VOV4.M’nông:  N’gor Sơn La geh 12 rnoi mpôl đêt ndrel gŭ rêh, tâm nĕ ƀon lan rnoi mpôl đêt geh bơi 85%. Năm bah năp, n’gor Sơn La lĕ ndăn nău ntop kơl bah ăp bôk nău kan bah Chính phủ gay ntuh kơl ndâk ƀư ntung trong nkual yôk, gay ntrŭt wăng sa-rêh jêng ăp ntŭk hun hao. knơm nĕ, nău rêh bah ƀon lan rnoi mpôl đêt ta n’gor lĕ dơi rgâl uĕh.

Bah nău ntop kơl bâh nău kơl rnoi mpôl đêt n’hanh Ngân hàng Chính sách xã hội nkuăl Mộc Châu, rnăk wa Sùng Thị Giá, ta bản Tà Phềnh, xă Tân Lập, nkuăl Mộc Châu dơi manh prăk nkra njêng, mât rong n’hanh hun hao wăng sa. Na nê̆, bah tơm prăk manh, rnăk yuh tăm 200 tơm cam, mât rong sŭr, djăr m’ơk lêng. Bah năm 2019 tât aƀaơ, rnăk yuh Giá lĕ geh, tăch du năm bah 4 tât tấn cam, hang rhiăng mlâm djăr, âk mlâm sŭr.

Xă Tân Lập, nkuăl Mộc Châu geh 15 bản, tiểu khu, rnoi mpôl đêt geh 90%. Knơm ăp bôk nău kan, nău kơl ntop kơl mpeh jŭt n’hŭch ach o kơt: Bôk nău kan 30a, bôk nău kan 135, bôk nău kan ndâk njêng ƀon lan mhe, muh măt ƀon lan xă ăp năm bah năp geh âk nău rgâl uĕh; nău rêh drăp ndơ, nuih n’hâm bah nuĭh ƀon lan dơi hao; ăp năm xă geh âk rnăk rklaih ach o hao ƀư ndrŏng di. Tât aƀaơ rnoh rnăk ach o bah xă knŭng hôm 2,4%. Wa Bàn Văn Phương, groi kruanh UBND xă Tân Lập, nkuăl Mộc Châu an gĭt:

“Knơm geh nău ntrŭnh, nău kơl bah Đảng n’hanh Ngih dak, nău rêh bah kônh wa geh nău rgâl n’hanh hun hao uĕh, dơh đêt jêr jŏt nkôp đah ăp năm bah năp, âk rnăk lĕ geh ndơ sa ndơ ntêm, năp rwăt ăp ndoh ndơ, ndơ dŏng rnăk wâl. Năm tât, xă mbra kơp uănh ăp rnăk ach o, êp ach o gay uănh mĭn tay, nta an kônh wa ƀon lan rklaih ach o”.

Bah năm 2020 tât aƀaơ, đah prăk kaih bah tơm prăk bôk nău kan 135 rlău 12,7 rmen prăk, nkuăl Yên Châu lĕ ntuh kơl mhe, nkra ăp ntung trong; ntuh kơl trong điện, ngih sam ƀŭt, ngih dak si. Tât aƀaơ, ăp trong tâm xă, tâm ƀon geh bê tông; rlău 93% rnoh nuĭh ƀon lan dôl dŏng kloh uĕh; rlău 97% rnoh rnăk dơi uănh tivi; rlău 99% rnăk dơi dŏng điện dŏng; âk ndơ dak kloh uĕh rhŏ an nău rêh bah kônh wa dơi ndâk ƀư; âk xă nkual yôk geh ngih dak si tâm di lam dak mpeh dak si; rlău 95% jrô nti nkual yôk dơi ndâk ƀư nâp nâl n’hanh mô nâp nâl... Wa Lừ Văn Chung, Kruanh jrô kan Dân tộc nkuăl Yên Châu, n’gor Sơn La an gĭt:

“Âk rnăk rnoi mpôl đêt lĕ kơt dŏng khoa học kỹ thuật an tuch tăm, nkra njêng n’hanh nsrôih rgâl ntil tơm tăm tĭng trong nkra njêng ndoh ndơ gay hao rklaih ach o, rnoh rnăk ach o hŭch tĭng năm. Âk ndơ ƀư ntung trong dơi ntuh kơl, ndâk ƀư kloh uĕh rgâl saơ na nê̆ muh măt ƀon lan; nău ntĭm nti, mât uănh săk soan nuĭh ƀon lan dơi hun hao”.

