VOV4.M’nông: Jêh lôch rơh rƀŭn ndal tal bôk năp, Kruanh Quốc hội Vương Đình Huệ hŏ đă, Chính phủ, Thủ tướng Chính phủ ndrel ăp ntŭk kan geh tât ndal ƀư ăp nau kan ân ngăch, năn ăp nau ntrŭnh mhe geh nchră, rklaih nau kan “Bôk năm geh rmeh, dŭt năm ndrât ndal”.

            Đah nuih n’hâm nau kan prêh bah năp neh dak, ƀon lan ndrel cử tri, rơh rƀŭn ndal tam bôk năp, Quốc hội gưl 15 hŏ yơr ty nchră du luật ndrel 4 nau ntrŭnh đah nau tâm ban prêh. Nau ntrŭnh mpeh tài khoá, tơm prăk gay ma kơl an ntrŭnh ƀư Bôk nau kan ndâk njêng ndrel hun hao văng sa, rêh jêng lah ngoai tâm ăp nkô̆ nau ntrŭnh tơm khlay bah rơh rƀŭn. Kruanh Quốc hội Vương Đình Huệ ân lah, gay ntrŭnh ân năn, geh tam đah ăp nau kan tài khoá, tơm prăk, Quốc hội đă Chính phủ, ăp gưl, ăp ntŭk kan ân mât dăch nau ntrŭnh, ntrong rƀĭng bah Đảng, ăp nau ntrŭnh bah Quốc hội, ƀư nâp nau văng sa, n’hao nau geh jêng, nau ntul rlong, nau ƀư êng, nau dơi rdâng bah jâng văng sa tŏng dơi nau ŭch bah năp măt ndrel jŏ jong, tâm rgop ngăn đah nau nchrăp 5 năm lvang năm 2021-2025 hŏ geh Quốc jội nchră ndrel Bôk nau kan rgum mpeh nau njrăng, rdâng rsê Covid-19. Kruanh Quốc hội Vương Đình Huệ, ngơi:

            ‘Nau ntrŭnh bah Quốc hội jao ân chính phủ, ăp n’gâng kan, ntŭk kan Trung ương ndrel nkuăl tĭng nau dơi, nau kan ntrŭnh ƀư nau ntrŭnh aơ, ntô̆ n’hao nau kan nŭih dâk bôk tâm nau rđau kan, đă ƀư, ntrŭnh kan ân geh đăp mpăn tâm di ntrong kan, nkô̆ nau, mbơh kloh, săk tam ndrel geh nau dơi, uănh khlay nau mêt uănh, ntĭm mbơh tă bah bôk năp gay mô ân geh nau mô tŏng, nau ndăn sa, sa khâm, mpŭng lir, mô tâm di ndrel ân geh rklaih mhal ăp nau tih, ngăn lah tâm rnôk nau geh jêng têh tâm rnôk gleh khay”.

            Nau ntrŭnh rơh rƀŭn ndal tal bôk năp, Quốc hội gưl XV hŏ ân nau ƀư jêng bah rơh rƀŭn bah Bộ chính trị mpeh bôk nau kan njrăng, rdâng srê Covid-19 lvang năm 2022-2023 ndrel bôk nau kan ndâk njêng ndrel hun hao văng sa. Đah nau ntrŭnh aơ, Kruanh Quốc hội Vương Đình Huệ mbơh, Quốc hội đă Chính phủ, Thủ tướng Chính phủ rđau ăp n’gâng kan, ntŭk kan, ntrŭnh ƀư ân ngăch, ndal ndrel n’hao rnoh geh geh chuh vắc xin ndrel chuh ntop ân nŭih têh, mĭn ân nâp ndrel veh ăp nau ntrŭnh ân tâm di, khoa học gay ma chuh vắc xin ân nŭih tâm dâng 18 năm, ngăn lah kon se. Kruanh Quốc hội Vương Đình Huệ đă:

            ‘Uănh khlay nau ntĭm mbơh, mêt uănh, ƀư rjăp nau mhal, nau rđau, ntô̆ n’hao nau kan tơm, ƀư ân npa nau kan bah săk nơm, ngăn lah nau kan bah nŭih dâk bôk geh tât nau ƀư nau kan, nau kơl an tâm nau ndâk, hun hao văng sa rêh jêng ndrel njrăng, rdâng srê ji, năn saơ, rklaih mhal ăp nau tih sa khâm, mpŭng lir, rgum ân rmôt kan, ndal, rjăp, pơk hvi nau mêt uănh ƀư kloh nau kan geh jao, mĭn, uănh, jao, pă săm ƀŭt ân dŏng, nchră rnoh tăch, mbơh nau, nkoch trêng, rnê nkhôm, ƀư nau kan ê nkra, nâp nâl ndơ kan ndrel nau kan tăch rgâl Kit xét nghiệm Covid-19 bah Công ty Việt Á, ƀư ueh nau kan bah ntŭk kan, êng nŭih geh tât gay ma ƀư kloh ngăn nau bah nau tih”.

            Gay nau ntrŭnh bah rơh rƀŭn ndal tal bôk năp, Quốc hội gưl XV lăp ngăn tâm nau rêh, Kruanh Quốc hội Vương Đình Huệ đă, Chính phủ, Thủ tướng Chính phủ, Uỷ ban Rnâng kan bah Quốc hội, Hội đồng Dân tộc, ăp uỷ ban bah Quốc hội, ăp gưl, ăp ntŭk kan, rmôt kan tâm ntrong kan bah Ngih dak, rmôt kan ntoh măt Quốc hội, ăp ntoh măt Quốc hội ndal ntrŭnh ƀư nau kan ân ngăch, năn ăp Luật, nau ntrŭnh mhe geh nchră ơm ƀư ân tam ndrel lăp tâm nau rêh, rklaih nau kan “Bôk năm gel rmah, dŭt năm ndrât ndal”.

            Kruanh Quốc hội Vương Đình Huệ ân lah, đah nau ƀư geh nau dơi bah rơh rƀŭn tal bôk năp, nơm ân geh ăp nau dơi gay ăp rơh rƀŭn tât ân jêng nau kan “ueh nâm ơm” bah Quốc hội gay tŏng dơi năn ăp nau ŭch năn ndrel nau njăch ndal bah nau kan. Nau nuih ndrel nau tă geh bah rơh rƀŭn ndal tal bôk năp, Quốc hội gưl XV njêng ăp nau kan mhe, nau tât mhe, ndrel nau ntrŭnh mhe geh ƀư, nau rđau kan rjăp ngăn bah Chính phủ, nau lăp kan bah ăp gưl, ăp ntŭk kan ndrel lam ntrong kan Chính trị, nau kơl an, tâm ban nuih n’hâm bah ƀon lan, nsum mpôl ntŭk kan, phung he rnơm mra ƀư ân dơi nau geh jêng bah nau kan hun hao văng sa, rêh jêng năm 2022 ndrel lôch năm 2021-2025, neh dak mra lŏ ƀư hun hao nâp nâl, nau rêh ƀon lan mra geh n’hao prêh, nau rnơm bah ƀon lan mra geh ƀư nâp nâl lơn./.

                        Nŭih rblang: H’Thi