Tâm rnôk hăn tât Đồn Biên phòng tâm trong n’har bri tâm dăch ma dak băl Lào ndrel Campuchia ăp nar tết, geh lăp săk tâm nau rhơn vơt Tết. Tâm 13 xã n’har bri tâm 4 nkuăl: Đăk Glei, Ngọc Hồi, Sa Thầy ndrel Ia H’Drai bah n’gor Kon Tum nau nchrăp vơt Tết hŏ tât êp.

Rơh Tết năm mhe Ất Tỵ năm aơ, N’gâng kan rdau tahen n’gor Kon Tum săch xã Ia Đal, nkuăl Ia H’Drai ƀư ntŭk gưl n’gor Bôk nau kan “Năm mhe Biên phòng duh răm nuih n’hâm ƀon lan” ndrel đah “Nar nklâm bánh chưng”. Bah nau kan aơ, geh rlau 6000 nŭih nŭih ƀon lan bah 11 thôn tâm xã geh rhơn Tết vay ơm, tâm rlong nklâm bánh, gâm bánh chưng; tâm n’ur njroh mprơ, thể dục thể thao; geh pă rlau 250 nklâm ndơ, 400 mlâm bánh. Đại tá Lê Minh Chính, Chính uỷ tahen Biên phòng Kon Tum, mbơh rnôk aơ, tâm njok trong n’har geh ƀư nau kan gay mât chăm Tết ân ƀon lan:

‘Năm aơ hên săch xã Ia Đal, nkuăl Ia H’Drai lah xã tơm gay rhuăt nau blau kan nsum. Ăp xã hôm e ăp Đồn Biên phòng tâm rgop nsum ma ƀon lan ndrel n’gâng kan tâm nkuăl gay ƀư ân kônh wa đah ăp tu tơm bah cán bộ tahen rgop ndrel rgum tâm ăp ntŭk kan, nŭih geh nuih n’hâm lŏng, bah ăp gưl, ăp ntŭk kan gay kônh wa geh vơt du năm sa Tết duh răm”.

Tâm nau nteh chĭng, màu n’ha cơ chăng nsum ma bâr gơm bah ăp kônh wa ăp rnoi rêh njok n’har bri bah n’gor Kon Tum dôl jêng nau ueh ngăn.

Năm 2024 nau rêh bah ƀon lan tâm nkuăl n’har bri n’gor Kon Tum lơn ma rgâl yor geh rnoh cà phê, cao su, bum blang hao khlay. Ăp nau kan yor tahen Biên phòng n’gor Kon Tum ntrŭnh ndrel râng, kơt: Pă đảng viên Đồn Biên phòng kơl an ân âk rnăk vâl; kơl an ndrôk me ân rnăk ach o tâm xã n’har bri; rong sur; hăn ndrel bu ur nkuăl n’har bri...Ƀư ueh nau săk tam kơl an ma rhiăng rnăk rnoi mpôl đê̆ ach o geh âk prăk, n’hao tay nau rhơn vơt năm mhe. Wa Bloong Hâm, Groi Kruanh UBND xã Đăk Dục, nkuăl Ngọc Hồi, mbơh:

“Geh Đảng, Ngih dak, ăp ntŭk kan, tahen Biên phòng n’gor kơl an ăp nkô̆ nau ba lơ jao văng sa-rêh jêng tâm xã phung hên geh ndrel dơi du đê̆ nkô̆ nau rlet rlau nau nchrăp. Kônh wa ƀon lan rhơn, nchrăp ăp nau vơt tết vay ơm bah rnoi mpôl”.

Mông nar dôl mbrơi mbrơi tât rnôk ntrơn ntơm năm ơm ndrel năm mhe. Tâm trong n’har bri n’gor Kon Tum geh 76 rmôt, rlau 550 rnăk vâl ndrel nŭih tâm 13 xã n’har bri đăng ký mât njrăng êng trong n’har, n’gâng ntăm; geh 93 rmôt đah bơi tât 600 rnăk đăng kí rnăk vâl mât njrăng êng ƀon lan. Tâm nau khuh răm vơt Tết, rhơn năm mhe, ƀon lan ndrel tahen ta aơ mô chuêl nau kan n’hao nau njrăng. Cán vbộ, tahen ndrel ƀon lan tâm njok n’har hôm mât ueh nau kan mât đăp mpăn neh ntu bah neh dak. Đại tá Trần Ngọc Tùng, Groi Rđau kan tơm, Kruanh n’gâng kan Rđau tahen Biên phòng n’gor Kon Tum, mbơh:

“Ƀư ueh nau kan bah ƀon lan, nsôih tâm rgop đah tahen Biên phòng tâm nau mât nkuăl n’har bri, nau ƀư tơm rnă njrăng nkuăl n’har bri bah neh dak, N’gâng kan rđau tahen Biên phòng n’gor ntrŭt dăng nau nkoch trêng, n’hao nau gĭt bah kônh wa ƀon lan tâm nau ndaka nuih n’hâm lam ƀon lan ndrel ma nau mât đăp mpăn ƀon lan. Ƀư ueh nau kan, nau dơi bah rmôt, bah nŭih tâm nau mât n’har bri bah neh dak, mât đăp mpăn chính trị rêh jêng”.

Đah ăp nau rgâl tâm nau rêh văng sa, rêh jêng, nau rhơn vơt Tết bah ƀon lan ndrel tahen tâm nkuăl n’har bri Kon Tum lơn ma ueh đŏng. Tết tâm nkual n’har bri mô knŭng lah rnôk tâm rgum tâm mâp, ma hôm lah rnôk gay nkoch nkah nau tâm boh tahen, ƀon lan, rêng nau rhơn tâm nkuăl tơm bah neh dak./.