VOV4.M’nông- Ƀư tĭng nău pă mât uănh bri an rmôt rnăk, ntŭk rêh jêng ƀon lan bâh UBND n’gor Kon Tum ta năm 2014, rlău 200 rnăk ƀon lan ta 6 ntŭk rêh jêng bâh ƀon lan gŭt ta xã Đăk Roong, nkuăl Đăk Glei lĕ dơn mât uănh rlău 1.100 ha bri. Bâh geh nsrôih mbơh ƀư nău kan mât uănh, rnoh neh bri dơn mât uănh way geh mât kơt ơm, nđâp ma ta rnôk nuh srê Covid-19 ntoh luh âk.

  Thôn Đăk Bo, xã Đăk Roong geh 38 rnăk ƀon lan dơn mât uănh bri, đah bơi tât 300ha bâh Tiểu khu 106 xã Đak Ro ong bâh năm 2014. Wa A Chương- kruanh rnâng kan mât uănh bri thôn Đăk Bo nkoch, bâh ntơm bri geh pă mât uănh an ntŭk rêh jêng, ƀon lan geh njêng 12 rmôt uănh nđôi, mât, rnoh bri geh mât kơt ơm. Nđâp ma ta rnôk nuh srê Covid-19 ntưp rêng âk, nău uănh nđôi, mât bri hôm nha geh mât kơt ơm. Nău muĭh kăl bri, rŭn in neh bri kơt lah mô geh.

  “Tâm năm mhe nơh nuh srê Covid-19 ntưp rêng jêr njrăng, yơn ăp rmôt, mpôl kan uănh nđôi hôm nha geh hăn uănh mât bri. Ăp rmôt mô lah mpôl kan rĭ kanŭng geh pă 3 nuĭh, hăn uănh nđôi khay 3- 4 tơ̆. Rnôk hăn uănh mât bri rĭ an geh ƀư tĭng ăp trong kan njrăng nuh srê tĭng trong kan 5 K kơt lah: văn bok put mbung, gŭ tâm ƀah ngau, mô hăn âk nuĭh. Lah geh nuĭh ntưp srê Covid-19, mbra đă nuĭh êng ndơn hăn”.

  Tâm ban kơt nĕ đŏng, ntŭk kan mât uănh bri ta thôn Đăk Wăk, xã Đăk Roong geh 37 rnăk kan ndrel, dơn mât uănh rlău 250ha bri hon êng ta Tiểu khu 211 n’hanh 108 bâh năm 2014. Wa A Tùng- nuĭh kan ndrel rmôt kan mât uănh bri ntŭk rêh jêng thôn Đăk Wăk an gĭt, thôn lĕ pă geh 12 rmôt, ăp rmôt kan geh 5 nuĭh n’hanh du mpôl kan uănh nđôi 2 hê mbơh ƀư nău kan uănh mât bri.

Ta rnôk geh nuh srê Covid-19 ntưp rêng âk, ăp rmôt tâm rgâl nuĭh mât kan uănh mât bri. Ndrel đah n’huch rnoh nuĭh kan ndrel ta ăp rmôt mât uănh n’hanh mât đăp mpăn an gŭ nkhah êng, ăp rmôt kan hôm nha geh dŏng điện thoại gay ma tâm ôp ngơi bâh Zalo mô geh tâm mâp sŏng dăng gay ma njrăng nuh srê tâm ntưp. Bâh nĕ, ma nău kan uănh mât bri geh mât kan, nău kan njrăng nuh srê geh mât đăp mpăn.

  “Nuh srê ntoh luh jêr njrăng rĭ mpôl hên kanŭng geh mât du rmôt 2 hê hăn uănh mât bri n’hanh mât đăp mpăn gŭ tâm ƀah. Tiểu khu 211 dăch n’har đah nkuăl têh Đăk Glei mbra geh muih kăl bri âk, thôn pă an du rmôt 2 hê nuĭh ƀa ƀơ tâm pleh mât kâp chăm mât bri. Hôm Tiểu khu 108 rĭ geh ba dâng dăch lơn, mpeh ba lơ thôn mbra dơi geh uănh lĕ rngôch jêng lah dơh geh saơ nuĭh muĭh kăl bri jêng lah đă 2 hê nuĭh tâm pleh hăn uănh nđôi. Mpôl hên lĕ geh njêng mpôl kan ta rmôt Zalo, nar pah kan tâm mbơh ta nĕ, nuĭh sĭt nuĭh hăn mbơh an nuĭh êng mât uănh ndơn”.

    Xã Đăk Roong, nkuăl Đăk Glei aƀaơ geh lĕ dĭng lĕ 6 mpôl ƀon lan gŭ dơn uănh mât rlău 1.100 ha bri hon êng. Tĭng nău mbơh bâh wa A Thông- Kruanh UBND xã Đăk Bo, ntơm nơh rnôk mô hŏ geh nău ntrŭnh pă mât uănh bri an ntŭk rêh jêng ƀon lan mât uănh rĭ nău muĭh kăl bri sŏk si, rŭn in neh bri way geh mbro. Lôch rnôk bri geh pă an ƀon lan mât uănh, bâh ăp rơh mbơh tơih rgŏ jă, njêng ăp rmôt kan mât uănh rĭ rnoh neh bri geh mât kơt ơm. Rlău ma nĕ, rnôk tât râng uănh mât bri, ƀon lan hôm nha geh nkhôm prăk mât bri, bâh nĕ ma nău rêh geh n’hao âk, nău dơn kan mât bri geh ƀư săk rnglăy.

Wa A Thông an gĭt, tâm rnôk nuh srê Covid-19 ntưp rêng jêr njrăng, âk nuĭh way geh săch rnôk aơ gay ma muĭh kăl bri sŏk si mô tâm di, rŭn in neh bri. Ta năp nău ngăn aơ, ăp ntŭk ƀon lan rêh way geh mât ueh ăp rmôt kan uănh mât bri. Gay ma mât đăp mpăn nău kan mât bri tâm ban kơt njrăng rdâng nuh srê an săk rnglăy, nuĭh leo kan UBND xã lĕ ntĭm đă ƀon lan rnôk tât râng uănh mât bri an geh ƀư tĭng jăp nău kan njrăng, rdâng nuh srê Covid-19 tâm ban kơt mbơh ƀư ăp trong kan uănh nđôi mât bri ta rơh mhe.

Nău tât bâh nuh srê Covid-19 hôm nha dŭt jêr njrăng tâm 2 năm mhe nơh, yơn lah đah ăp rmôt kan mât uănh mât bri ta ăp thôn hôm nha geh mât pah kan. Ăp rmôt way geh tâm rgop đah ntŭk kan mât bri ta ntŭk, rmôt kan rdâk njêng ăp nău nchrăp uănh nđôi ta ăp ntŭk geh muĭh kăl bri âk, rŭn in neh bri âk. Yor nĕ, tâm 2 năm mhe nơh ta xã mô geh nău muĭh kăl bri rŭn in neh bri ƀư mir ba tâm ban kơt sŏk kăl si mô tâm di”.

Nuĭh rblang: Thị Đoắt