Trung tướng Nguyễn Anh Tuấn, Chính phủ N’gâng kan tahen Biên phòng mbơh, vơt năm mhe năm aơ, Đảng uỷ, N’gâng kan rđau tahen Biên phòng hŏ rđau ăp rmôt ndâk nau kan, ƀư ueh nau nchrăp, đă rbăn rmôt kan tât tâm nkuăl ndrel ma gưl uỷ, n’gâng kan ăp nkuăl ƀư ân tahen ndrel ƀon lan vơt Tết, rhơn năm mhe ndrel mât đăp mpăn tâm ăp ƀon lan nkuăl n’har bri.

Mhe rlau aơ, tâm xã Pa Tần, nkuăl Sìn Hồ, n’gor Lai Châu, hŏ geh nau kan “Năm mhe nkuăl n’har bri duh ndăm nuih n’hâm ƀon lan”, đah âk nau kan ngăn. Tât râng ndrel ntoh nau tâm nar kan, Kruanh dak Lương Cường ntoh nau rhơn yor cán bộ, tahen Biên phòng hŏ ndrel dôl tâm rgop ueh ma gưl uỷ, n’gâng kan nkuăl, ăp gưl, ăp ntŭk kan mât chăm Tết ân ƀon lan tâm nkuăl n’har bri. Kruanh dak ân lah, aơ lah nau ƀư ntoh nuih n’hâm kan, nau vay tâm kơl bah rnoi mpôl ndrel nau ueh bah Tahen ƀon lan Việt nam janh dăng, rgop nau ƀư ueh tay rup gui “Tahen Wa Hồ” tâm rơh mhe:

‘Bôk nau kan aơ geh ƀư đah âk nau kan n’hêl, geh nau khlay, tâm dăch ma kônh wa ăp rnoi; ndri ma hŏ rgum nau lăp kan, nsum ty, rgop n’hâm bah âk ntŭk kan, rmôt kan, nŭih tă bah Trung ương tât nkuăl ndrel ăp ntŭk. Đah ăp mlâm ndrôk me, dŭng ndpư, phe sông, bánh chưng, pă prăk ân kon se nti ach o nsôih blau, “n’hao nhoat jâng oh hăn nti” ndrel kơl 400 ngih...ma Bôk nau kan pă, nê lah ăp nklâm ndơ geh ma nuih n’hâm, nau bonh đă têh, khlay, mra kơl an ăp rnăk ach o tâm nkuăl n’har bri ndrel tahen, ƀon lan lam dak vơt tết năm mhe bah rnoi mpôl duh răm, ueh lăng ndrel rhơn m’ak”.

Di rnôk aơ, Kruanh dak Lương Cường pă 200 ngih ân tahen, rnoh 10 rmen ân ƀon lan nkuăl n’har bri bah n’gor Lai Châu ndrel pă 11 nklâm ndơ ân ăp rnăk dơi kơl. Tĭng nau mbơh bah Rnâng kan, rnoh nklâm ndơ ma tahen lam dak njoăl tât nkuăl n’har bri bah Bôk nau kan “Năm mhe nkuăl n’har bri duh răm nuih n’hâm ƀon lan” hŏ pă 5 ngih ân rnăk mô geh ngih, pă bơi tât 400 nklâm ndơ ân rnăk dơi kơl, ach o, ăp rnăk ntoh lư, ƀư khám ndrel pă dak ri mô roh prăk ân rlau 300 nŭih. Tâm xã n’har bri Ia Pnôn, nkuăl Đức Cơ, n’gor Gia Lai, Bôk nau kan ‘Năm mhe nkuăl n’har bri duh răm nuih n’hâm ƀon lan” hŏ pă 100 nklâm ndơ ân ăp rnăk dơi kơl, 20 nklâm ndơ ân kon se geh nau rêh jêr jŏt; khám, săm si, pă dak si mô geh sŏk prăk ân rlau 200 rnăk.

Tâm xã Thuận Hạnh nkuăl Dak Song, n’gor Dak Nông, Bôk nau kan hŏ pă 250 nklâm ndơ ân rnăk ach p, rnăk jêr jŏt ndrel rnăk dơi kơl, ăp kon se geh nau rehe jêr jŏt, đah rnoh 150 rkeh; pă 3 ngih tâm kơl ân ăp rnăk geh nau rêh jêr jŏt.

Mra dơi lah Bôk nau kan “Năm mhe nkuăl n’har bri duh răm nuih n’hâm ƀon lan” geh ƀư tâm lam nkuăl neh, gôl dak, jêng ngoai tâm ăp nau kan kơl an săk tam ngăn, n’hêl ngăn bah tahen, rgop nau mât chăm Tết ân nŭih ach o, leo tât nau rhơn, nau khuch răm ân tahen tâm nkuăl n’har bri. Bah nê, n’hao n’hâm tâm rnglăp lam rnoi, lah rjăp nau khlay ơm ueh bah rnoi mpôl nơm lah tâm kơl; rgop nau n’hao nau ueh bah “Tahen Wa Hồ”./.