Jêh âk năm gŭ tâm ngih truh sat, rnăk wa Siu Hoàng (rnoi Jrai) tâm xã Ia Mơr, nkuăl Chư Prông, n’gor Gia Lai rhơn rnôk geh ngih nâp. Gŭ tâm ngih mhe geh tahen n’har bri Gia Lai kơl an, wa Siu Hoàng rhơn nkoch:

            “Tahen pôh n’har bri, ngih dak kơl an ndâk ân rnăk hên ngih mhe. Rnăk hên rhơn răm ngăn ngên”.

            Ntơm bah nau rgop kơl an bah cán bộ, tahen ndrel nau nsum ty bah ăp nŭih geh nuih n’hâm lŏng, tahen pôh n’har bri bah n’gor Gia Lai ndâk 10 ngih kơl an kônh wa ach o tâm nkuăl n’har bri. Du ngih geh kơl an 70 rkeh, tahen rgop ndơ ndrel nar kan, ân ngih geh nâp ueh lơn.

            Đại tá Trần Tiến Hải, Rđau kan Tahen n’har bri n’gor Gia Lai mbơh, nau jut ngih truh sat mô êng kơl an kônh wa geh ngih nâp, đăp mpăn nau rêh, ma hôm rgop nau ndâk tâm boh tahen, ƀon lan ndrel mât đăp mpăn n’har bri:

            Mhe aơ, N’gâng kan neh dak hŏ geh nau ntrŭnh tâm ban nau jao Quân khu 5, Quân đoàn 34, Binh đoàn kơl an ƀon lan Gia Lai jut ngih truh sat. Nsing tâm nau kan ngăn, ăp rmôt tahen nkre kơl an ƀon lan nkra mhe, ƀư nâp, nkre ƀư rjăp nau kan ndrel ân đăp mpăn ngăn. Dơi gĭt, lor ma geh nau jut ngih truh sat, tâm lam dak, rmôt tahen geh nau kơl an ƀon lan ƀư ngih đŏng. Tĭng nau mbơh, 5 năm ma aơ, Binh đoàn 15 ndrel Quân đoàn 34 hŏ tâm rgop ma gưl uỷ, n’gâng kan, kơp, ndâk, nkra, n’hao nâp ndrel jao rlau 1000 ngih ân ăp rnăk ach o tâm Gia Lai, Kon Tum.

            Mhe rlau, bôk nau kan “Khay pe n’har bri” kŏ geh ƀư tâm nkuăl Đức Cơ, n’gor Gia Lai, đah âk nau kan khlay, tâm nê geh nau kơl jut ngih truh sat. Nô Đỗ Đức Thanh, Groi Bí thư Đoàn n’gor Gia Lai, mbơh:

‘Hên kŏ bonh đă nau kơl an nkra nâp ngih, râng nau kan nsum ty jut ngih truh sat dôl geh rgŏ jă ƀư đŏng. Bôk nau kan năm aơ êp nau hăn nsum bah ăp rmôt kan tă bah Nkuăl ƀon têh Hồ Chí Minh ri kŏ ndơn nau kơl an bah ăp rmôt kan bah n’gor, bah nê ân saơ nau kơl an bah ăp ntŭk kan, êng nŭih ŭch tâm rgop ân ƀon lan, ndâk njêng ƀon lan nar lơn sâm geh”.

            Tât rnôk aơ, n’gor Gia Lai hŏ ndâk mhe ndrel nkra nâp rlau 2000 ngih tâm Bôk nau kan jut ngih truh sat. Đah nkô̆ nau ndâk rlau 8.400 ngih ân ăp rnăk tâm bôk nau kan bah naơ yan mih năm aơ, Gia Lai hŏ rgum âk nau kơl an. Tâm nê, du ntŭk kan hŏ tă bah tơm prăk kơl an nŭih ach o, kơl an 10 rmen; N’gâng kan công an hŏ kơl an rlau 201 rmen ndrle UBND n’gor Gia Lai pă kơl 211 rmen. UBND ăp nkuăl, nkuăl têh, nkuăl ƀon têh geh jao nau tâm rgop ma Uỷ ban MTTQ Việt Nam n’gor ndơn ndrel ntrŭnh tơm prăk ƀư, ơm ndâk ngih kơl an. Groi Kruanh UBND n’gor Gia Lai, wa Nguyễn Thị Thanh Lịch, mbơh:

            ‘Phung hên năl nau ntrŭnh ƀư tâm ban, ntŭk jêr ri doh rklaih tâm nê. Phung hên năl nau rgum lĕ ăp tu tơm ƀu nau kan aơ. Tĭng nê êng tơm prăk geh ntop kơl, pă, n’gor rgum tu tơm geh tă bah tahen, ƀon lan, nsum mpôl ndrel ntŭk kan tăch rgâl gay ndrel ndâk ngih ân nâp ân ƀon lan. N’gor Gia Lai ndŏ nau nsôih prêh, nchrăp tât khay 6/2026 mra jut lơi lĕ ngih truh sat tâm lam n’gor”./.