Tâm nar mâp tâm nkuăl Đơn Dương, cử tri nkuăl Đơn Dương ntoh nau rhơn bah năp nau geh dơi ma neh dak, nkuăl geh dơi tâm rơh rlau aơ. Ngăn lah tâm nau kan njrăng rdâng sa khâm geh âk nau dơi, ân saơ nau ƀư rjăp ngăn bah Đảng, Pháp luật Ngih dak. Tĭng nau mbơh tâm ăp rnôk mâp, tâm 9 khay bôk năm 2023, nau kan njrăng, rdâng sa khâm tâm Lâm Đồng hŏ geh âk nau dơi ueh. Lam n’gor ƀư 129 nau mêt uănh hành chính ndrel bơi tât 1.500 nau mêt uănh. Bah nau mêt uănh hành chính, hŏ saơ nau tih đah 7,8 rmen prăk; ntrŭnh ƀư nau sŏk kân lơi nau ntrŭnh mhal hành chính rnoh prăk 10 rmen, đă rgâl, rklaih ăp nau kol, nau ê dơi, rklaih nau tih tĭng nau ntrŭnh. Bah nau uănh, geh 11 nau tih sa khâm geh mhal tĭng nau ntrŭnh, geh 18 nau tih geh tât nau sa khâm ntơm năm ơm tât năm aơ. Cử tri đă rgâl Luật neh ntu ân geh ƀư rjăp lơn, tâm di ma nau bah ăp nkuăl, nkuăl gay leo nsĭt dơi săk tam ueh ân ƀon lan, Mpeh ngih vâl gung trong, đă n’hao nau mât, nau kơl mpeh nau kan njrăng rdâng mih dak lip tâm yan mih tât.

Tâm nar mâp, ăp nai ntĭm, sinh viên Ngih săm ƀŭt Đại học Đà Lạt đă âk nkô̆ nau geh tât ntĭm nti, pă prăk khay, nau kơl an nai ntĭm, pă kan pah ân sinh viên jêh lôch nti, nau trok prăk ƀư ăp nau kan khoa học...hôm mâp âk nau jêr ndrel nkol. Tâm nê, nau ngăn lah sinh viên, nŭih mĭn ƀư nau kan uănh ŭch tât nau kan khoa học tâm nê dôl geh n’huch hô.

 Tĭng wa Lê Minh Chiến, Hiệu trưởng ngih săm ƀŭt Đại học Đà Lạt, rơh săch kon se nti năm aơ, Ngih săm ƀŭt Đại học Đà Lạt rgum geh 2.800 sinh viên tĭng nti ăp nau kan, tâm nê sinh viên, nŭih nti tĭng ăp nau nti Đại học ndrel jêh lôch đại học đah nau kan Khoa học kơt lah Toán, Lý, Hoá...geh rnoh mô âk, mô lah gưl nti knŭng geh 2-3 nŭih đăng ký tĭng nti. Nkô̆ nau yor nau kan kơl an bah Ngih dak đah nau kan aơ ê tŏng njêng n’hâm, bonh đă nŭih ƀư:

‘Đảng, Ngih dak, Chính phủ ndrel Quốc hội ân geh uănh kơl an âk lơn đah ăp nau kan ân cán bộ, nau ntĭm, nŭih mĭn njêng ndrel sinh viên geh nau dơi tâm kơt rnôk aơ ân nau kan ntĭm nti sư phạm. Nau kan sư phạm rnôk aơ êng geh nau kơl mô geh sŏk prăk nti ri rnoh kơl an tâm rnôk gŭ nti kŏ geh âk lơn đŏng đah du hê cử nhân mhe lôch nti”.

 Geh ntoh măt đă ân geh pơk hvi rnoh tơm prăk hun hao khoa học neh dak, der nau nchlơi nau mĭn khoa học, mô rgum ndrel ndâk nau blau khoa học tâm mrôt nŭih blau, uănh ntoch tay năm ân rlu ranh ân nai ntĭm đại học, tâm nê, geh Ngih săm ƀŭt Đại học Đà Lạt. Yor tâm nau ngăn, lah ŭch ntoch jong năm kan ân geh bằng Giảng viên cao cấp, tâm rnôk ân geh dơi bằng cao cấp ri năm ƀư nau kan mô mô hôm, aơ lah nau ngăn lah tâm nkuăl Tây Nguyên, miền Tây Nam Bộ kŏ mâp nau jêr. Âk cử tri lah sinh viên đă mpeh nau pă tơm prăk ân nau kan sư phạm lah mbrơi ngăn rđil nau ŭch ngăn, đă mpeh nau ntĭm nti nau kan ân sinh viên, ngăn lah đah ăp kon nŭih rnoi mpôl đê̆ yor rnôk aơ lôch nti Đại học âk sinh viên mô geh kan pah, nau rêh mâp nau jêr. Ntoh măt rmôt kan Quốc hội Lâm Đồng, wa Phan Đình Trach kơp dơn ăp nau đă bah cử tri, nkre mbơh mra geh nau mbơh tât Quốc hội tâm rơh rƀŭn tal 6 dăch tât:

‘Mhâm ƀư gay ăp oh kon se nti ŭch ma nau mĭn khoa học, gơih tâm ăp nau kan khoa học ndrel ăp nai ntĭm nti khoa học kŏ geh nau gơih đŏng. Mhâm ƀư ăp nau gơih nê, nau ŭch nê kŏ ân geh nsing tâm ăp nau dơi gay ma đăp mpăn nau rêh ngăn, lah mô nơm mra mô geh nau dơi. Aơ lah nau mĭn njêng bah Ngih dak, ngih dak ân geh ƀư”.

Kruanh Ban Nội chính Trung ương kŏ nkah đah n’gor Lâm Đồng ndrel nkuăl ƀon têh Đà Lạt rgum djăt nau đă ăp ntil, ueh, ân geh ăp nau mĭn njêng khoa học ngăn geh tât nau kan rluh neh, yôk, ngih gŭ, geh tât nau ƀư, nau rgum bah nkual ƀon têh Đà Lạt tâm rơh rlau aơ. Nau ntrŭnh ƀư jut lơi ngih bil tâm nau kan tuch tăm, ntrong kan mât, ƀư ueh nau ơm bah ngih vâl, nau kan mât njrăng bri tơm n’ho, hun hao văng sa văng sa nâm neh bri...Rnôk aơ, wa Phan Đình Trạc ndrel rmôt kan ntoh măt Quốc hội n’gor Lâm Đồng hŏ pă 20 nklâm prăk, du nklâm rnoh 10 rkeh ân sinh viên Ngih săm ƀŭt Đại học Đà Lạt geh nau rêh jêr jŏt yơn hŏ nsôih rlet hao nau dơi prêh tâm nau kan ntĭm nti./.