VOV4.M’nông: Nar aơ, ta Thủ đô Hà Nội geh ntơm rơh rƀŭn tal 3, Quốc hội gưl 15. Nchrăp nar pah kan bah Quốc hội rơh aơ lah 20 nar, mra lôch tâm nar prăm, lơ 17/6/2022. Rơh rƀŭn mra nchrăp ăp mpeh nkô̆ nau, tâm nau dơi ƀư ueh ăp nau mhe hŏ geh kơt tĭng săk tam bah ăp rơh rƀŭn bah năp nê, rgum uănh âk nkô̆ nau khlay bah neh dak. Bah năp nar rƀŭn, ăp nkuăl hŏ geh ƀư âk nau mâp cử tri gay ntoh măt Quốc hội dĭt nau ŭch bah ƀon lan.

            Ta rơh rƀŭn tal 10, đah nau ƀư tơm bah Kruanh Quốc hội Vương Đình Huệ, Uỷ ban Rnâng kan Quốc hội rgop ngăn mpeh nau nchrăp rƀŭn tal 3, Quốc hội gưl 15, geh rƀŭn, nchrăp nkô̆, nchrăp nau kan, nar ntơm rƀŭn, nar lôch rƀŭn, nau nchrăp, mât đăp mpăn njrăng srê, nkoch nau mpeh rơh rƀŭn. Tĭng nau kan, ta rơh rƀŭn tal 3, Quốc hội mra uănh nchră 5 nau nchrăp luật, 4 nau nchrăp kan geh: Luật Cảnh sát cơ động, Luật Điện ảnh (rgâl nkra), Luật ƀư tăch rgâl bảo hiểm (rgâl nkra), Luật tâm rlong, rnê nkhôm (rgâl nkra), Luật rgâl nkra, ntop tay du đê̆ điều bah Luật Sở hữu trí tuệ, Nau ntrŭnh rlong ƀư nau pah kan, ntĭm kan, nti kan ân nŭih tih geh gŭ ndrung, Nau ntrŭnh ndâk luật, pháp lệnh năm 2023, rgâl Bôk nau ndâk njêng luật, pháp lệnh năm 2022; Nau ntrŭnh nkô̆ rơh rƀŭn Quốc hội (rgâl nkra), Nau ntrŭnh rlong nau kan, hun hao n’gor Khánh Hoà.

            Quốc hội mra rgop nau mpeh 6 nau nchrăp lụật, geh: Luật dak pring (rgâl nkra), Luật njrăng rdâng nau tâm lơh tâm rnăk vâl (rgâl nkra); Luật Thanh tra (rgâl nkra), Luật ƀư ƀon lan ƀư tơm tâm dâng, Luật rgâl nkra, ntop tay du đê̆ điều bah Luật Tần số vô tuyến điện; Luật Khám nau ji, săm ji (rgâl nkra). Mpeh ăp nau kan văng sa, rêh jêng, tơm prăk ngih dak, uănh ndrel ăp nau kan khlay êng, Quốc hội mra uănh ăp nau mbơh ntop tâm nau ƀư nau nchrăp hun hao văng sa, rêh jêng ndrel tơm prăk Ngih dak năm 2021, nau ƀư nau nchrăp hun hao văng sa, rêh jêng ndrel tơm prăk Ngih dak bôk năm 2022. Ân ƀư tơm prăk Ngih dak năm 2020. Uănh nau mbơh mpeh nau têm nkrem, mpŭng lir năm 2021 ndrel du đê̆ nkô̆ nau khlay êng.

            Bah năp rơh rƀŭn, tâm ăp n’gor Tây Nguyên kŏ kơt lah lam dak, geh nau mâp cử tri. Uỷ ban Trung ương Mặt trận Tổ quốc Việt Nam mbơh rgum nau, đă cử tri ndrel ƀon lan njoăl tât rơh rƀŭn tal 3, Quốc hội gưl XV. Uỷ ban Rnâng kan Quốc hội mbơh nau tă geh mêt uănh nau rklaih nau đă  bah cử tri njoăl tât rơh rƀŭn tal 2, Quốc hội gưl XV.

