Lơ 16/1, Rmôt kan nuĭh khih dak si Dioxin Việt Nam lĕ ƀư mâp măt, jao ndơ joi nău rêh n’hanh ndơ Tết an nuĭh khih dak si dioxin ta ăp nkuăl Ea H’leo, Krông Năng n’hanh Krông Búk, n’gor Dak Lak. Di rơh aơ, Rmôt kan nuĭh khih dak si dioxin Việt Nam lĕ an prăk nkra njêng an 5 rnăk khih dak si dioxin n’hanh 30 nklâm ndơ Tết ntop kơl ăp nuĭh. Dĭng lĕ khlay ăp ndơ lah 86 rkeh prăk.

Na nê̆ tât rnăk wâl chop khâl n’hanh an ndơ Tết du đêt rnăk ta nkuăl têh Pơng Đrang, nkuăl Krông Búk, n’gor Dak Lak, Trung tướng Nguyễn Hữu Chính, Kruanh Rmôt kan nuĭh khih dak si dioxin Việt Nam, lĕ ntrŭt đă ăp nuĭh khih dak si n’hanh rnăk wâl hao tay tâm nău rêh. Aƀaơ n’gor Dak Lak geh 1.418 nuĭh khih dak si dioxin dôl dơi geh nău ntop kơl. Lĕ rngôch ăp nuĭh aơ mâp jêr jŏt da dê tâm nău rêh. Rơh aơ, Rmôt kan nuĭh khih dak si dioxin n’gor Dak Lak lĕ rgŏ jă an ndơ tết tât lĕ rngôch 1.418 nuĭh, du nklâm ndơ khlay 200.000 rbăn prăk, rgop kơl ăp rnăk geh tay ndơ wơt Tết.