VOV4.M’nông: Pơh rlau aơ, rmôt kan mêt uănh bôk nau kan bah rmôt ntoh măt Quốc hội n’gor Dak Lak hŏ ntơm mêt uănh nau kan tâm Sở Tài nguyên ndrel Môi trường mpeh nau ƀư nau kan, pháp luật mpeh nau ƀư têm nkrem, njrăng mpŭng lir. Tâm nar pah kan, rmôt kan mêt uănh hŏ đă n’gâng kan aơ ƀư kloh du đê̆ nkô̆ nau khlay, tâm nê nau kan hao khlay neh tâm n’gor tâm rơh rlau aơ, lơh khuch nau jŏ jong.

            Bah năp nau hao khlay ndal bah neh, ƀư jêng nau hao ngăn tâm rơh rlau aơ tâm ăp nkuăl gay ma nchrăp ƀư ăp nau kan têh tâm nkuăl ƀon têh Buôn Ma Thuột ndrel ăp nkuăl êp nê ƀư nŭih ƀon lan mô geh pah kan jan sa. Ngăn lah, âk nŭih rnoi mpôl đê̆ tăch lơi neh mir nơm. Wa Nguyễn Thị Xuân, Ntoh măt Quốc hội n’gor Dak Lak lah:

            ‘Ăp rnăm rlau aơ n’gor uănh khlay nau nsôih rđau đă nau kan pă neh gŭ, neh tuch tăm ân nŭih rnoi mpôl đê̆. Yơn lah, bah nau hao khlay neh mô ngăn geh rnôk aơ ri jêh lôch pe puăn năm đŏng mra  lơh nau khuch ngăn rnôk nŭih ƀon lan mô geh neh gŭ, neh tuch tăm. Rnôk nê nơm ntŭk sŏk neh gay ma pă ân ƀon lan”.

            Tĭng wa Trần Đình Nhuận, Giám đốc Sở Tài nguyên ndrel Môi trường Dak Lak, kơp tâm 3 khay bôk năm 2022, rnoh ƀư nau kan tăch rvăt neh tâm n’gor hao, đah 103 rbăn tơ̆, hao bơi tât 200% rđil rơh aơ năm e. Rnoh neh hao khlay rđil đah năm 2021. Geh nau rgâl mhe têh mpeh nŭih tăch ndrel nŭih rvăt, nŭih rvăt tă bah Nkuăl ƀon têh Hồ Chí Minh, Hà Nội sĭt êp nkuăl ƀon têh Buôn Ma Thuột rvăt neh gŭ. Wa Nhuận kŏ kơp dơn ăp nau ƀư kan mô nâp tâm nau mât neh ntu,k ngăn lah nau ân ntrơn rgâl dŏng neh tâm ăp nkuăl mô tŏng ndơ dŏng, ngih vâl, ân ăp nŭih mô geh nau ŭch ƀư ngih gŭ. Êng nê, pháp luật mpeh ntu ntu hôm kol, nau ntrơn rgâl nau dŏng neh ân ƀon lan ƀư ngih mô tâm di rnoh kan, mô tâm di nau ntrŭnh dơi, rnoh tăch neh bah ngih dak ntrŭnh mô geh tĭng rnoh tăch rnôk aơ.

            Nau kan hao khlay neh njêng luh 4 nau tât mô geh, geh: Jêr râm nau ƀư ndrel mât nau rgum, ntrơn ntŭk, trok prăk dŏng neh, phong dôih, tâm rkeh hao âk, roh hoach mpeh nau geh soay rnôk tăch rgâl neh, du gưl rêh đŏng tâm nŭih rnoi mpôl đê̆ saơ neh hao khlay ri tăch jêh ri dŏng prăk mô tam, roh neh ƀư mir, roh kan pah...Bah năp nau aơ, Sở Tài nguyên ndrel Môi trường hŏ geh nau ntrŭnh nchră nau ân UBND n’gor rđau ăp nkuăl nkân uănh rjăp nau ntrơn rgâl nau dŏng neh. Wa Trần Đình Nhuận, ngơi:

            ‘Phung hên kơl nchră nau mpeh ăp nau ntrŭnh gay ma ntrơn rgâl, rđau đă ăp nkuăl ân nâp mpeh nau ntrơn rgâl nau dŏng neh, mbơh ân nkô̆ nau dŏng neh đah neh ntu tuch tăm  geh nsum tâm nkuăl ƀon lan hŏ geh tŏng ngih vâl gung trong ndrel ân nŭih ƀon lan geh nau ŭch ngăn. Hôm tâm nkuăl êp nê rgum nau kan đô thị mhe, ƀon lan mhe ân geh ƀư tĭng nau kan geh ân ƀư ndrel tĭng nau ntrŭnh bah pháp luật”.

            Giám đốc sở Tài nguyên ndrel Môi trường n’gor Dak Lak Trần Đình Nhuận kŏ mbơh geh 6 nkô̆ nau geh tât nau hao khlay neh, kơt: Nua khuch bah nau rgum dŏng neh tâm lvang năm 2021-2030, khuch ngăn ntơm bah ăp nau kan tơm geh trung ương ntuh kơl, geh nau khuch tât nau rgum hao đô thị, khuch ngăn bah srê Covid-29, hao khlay ndơ, tâm rkeh ndrel nau mĭn bah âk nŭih. Êp nê, nŭih ntuh kơl ân geh uănh tât nroh mrô bah ntŭk ntu ueh bah n’gor gay ma ndâk ntŭk rlu n’aih.

            Rơh rlau aơ, UBND n’gor Dak Lak kŏ geh âk nau ntrŭnh rđau, kơp n’ăp ma nau jao ân ntŭk kan công an ƀư kloh ăp nŭih ƀư n’hao rnoh khlay neh ndal gay ma geh sa bah nơm. Rđau UBND nkuăl, nkuăl ƀon têh nkân rjăp ngăn nau ntrơn rgâl nau dŏng neh. Lŏ đă rgâl rnoh neh gay ma nkhah neh tuch tăm tĭng trong tâm nkuăl ƀon têh ri 1000m2 hao gŏ lơ, nkuăl ri 2000 m2 hao gŏ lơ. Ndrel ma nê, jao ân ăp ntŭk kan geh tât gay ma mĭn gay rnoh neh ngih dak ntrŭnh tâm dăch ma rnoh tăch, công chứng rvăt neh tâm tâm dăch ma nau ngăn.

            Rmôt kan ntoh măt Quốc hội n’gor Dak Lak đă, Sở Tài nguyên ndrel Môi trường n’gor Dak Lak gay ma n’hao nau nkoch trêng, mbơh pháp luật gay ma ƀư nau têm nkrem, rdâng nau mpŭng lir ân geh săk tam. Nkre, uănh khlay nau mât tơm prăk ngih dak, nŭih pah kan, drăp ndơ tâm di nau ntrŭnh, đăp mpăn dŏng, ƀư ăp neh ntu, lŭ choih, tơm dak ân geh đăp mpăn nâp nâl./.

                        Nŭih rblang: H’Thi