VOV4.M’nông: Ăp nar rlau aơ, rmôt tahen dôl tât ăp n’gor tâm nkuăl Miền Trung-Tây Nguyên gay ma kơl an ƀon lan njrăng phŭt. Âk rbăn cán bộ, tahen hŏ tât ăp nkuăl tơm ngăn, leo ndơ dŏng gay ma kơl an ƀon lan ƀư nâp ngih vâl, kơl rek an ba, pâk mbo ndrel ntrơn leo ƀon lan, drăp ndơ luh bah nkuăl mâp nau khuch.

            Ƀư tĭng nau rđau bah Quân khu 5, N’gâng kan rđau tahen n’gor Gia Lai rđau 17 Rnâng kan Rđau tahen nkuăl, nkuăl têh, nkuăl ƀon têh, ntrŭnh leo nŭih, ndơ dŏng tât ăp ntŭk mra mâp nau khuch ngăn gay ma rdâng đah phŭt mrô 4 tĭng nau kan “4 ta ntŭk”.

            Tâm nkuăl Ia Pa, Rnâng kan rđau tahen nkuăl hŏ tâm rgop nsum đah ăp rmôt kan, Công an tâm nkuăl ntrŭnh leo 1000 cán bộ, tahen tât 26 thôn, ƀon lah ntŭk mra mâp nau khuch bah 4 xã bah nkuăl gay ma tâm rgop ma rmôt kan ra ntŭk gay ma ndâk ăp rmôt, mra kơl njrăng phŭt, ndrel đah âk jêt xuồng máy, ca nô, nthưp ntă, máy mpoh ang, máy pom dak, ma rhiăng máy ot si, máy khoan bê tông, ŭnh ang, âk rbăn ao nthông, áo kơl, ăp ntil ndơ sa, phe, boh, ndơ dŭnh...Nkre leo 100% cán bộ, tahen bah ăp xã, nkuăl têh tât gŭ njrăng tâm nkuăl.

            Âk rbăn cán bộ, tahen bah rmôt hŏ tât ntŭk khuch ngăn gay ma tâm rgoơp đah rmôt kan kơl njrăng, rdâng nâp nguih vâl, kơl rek ba ndrel ntrơn leo ƀon lan, drăp ndơ luh bah nkual mra geh nau khuch tât nau rêh ndrel drăp ndơ bah ƀon lan.

            Ƀư tĭng nau rđau đă bah Thủ tướng Chính phủ ndrel N’gâng kan neh dak mpeh nau njrăng, rdâng phŭt mrô 4, N’gâng kan rđau tahen Biên phòng hŏ rđau đă lam rmôt, ngăn lah tahen biên phòng ăp n’gor Miền Trung-Tây Nguyên rgum nŭih, ndơ dŏng kơl an nau njrăng, rdâng đah phŭt mrô 4 ndrel mra rklaih nau khuch yor mih dak lip lơh.

            Tĭng nê, tâm Dak Lak, rmôt rđau tahen n’gor ndrel ăp rmôt tahen Biên phòng n’gor ntrŭnh ƀư nau kan, rmôt, mra rdâng đah phŭt mrô 4 (Noru). Ăp ntŭk kan, rmôt kan tâm N’gâng kan rđau tahen n’gor mât ƀư nau kan măng nar, êng nau mra geh kơl an tâm lơh tĭng nau đă ri hôm ƀư nau rdâng đah phŭt sial dak lip gay ma năn rklaih nau tât, đăp mpăn nau mbơh nkoch geh n’ho ro gay ma kơl an rđau kan, rđau đă rdâng nau tât khuch ndrel kơl an nŭih mâp rmanh.

            Ăp rmôt kan ntrŭnh ƀư nau kan mât đăp mpăn ntŭk mât ndoh ndơ, ntŭk gŭ tahen, ntŭk ƀư nau kan, ndơ dŏng, ntŭk tâm lơh ndrel ăp nau kan bah tahen; mêt uănh rjăp ndơ dŏng, mra ƀư nau kan. Rnôk geh nau tât, ăp ntŭk kan, rmôt kan rđau tahen n’gor mra tâm nchră, tâm kơl n’gâng kan ƀư ăp nau rdâng, năn rklaih, ƀư nau kan “4 ta ntŭk”. Nchrăp nau kơl an nkuăl ndrel ƀon lan rdâng, rklaih nau khuch bah nkuăl.

            Rdâng đah phŭt mrô 4, N’gâng kan rđau tahen n’gor hŏ rđau ăp Đồn Biên phòng, Tiểu đoàn ntĭm nti-Cơ động nchrăp ƀư ăp nau kan mra kơl an ƀon lan rklaih khuch, n’huch lơi nau khuch khat. Tâm nkuăl n’har bri Ea Súp (ăp xã Ia Lôp, Ia Rvê ndrel Ea Bung) geh mbơh lah mra geh nau khuch bah phŭt. Gay dơi rdâng, ăp ntŭk kan aơ tâm rgop ma n’gâng kan tâm nkuăl nkoch mbơh ân ƀon lan mpeh nau mih dak lip ndrel ma nau njrăng rdâng phŭt dak lip. Ăp rmôt kan ntĭm mbơh kônh wa nchrăp ao nthông, rkĭt, ndơ dơi nthông ma dak, ƀư nâp ngih vâl, mât prăp ndoh ndơ gay ma njrăng dak lip hao prêh; pă mrô điện thoại ndrel ntŭk mâp tâm rnôk geh nau tât ndal.

            Ngăn lah, đah kônh wa dôl ma pah kan tâm ăp mir tâm ntuưk rđŭng, êp dak me, dak jăng, ăp rmôt kan ân geh nkoch trêng ƀon lan sĭt ngih, ntrơn tât ntŭk gŭ đăp mpăn.

                                                                        Quốc Học/VOV.Tây Nguyên