            Cử tri Tây Nguyên đă ăp ntoh măt Quốc hội âk nau kan jêr, kol geh n’gor, nkuăl ndrel Trung ương kơl rklaih. Nê lah, nau ƀư rgum, hun hao ngih vâl, gung trong hăn dôl mbrơi, nau kan hành chính kol, ngăn lah geh tât nau pă, nkra mhe săm ƀŭt kơp dơn dŏng neh, ntrơn ntŭk gŭ, trok nau nkra ntŭk kan nsum hôm kol, mbơh nau kan ntŭng kăl si, in neh hao âk, nau njrăng sa khâm mpŭng lir geh rnôk hôm rklaih ê nâp; nau kan tâm lơh tâm rnăk vâl, kon se nti hao âk...Du nau kan geh cử tri mbơh âk ngăn lah rnoh ndơ hao khlay. Tâm nê, ndơ dŏng ân kan tuch tăm hao khlay, rnôk ma ndơ tăch ri mô khlay, ƀư ntŭk tăm byăp âk ri mâp nau jêr, Cử tri Phan Trùng Châu, tâm thôn Nghĩa Hiệp 2, xã Ka Đô, ntoh nau:

            ‘Rnôk aơ ndơ dŏng ân nau kan tuch tăm ri tăch khlay, kơt lah du ƀao phân tăch 1.350 rbăn/ƀao, rnôk ntơm knŭng 950 rbăn/ƀao dơm, tâm rnôk byăp ăp ntil tâm aơ tăch rnoh thuk, rnoh tăch mô đăp mpăn. Đă gưl kan ba lơ mhâm ƀư gay phân poh ta aơ geh đăp mpăn nroh ân ƀon lan geh nau rnơm, nau sa”.

            Tâm Dak Lak, tâm nar pah kan đah ntoh măt Quốc hội n’gor Dak Lak đah UBND n’gor ndrel ăp n’gâng kan, ntŭk kan gay nchrăp nkô̆ nau râng rƀŭn  tal 3, Quốc hội gưl 15, âk nau đă geh tât nau kan hun hao văng sa bah nkuăl geh ntop tâm nau mbơh Quốc hội. Kơt nau kan hun hao ŭnh nar ndâk tay Dak Lak geh sial ndrel nar ri ma nau rƀĭng hun hao ŭnh ndâk mhe tât năm 2045. Chính phủ, N’gâng kan Công thương ân geh uănh rgâl, n’hao nau dơi gay hun hao tâm Dak Lak. Wa Vũ Đình Trung, Groi Giám đốc Sở Công thương Dak Lak, đă:

            ‘Tât năm 2045 nau dăng điện ŭnh nar geh nklăp 41%. Ndri ma Dak Lak đă ntơm 10.000 tât 15 rbăn MW lah dơi. Gay hun hao ŭnh nar ndâk njêng ri ân geh âk neh ntu, ngih vâl trong điện geh âk trong rse 500 KV ndrel trạm 500 KV ra aơ. Ndri ma nau kol mpeh nau dăng ta aơ nơm mô rvê”.

            Du nau kan geh ăp ntoh măt đă Quốc hội uănh nchră tâm rơh rƀŭn aơ lah Luật Bảo hiểm xã hội rgâl nkra. Tâm nê geh nkô̆ tât nau kơl an mpeh nau khuch rmanh tâm rnôk pah kan ndrel roh kan pah. Wa Nguyễn Khắc Tuấn, Giám đốc bảo hiểm xã hội n’gor Dak Lak ân lah, rnôk ƀư nau kan geh tât nkô̆ aơ hôm ê tâm ban, ê geh ueh:

            ‘Rnôk aơ rklaih bảo hiểm roh kan pah ri đah mpeh ntŭk ƀư pah kan ƀư. Mpeh đah bảo hiểm xã hội knŭng sŏk ndrel dŏng. Nau khuch rmnah pah kan rnôk nơm kan ri Bảo hiểm pah kan kŏ dôl rklaih yơn lŏ ntrŭnh tâm Luật kan pah ri kŏ hôm kol. Ndri ma ŭch ăp ntoh măt geh nau blau rgum blau lơn tâm Luật bảo hiểm rgâl nkra mhâm ƀư pơk trong nơih ueh ngăn ân nŭih pah kan ndrel nŭih ƀon lan rnôk ƀư nau kan bảo hiểm xã hội”./.

            Nŭih rblang: H’Thi