndơ, 400 kôp banh chưng, pă học bổng an 9 oh kon se bâh bôk nău kan “Nhao joat jâng oh tât ngih nti”, nău kan “kon rong tahen n’har bri”, pă ntil ndrôk deh kon kơl an 2 rnăk ach o gay ma hun hao pah kan jan sa..lĕ nău khlay prăk rlău 350 rkeh prăk.