Ndrel đah nkuăl Yên Châu, nkuăl Mộc Châu, ăp ntŭk êng ta Sơn La lĕ n’hanh dôl ƀư săk rnglăy ăp bôk nău kan, nău kơl đah nkual rnoi mpôl đêt ta ntŭk. Rlău ma ăp nău ntop kơl mpeh wăng sa, ăp ntŭk dŭt uănh tât trong kan ntĭm nti, dak si, văn hóa...ta nkual rnoi mpôl đêt. Tât aƀaơ, 100% ăp xă nkual rnoi mpôl đêt bah n’gor geh tŏng ăp ngih sam ƀŭt ăp gưl bah mẫu giáo, tiểu học tât THCS; lĕ rngôch ăp xă dŭt jêr jŏt geh ăp jrô nti gŭ ta bản an ăp kon hŏk hăn nti... Ndrel đah nĕ, trong kan mât ndrăy ăp nău khlay văn hóa bah ăp rnoi mpôl đêt dơi n’gor uănh mĭn ntĭm rđău ƀa ƀơ. Aƀaơ 100% ăp xă nkual rnoi mpôl đêt bah n’gor dơi ntuh kơl n’hanh mât trong nkoch mbơh bah dâng, ntŭk bưu điện văn hóa xă, tủ ndrôm sam ƀŭt pháp luật. Hang rhiăng nkual ƀon lan gŭ ta nkual rnoi mpôl đêt geh jay văn hóa tâm di. Ƀon lan dŭt n’hâm râng ndâk ƀư nău rêh uĕh lăng; mât n’hanh hun hao ntrong leo văn hóa, njroh mprơ; mât rƀăy n’hanh ƀư uĕh ăp drăp ndơ văn hóa rnoi mpôl, nking n’gang n’hanh ntrôl rŭch ăp nău tih rêh jêng. Wa Lường Văn Toán, Groi kruanh Ban Dân tộc n’gor Sơn La an gĭt:

“Ăp nău kơl nĕ dơi rgâl lĕ rgop hun hao wăng sa-rêh jêng nkual rnoi mpôl đêt, ƀư an muh măt nkual rnoi mpôl đêt hun hao lĕ rngôch. Ntung trong, điện, dak bât, ngih sam ƀŭt n’hanh ăp ndơ dŏng êng dơi hao na nê̆; rnoh rnăk ach o nkual rnoi mpôl đêt hŭch mbrơi mbrơi bah 3 tât 5%/năm, kơl lĕ rngôch rnoi mpôl đêt rgâl uĕh đah nău wât, rgâl mhe mpeh nău way ơm nkra njêng, n’hao nău geh đăp mpăn n’hanh rgâl nău rêh, lơn lah ntơm jêng wăng sa ntŭk tăch rgâl”

Aƀaơ, n’gor Sơn La lĕ ndâk njêng bôk nău rgop an tâm nchră, Nghị quyết ban Thường vụ n’gor ủy mpeh “Hun hao wăng sa-rêh jêng nkual rnoi mpôl đêt n’hanh nkual yôk n’gor Sơn La lvang 2021-2025, rƀŏng tât năm 2030:” gay ƀư tĭng uĕh ăp nău rƀŏng hun hao wăng sa-rêh jêng, rgŏ jă âk nuĭh an ntuh kơl hun hao, kơl an ntuh kơl n’hŭch ach o nâp nâl, mkra âk nău jêr jŏt, ji nuih bah ƀon lan rnoi mpôl đêt; ntrôl dăng kơt dŏng ăp nău rgâl mhe khoa học kỹ thuật an tuch tăm. bah nĕ n’hŭch ach o nâp nâl, n’hao nău rêh drăp ndơ n’hanh nuih n’hâm an ƀon lan rnoi mpôl đêt n’gor Sơn La./.

Rnoi mpôl nkual prêh dơi ntĭm kỹ thuật tăm tơm chanh sre

Ăp năm, âk rnăk rnoi mpôl đêt ta Sơn La rklaih ach o knơm nău kơl bah Ngih dak.

          Nuĭh rblang: Y Sưng Phê Ja