Ntrong kan mât djăr m’ơk lêng bah rnăk wa A Lăng Trí ta thôn Đắc Ốc, xă La Dê, nkuăl Nam Giang, n’gor Quảng Nam dơi cán bộ tahen mpeh tâm pôih tahen n’har bri mpông n’har bri Nam Giang ntĭm mât bah năm 2018 tât aƀaơ. Knơm dơi ntĭm ăp kỹ thuật mât rong jêh ăp rơh, wa Trí tăch geh nklăp 3 rkeh prăk n’hanh jêng ntŭk geh prăk đăp mpăn an rnăk wâl:

“Rnăk wâl nar lơ đăp mpăn lơn, ta aơ tahen đah Ủy ban he tâm rgop nsum nkoch trêng mpeh ndâk njêng ntrong kan mât rong đah kônh wa, nar lơ pơk hvi”.

Năm bah năp, Pôih tahen n’har bri mpông n’har bri Nam Giang lĕ tâm rgop đah gưl ủy n’gâng kan xă La Dê ntrôl dăng nău nkoch trêng, ntĭm nuĭh ƀon lan rgum hun hao wăng sa. Tât aƀaơ ntrong kan tăm prit ta 2 thôn Kông Tơ Rơn n’hanh Đắc Pênh wăch rgum tât râng bah 30 rnăk. Tĭng đại úy Nguyễn Minh Vương, chính trị viên groi pôih tahen n’har bri mpông n’har bri Nam Giang:

“Tâm năm bah năp cán bộ tahen pôih tahen n’har bri lĕ ƀư ăp ntrong kan kơl ƀon lan n’hanh tât ntĭm ƀon lan ƀư tĭng ăp ntrong kan kơt hun hao wăng sa nkual n’har bri, rgŏ jă ăp nuĭh lŏng bôk tôr, ntop kơl nău rêh an ăp rnăk, Rmôt ƀon lan kan lŏ mir, Rmôt bu ur, tâm năm mhe rlău ri nău wât bah ƀon lan ta nkual n’har bri geh nău wât âk lơn tâm nău hun hao wăng sa tĭng rnăk wâl”.

Nuĭh dŏng râng nar rgum “Ntô̆ n’hao ndơ lŏ mir Quảng Trị”.

Đah nău ntop kơl bah tahen n’har bri, nău rêh bah nuĭh ƀon lan ntŭk n’har bri nâp nâl rjăp lơn. Trung tá Đỗ Hoàng Minh, chủ nhiệm chính trị Tahen n’har bri n’gor Quảng Nam an gĭt:

“Mpeh hun hao wăng sa văn hóa rêh jêng geh ăp ntrong kan dŭt săk rnglăy, rgop rgâl, n’hao nău rêh, rgâl nău kan kơt ăp ntrong kan mât xin deh kon mô lah tăm tơm đẳng sâm xă Ga Ri, xă Trà Ơn bah nkuăl Nam Giang, ntrong kan mât rong ndrôk deh kon bah xă Chơ Chun nkuăl Nam Giang n’hanh âk ntrong kan êng gay nkoch ăp nău jêr jŏt an ƀon lan, tă bah ăp nău kan nê̆ nĕ lĕ rhăt jăp tay nău tâm rnglăp tahen ƀon lan, nta n’hâm soan tâm rgop nsum râng mât njrăng ƀư tơm neh ntu rnă njrăng n’har bri neh dak”.

Gay hun hao wăng sa nuĭh ƀon lan nkual n’har bri, Ntŭk ntrŭt nsôr pah kan lŏ mir Quảng Trị lĕ mbơh ntrong kan nông lâm tâm rgop ta thôn Cheeng, xă Hướng Phùng, nkuăl Hướng Hóa đah rnoh neh 2,2 ha. Ntrong kan tăm mhe ƀư bah khay 8 năm 2021, geh 3 rnăk râng, lĕ ntơm an geh săk rnglăy.

Đah ntrong kan lŏ mir mât tăm bri tâm rgop, ăp ntil tơm ndơ̆ an ntrong kan lah tơm lát nkao, tơm bơ 034, tơm sầu riêng, tơm mít thái, tơm đinh lăng. Gay ƀư ntrong kan, cán bộ kỹ thuật lĕ tiăr nti, ntĭm kỹ thuật ƀư neh lĕ rngôch, mkra vôi n’hanh phân poh vi sinh, tâm rgop poh tay lân n’hanh ăch ndrôk gay tăm tơm tĭng di kỹ thuật. Tĭng wa Văn Ngọc Khánh, nuĭh ƀon lan thôn Cheeng, xă Hướng Phùng, nkuăl Hướng Hóa, n’gor Quảng Trị:

“Tâm rnôk mbơh ƀư an gâp ƀư ri gâp saơ hun hao dŭt uĕh, gâp đă ntŭk kan ntop kơl an tŏ dak poh phân, mât chăm mbŭ tơm m’hâm ƀư. Du đêt jay êng ri gâp saơ dŭt săk rnglăy lơn”.

Jêh 1 năm mbơh ƀư ntrong kan lĕ saơ na nê̆ tâm di âk, rnoh rêh kơt dơi têh jêng hun hao uĕh. Ăp ntil bơ 034, mít thái, lát nkao têh jêng hun hao uĕh, rnoh rêh âk 95%, tơm dôl tâm lvang sra n’ging. Aƀaơ cán bộ kỹ thuật ntĭm đă tay ăp rnăk trong mât chăm, njrăng n’gang tu ndrŭng phah. Wa Phan Ngọc Đồng, Groi kruanh Ntŭk kan ntrŭt nsôr pah kan lŏ mir Quảng Trị an gĭt:

“Tă bah ntrong kan gay n’hao khlay hao ta du ntŭk neh dŏng, tâm khay tât, mpôl hên mbra mbơh ƀư tay ăp ntrong kan ƀư kơt aơ ta ăp xă êng n’hanh tă bah ntrong kan mbra du gưl gay ntĭm an nuĭh ƀon lan rƀŏng tât du trong mkra đăp mpăn nâp nâl n’hanh n’hao rnoh khlay dŏng neh an kônh wa kơt đăp mpăn nău rêh”.

Nău mbơh ƀư ntrong kan tâm rgop đah nău âk ntil mpeh ndơ luh an tăch tâm rnôk êng êng mbra nsĭt tay săk rnglăy n’hanh an nău geh âk an ƀon lan. Bah meng nĕ, rƀŏng trong tăm nâp nâl ta neh yôk đah trong ƀư lŏ mir mât tăm bri tâm rgop geh nkô̆ dŭt khlay đah ăp nkual yôk. Tâm nău rgâl trôk nar nar lơ hô kơt aƀaơ ri lŏ mir mât tăm bri tâm rgop lah ntrong kan hun hao geh trong nâp nâl.