VOV4.M’nông: Pơh rlau aơ, ta Ngih kan Quốc hội, geh rơh rƀŭn tal 9 bah Uỷ ban Rnâng kan Quốc hội. Rơh rƀŭn rơh aơ geh pă jêng 2 rơh đah 7 nar ma n’gul. Nau ngăn lah, tâm rơh rƀŭn aơ, Uỷ ban Rnâng kan Quốc hội dŏng du nar gay ma pah kan ôp ndrel ơh nau ôp bah ntoh măt Quốc hội đah 2 nŭih kan Chính phủ. Jêh rƀŭn, pơh rlau aơ, Uỷ ban Rnâng kan Quốc hội rgop tâm nau nchrăp Pháp lệnh mbơh tâm ban, uănh, ntrŭnh leo nŭih mơng dŏng ma tuý ntơm tŏng 12 năm tât tâm dâng 18 năm lăp ntŭk mât nkah nchâp đă, ndrel du đê̆ nkô̆ nau khlay êng.

            Ntoh nau tâm nar rƀŭn, Kruanh Quốc hội Vương Đình Huệ mbơh: Uỷ ban Rnâng kan Quốc hội hŏ ƀư nau kan ndrel sŏk nau rgop bah 6 nkô̆ nau. Nsing tâm phiếu tă geh yơr ty ntrŭnh 2 rmôt nau kan ôp Kruanh n’gâng kan Công thương Nguyễn Hồng Diên ndrel Kruanh n’gâng kan Tài nguyên ndrel Môi trường Trần Hồng Hà. Nkô̆ ôp Kruanh n’gâng kan Công thương rgum nau nkra, tăch dak pring xăng, nau rgâl rnoh tăch tâm rơh lau aơ. Nau mât ntŭk tăch, njrăng, rdâng nau tăch ntŭng, rlăm, mô nâp, mô kloh tu tơm...Kruanh n’gâng kan Tài Nguyên ndrel Môi trường Trần Hồng Hà ơh nau mpeh nau ƀư nau ôp ndrel uănh nkô̆ nau geh tât nau rgum, mât, dŏng nẹh ntu đô thị. Nau kan ndrel nau njrăng rdâng ăp nau tăch neh ntu đah rnoh klhlay gay ma ntrŭt ntrôl rnoh tăch bah ăp ntŭk êp nê gay ma geh êng săk nơm. Kruanh Quốc hội Vương Đình Huệ, ngơi:

            ‘Ndrel ma nau ntrŭnh, uănh nkô̆ nau gưl prêh bah Quốc hội ndrel Uỷ ban Rnâng kan Quốc hội ri ăp nau tât ngăn bah nau kan ôp ndrel ơh nau ôp hŏ lah rjăp aơ lah nau kan sŏng, săk tam bah Quốc hội, rgop nau ƀư rêng nau blau nau kan mhe tâm nau nsôih pah kan mêt uănh ndrel ƀư nau kan bah Quốc hội, uănh ngăn ndrel lah n’hâm bah nau rêh, tŏng dơi nau ŭch bah ƀon lan dnrel cử tri đă ndâk njêng Ngih dak pháp quyền xã hội chủ nghĩa bah ƀon lan, yor nau kơl an ƀon lan”.

            Rơh ôp ndrel ơh nau ôp tâm lơ 16/3, geh ƀư ta ngih rƀŭn Diên Hồng Ngih kan Quốc hội ndrel nthoi sŏng đah 63 rmôt kan ntoh măt Quốc hội ndrel âk mpưm cử tri ndrel ƀon lan uănh djăt.

            Kŏ tâm pơh rlau aơ, jêh rnôk geh rơh rƀŭn tal 9, Uỷ ban Rnâng kan Quốc hội tâm ban nau ntrŭnh pháp lệnh mpeh nau ƀư, uănh nau kan leo nŭih mơng dŏng ma tuý nytơm tŏng 12 năm tât tâm dâng 18 năm lăp ntŭk nchâp njrăng đah aơư nŭih: Nŭih mơng su ma tuý mô đăng ký, mô ƀư mô lah dah rŏng mô ât, nŭih mơng dŏng ma tâm rnôk njrăng nkân lŏ saơ geh dŏng tih dôih ma tuý; nŭih mơng dŏng ma tuý kơt ăp ntil hât rƀên mô đăng ký, mô ƀư mô lah mô hôm ŭch săm ât.

            Yơn lah, tĭng ăp ntoh măt, nŭih geh rgâl bah nau nchrăp Pháp lệnh lah nŭih mơng dŏng ntơm 12 năm tât tâm dâng 18 năm ndrel leo lăp ât mô di lah nau mhal hành chính, ri ân geh ntoh nau kan aơ, nau kan geh ƀư nơih, tâm di ndrel đăp mpăn nau ŭch geh ueh êng bah nŭih geh đă. Kruanh Uỷ ban neh dak- đăp mpăn bah Quốc hội Lê Tấn Tới, lah:

            ‘Geh ăp nŭih mô geh nhih vâl, rnôk uănh tât săm ƀŭt bah săk nơm, băl mpôl ri jêr, mô geh nkoch tât ôh nau ƀư tih, nau kan tih, ma nŭih tâm dâng 18 năm. Gâp rvê ngăn tâm nau ngăn, rnôk ƀư nau kan, uănh năl nŭih hăn ât su, bu lah “kon gâp đăng kí ât su ŭch êng nơm” ri ƀư nau kan kơt nê ri roh n’hâm nơm ƀư. Aơ lah nau tih tâm nau kan dôl ma geh gay ma ăp bu nê ndăn nsing”.

            Tâm nar rƀŭn, Kruanh n’gâng kan Trần Văn Thuấn ân lah: mơng su ma tuý lah nau ji jâk bah rngok geh WHO kơp dơn lah nau ji ma ê geh dak si săm bah. N’gâng kan dak si pă nŭih mô đăng kí ât dŏng tĭng nau ntrŭnh bah pháp luật ma tâm rnôk ngih phat dôih uănh ntrŭnh leo đă nchâp ât, mô lah me mbơ̆ nŭih kơl uănh ân bah nŭih geh mơng su đăng kí ât su ma tuý ŭch êng.

            Tâm rơh 1 aơ, Uỷ ban Rnâng kan hôm geh nau rgop êng mpeh nau mbơh bôk năp bah rmôt kan mêt uănh tĭng nkô̆ dăp rgum bah ntŭk kan hành chính gưl nkuăl, gưl xã tâm lvang năm 2019-2021”. Mbơh nau tă geh bôk năp bah rmôt kan tĭng nkô̆ “ƀư nau kan pháp luật mpeh nau lŏ vơt ƀon lan ndrel rklaih nau phong dôih ntơm lơ 1/7/2016-1/7/2021”.

            Êp nê, tâm rơh rƀŭn aơ, Uỷ ban Rnâng kan Quốc hội hôm  rgop mpeh nau mbơh bah Chính phủ mpeh nau lôch, nchră lĕ nau dôl geh ƀư nau ntrŭnh ntuh kơl ndâk trong Hồ Chí Minh, uănh ntop tơm prăk ngih dak tâm tơm prăk kơl an bah Trung ương năm 2021 tât năm 2022, rgop nau mpeh nau nchrăp ntuh kơl nsum jong năm lvang năm 2021-2025 ân ăp nau kan, ăp tơm prăk ê geh ntop./.

                                                Nŭih rblang: H’Thi