Geh cán bộ, tahen Biên phòng Đăk Long ndrel Kruah n’gâng kan rđau tahen Biên phòng n’gor Kon Tum ân ndơ, pơk mpông ngih mhe, wa A Trỏ, rnoi Jeh Triêng, ƀon Dục Lang, xã Đăk Long, nkuăl Đăk Glei rhơn ngăn. Wa Trỏ mbơh, năm aơ 84 năm hôm, mô mĭn lah mra geh gŭ tâm ngih têh, hvi, nâp kơt aơ:

            ‘Ngih ơm ri lah mih ri geh dak, lah sial ri n’gơ ngăn. Ngh mhe geh Ngih dak kơl 60 rkeh, jêh ri ăp sau tahen Biên phòng Đồn Đăk Long kơl nkra, ndâk ƀư mpir, ri gâp nơm ntop tay xi măng ndrel khân păng ƀư dơm dam ân gâp ngăn. Mhe nkra du khay ma aơ lah jêh hôm. Knŭng blau lah ueh ăp sau tahen biên phòng dơm”.

            Xã n’har bri Đăk Long, nkuăl Đăk Glei, n’gor Kon Tum geh trong jong rlau 53 km êp dak Lào. Xã geh 2 đồn Biên phòng, Đăk Long ndrel Rơ Long. Ƀư tĭng nau rđau đă bah n’gor uỷ Kon Tum jut ngih truh sat ân ƀon lan, 2 đồn biên phòng tâm rgop ma Đảng uỷ, n’gâng kan xã Đăk Long uănh ăp thôn, năl geh 24 năk ŭch geh jut ngih sat. Wa A Thai, Bí thư Đảng uỷ xã Đăk Long mbơh, đah nau kơl an bah cán bộ, tahen biên phòng tât lơ 1/3 ri xã ƀư geh 18 ngih ndrel lôch lơ 30/4 ri mra jêh lĕ:

            ‘Đảng uỷ tâm rgop nsum ma rmôt tahen gŭ kan tâm nkuăl ƀư ueh ngăn moh ntŭk geh ndơ ri kơl ndơ nê. Ngăn lah biên phòng oh nô kơl an nar kan âk ngăn. Êng nar kan ri đồn hôm jă cán bộ, tahen kơl an ma drăp ndơ đŏng, nê lah prăk măt gay kơl an kônh wa ƀư ngih ân ƀon lan rnoi mpôl đê̆ rklaih ach o nâp nâl”.

            Thượng tá Đặng Nguyên Hương, Bí thư Đảng uỷ, Chính trị viên Đồn Biên phòng Đăk Long, xã Đăk Long, nkuăl Đăk Glei mbơh:

            “Ƀư tĭng bôk nau kan jut ngih truh sat tâm nkuăl ri hên geh nau ntrŭnh, nau nchrăp ƀư nau rgŏ jă tât ăp cán bộ tahen râng nau kan aơ. Hên tâm rgop rjăp ma gưl uỷ, n’gâng kan bah xã Đăk Long đă cán bộ, tahen hăn râng kơl nkra ngih, nchuăn leo ndoh ndơ ndâk ngih. Êng nê ri hên kơl an xi măng, kuăl jă ăp ntŭk bu rgop kơl an đŏng”.

            Hăn nsum ma gưl uỷ, n’gâng kan 13 xã n’har bri bah 4 nkuăl: Đăk Glei, Ngọc Hồi, Sa Thầy ndrel Ia H’Drai, cán bộ, tahen ăp đồn biên phòng n’gor Kon Tum ăp nar nsum ty, rgop n’hâm jut ngih truh sat.

            Đại tá Lê Minh Chính, Bí thư Đảng uỷ, Chính uỷ tahen Biên phòng n’gor Kon Tum mbơh, njok trong n’har jong 292 km tâm dăch ma dak băl Lào ndrel Campuchia geh 199 ngih bah ƀon lan hôm sat ndrel rnoh ŭch geh ndâk mhe lah 145 ngih. Mô êng rgop n’hâm ndrel n’gâng kan bah nkuăl ơm ƀư jêh ngih truh sat, cán bộ, tahen biên phòng hôm nsôih kơl an ƀon lan ndâk ngih rnoh prêh lơn rnoh prăk Ngih dak kơl:

            ‘Êng 60 rkeh bah n’gâng kan ba lơ kơl an ri hên rgŏ jă nau rgop kơl an ban cán bộ, tahen biên phòng n’gor Kon Tum, ăp ntŭk kan tăch rgâl, ăp nŭih geh nuih n’hâm lŏng mhâm ƀư ăp ngih geh roh ntơm 80 tât 90 rkeh prăk hao gŏ lơ. Ngih lah du ntŭk gŭ khlay ngăn đah nau rêh bah ƀon lan gay ƀon lan geh ngih ngăn ngên nâp nâp, dăng, ueh ndrel đăp mpăn nau rêh jŏ jong ân kônh wa đŏng”.

            Đah nau râng nsum ty, rgop n’hâm bah cán bộ, tahen biên phòng ƀư nau nkra mhe, ndâk nâp 199 ngih truh sat tâm 13 xã n’har bri bah n’gor Kon Tum dôl geh ƀư ngăch. Tâm nê, âk xã geh nkô̆ nau jêh ơm nau nkra ngih truh sat ân ƀon lan bah năp lơ 30/4 gay năn rhơn nkah 50 năm nar rklaih miền Nam đăp mpăn neh dak. Lôch khay 2 mhe rlau, n’gor Kon Tum hŏ ƀư jêh 879 ngih tâm rnoh 2.752 ngih truh sat ân geh ndâk nâp, nkre mhe./.