VOV4.M’nông: Jêh 3 khay ntrŭnh ƀư, tâm n’gor Kon Tum, nau ntrŭnh mrô 11 bah Chính phủ kơl an Bôk nau kan ndâk njêng ndrel hun hao văng sa, rêh jêng hŏ ƀư geh âk nau săk tam kơl an ƀon lan đăp mpăn nau rêh, ndâk njêng jêh srê Covid-19.

            Rlau du khay ma aơ, wa A Veo, rnoi Xơ đăng, tâm ƀon Kà Bầy, xã Sa Bình, nkuăl Sa Thầy saơ n’hâm soan nơm ngăch lơn. Lôch nar hăn kan mir ri kêng măng sĭt păng ndăn sek pih ân ma bar mlâm ndrôk mhe rvăt. Wa A Veo nkoch, dôl ma mô tŏng prăk kan, ri geh manh 100 rkeh bah nau kơl an, rklaih kan pah tĭng nau ntrŭnh mrô 11 bah Chính phủ. Geh prăk rvăt 2 mlâm ndrôk ntil 50 rkeh, n’gul nê păng rvăt kon ntil tăm, phân gay ma mât chăm ân tơm sa play. Rklaih dơi nau jêr mô geh tơm prăk, geh nau dơi hun hao văng sa, rnăk vâl, wa A Veo geh tay n’hâm ndrel ma rnăk vâl nsôih pah kan:

‘Lah ueh Đảng, Ngih dak kơl an. Đah rnăk hên ri rhoen ngăn, geh manh tơm prăk bah Ngân hàng gay ma rong ndrôk, tăm tơm sa play ân rnăk vâl hun hao lơn”.

            Đah ma rhiăng rnăk ƀon lan tâm nkuăl Sa Thầy, rnoh prăk manh đah prăk kon dêh tĭng nau ntrŭnh mrô 11 bah Chính phủ tâm di rnôk hŏ kơl rklaih nau jêr ndal bah rnăk vâl. Bah kruanh ƀon ndrel Bí thư chi bộ, gĭt geh rnoh prăk manh gay ma rvăt ndơ dŏng ntĭm nti ân kon se rnăk wa Lương Văn Phúc, lah rnăk ach o tâm Thôn 1, xã Ya Xier hŏ mbơh đah rmôt ƀư nau kan têm nkrem ân manh ndrel manh prăk bah thôn gay ma râng bôk nau kan. Ntơm bah rnoh prăk 20 rkeh manh, nô rvăt ndơ gay ma dŏng ân 2 kon nơm hăn nti:

            ‘Rnăk hên jêr ngăn lah rnôk srê Covid-19. Ngih dak geh nau ân manh rnoh prăk aơ ri gâp rvăt 2 máy tính bảng ân 2 kon gâp hăn nti gay geh nau ueh lơn. Ŭch ân 2 kon nti ân blau, geh dơi jêh aơ kơl an me mbơ̆”.

            Ngăn lah, tâm n’gor Kon Tum ân saơ, Nau ntrŭnh mrô 11, lơ 30/1/2022 bah Chính phủ mpeh Bôk nau kan ndâk ndrel hun hao văng sa, rnăk vâl hŏ ngăch lăp tâm nau rêh dnrel ƀư ueh săk tam. Gay dơi nau aơ, ăp gưl, n’gâng kan bah n’gor ndal ntrŭnh ƀư ndrel pơk trong ueh ngăn gay ma kơl an ƀon lan ngăch geh manh prăk. Wa Nguyễn Minh thuận, Bí thư Đảng uỷ xã Sa Bnh, nkuăl Sa Thầy mbơh, jêh rnôk nau ntrŭnh mrô 11 geh ntrŭnh, Đảng uỷ, n’gâng kan nkuăl hŏ leo ntrŭnh tât ăp cán bộ, đảng viên ndrel tât ăp thôn, ƀon:

            ‘Ntơm bah 3 khay bôk năm, n’gâng kan nkuăl hŏ tâm rgop nsum đah Ngân hàng chính sách nkuăl Sa Thầy kơp, uănh rgum, nchih moh săk ăp rnăk geh nau mâp jêr ngăn yor khuch bah srê Covid-19 gay ma kơl an manh. Ndrel tât rnôk aơ, geh 30 tơ̆ rnăk manh ndrel kŏ dôl ƀư nau pă manh ân nklăp 1,4 rmen prăk. Đảng uỷ kŏ pă mbơh ăp n’gâng kan, rmôt kan kơl an nŭih ƀon lan dŏng prăk manh gay đăp mpăn nau săk tam ngăn”.

            Lah ngoai tâm ăp rmôt ân ntrŭnh nau ân manh tĭng nau ntrŭnh mrô 11 bah Chính phủ, wa Nguyễn Văn Trung, Groi Giám đốc Ngân hàng Chính sách xã hội n’gor Kon Tum mbơh, rnoh nau ŭch geh manh prăk tĭng nau ntrŭnh mrô 11 bah n’gor Kon Tum năm 2022 ndrel 2023 lah rlau 1.200 rmen, geh 5 bôk nau kan ân manh. Rnôk aơ, rmôt kan dôl ntrŭt dăng ngăch nau ân manh prăk rơh 1 bah 3 bôk nau kan ân manh prăk lah 112 rmen tât ăp nŭih geh manh:

            “Chính phủ ndơ luh nau ntrŭnh ân năn gay ăp nŭih, ngăn lah ăp nŭih yor Ngân hàng Chính sách xã hội kơl an. Rnăk ach o ndrel ăp nŭih geh ăp nau kơl an êng ri mâp geh nau khuch tâm rlau 2 năm rnôk geh srê hôm, ri rnôk aơ khân păng geh nau ân manh aơ gay ma ndâk tơm prăk ƀư nau kan tuch tăm, tăch rgâl gay đăp mpăn nau rêh”.

            Kơp tât lơ 11/5, Ngân hàng chính sách xã hội n’gor Kon Tum hŏ pă geh 75,4 rmen prăk tâm ban 67% rnoh prăk manh rơh 1 nau ntrŭnh bah Chính phủ. Rnơm geh tơm prăk aơ, rlau 1.200 nŭih pah kan tâm n’gor geh kan pah, bơi tât 400 kon se geh máy tính hăn nti, 30 rnăk cán bộ, công nhân viên chức geh manh prăk nkra ngih tĭng nau ntrŭnh mrô 11 bah Chính phủ đah rnoh prăk 15 rmen. Kŏ ntơm bah nau bư nau ntrŭnh mrô 11 bah Chính phủ, Ngân hàng chính sách xã hội n’gor Kon Tum hŏ rgâl rnoh prăk kon manh ân 320 rnăk đah rnoh prăk 13 rmen./.

                        Nŭih rblang: H’Thi