VOV4.M’nông: Bol ma bơi tât 80 năm ndrel tâm săk jăn geh âk ntŭk sôt rmanh tă bah tâm lơh kăl e, yơn wa Nguyễn Đình Phùng, tâm nkuăl ƀon têh Tam Kỳ, n’gor Quảng Nam hôm gơih đah nau kan, tĭng rgop prăk nơm gay ma nkra ntung tâm ăp nkuăl ach o mpeh Quảng. Bơi tât 30 ntung đah rnoh prăk tât ma âk rmen, hŏ jêh ndrel leo dŏng, rgop nau kơl an nŭih ƀon lan ach o hăn ro ân nơih, đăp mpăn nau rêh. Ăp nau kan bah wa Nguyễn Đình Phùng jêng nau nkoch ueh mpeh tahen sôt rmanh ơm, rêng ueh rup gui bah tahen Wa Hồ tâm rơh đăp mpăn.

            Tâm bri duh nar miền Trung tâm ăp nar nklang khay 7, tâm trong ƀon jêr jŏt bah n’gor Quảng Nam, âk nŭih hôm saơ du hê bu klô săk lĕ ranh, ncho klơ ndeh lĕ sat ơm, săch ntŭk gay ma nkra ntung. Wa lah Nguyễn Đình Phùng, tahen sôt rmanh 2/4, đah ty đah ma geh rmanh, mpât jêr đŏng. Rnôk hăn uănh ntŭkl nkra ntung ri păng nklih rup njoăl ân kon bu klô păng gay ma mĭn nau ndâk. Wa Nguyễn Đình Phùng mbơh, nau rhơn ngăn lah ăp ntung geh lăp dŏng kơl nau hăn ro bah ƀon lan nơih lơn, nau rêh ueh lơn:

            ‘Ăp tŏ hăn sĭt ƀon ri gâp saơ âk ntung djơh khuch, hăn ro jêr ngăn, kônh wa chôt, rmanh, geh nŭih khĭt. Ntoh tă bah nê ri gâp sŏk prăk nơm, ndrel ma rgop gay ma nkra ntung. Ăp năm, rnăk hên nsôih ndâk nkra geh 4 ntung hăn. Lor ma lăp Đảng ri gâp mĭn lah mra nsôih ƀư kan tât dŭt n’hâm nơm, bol ma rnôk aơ sŏk hŏ ranh ndrel geh sôt rmanh tâm săk ri gâp kŏ nsôih rklaih. Gâp ton lah đah kon gâp, băl gâp ndrel ăp nŭih tahen nsum ma gâp hŏ lĕ khĭt lah rnôk gâp hôm n’hâm, hôm prăk ri mra nsôih nkra ntung ân ƀon lan”.

            Kơt nê mro, rlau 5 năm ma aơ, rnăk tahen sôt rmanh Nguyễn Đình Phùng dŏng prăk nơm gay ma nkra bơi tât 30 ntung hăn. Êp aơ ngăn lah ntung Phùng Hiệp 28, tâm xã Tam Phú, nkuăl ƀon têh Tam Kỳ, leo lăp dŏng di rnôk nkah 132 năm nar deh Wa Hồ. Wa Dương Thị Nhân, ndrel khu phố Ngọc Nam, Phường An Phú, nkuăl ƀon têh Tam Kỳ rhơn rnôk yan mih năm aơ geh ntung hăn ueh lơn:

            ‘Bah năp nơh ê geh ntung ri hăn ro jêr ngăn, tâm ăp rnôk dak hoch thăng lah hăn mô dơi ôh. Rnôk aơ geh ntung hôm, gâp hăn nơih lơh, ueh lơn ndrel đăp mpăn lơn”.

            Êng nau kan sŏk prăk nơm gay ma nkra ntung kơl ƀon lan, ntơm năm 2014 tât nrôk aơ, wa Nguyễn Đình Phùng hôm ƀư âk nau kơl an tâm nau rêh jêng tâm nkuăl. Wa Nguyễn Quang Vinh, kruanh thôn Ngọc Mỹ, xã Tam Phú, nkual ƀon têh Tam Kỳ mbơh, n’gâng kan ndrel ƀon lan dŭt ryơk nuih n’hâm bah wa Nguyễn Đình Phùng:

            ‘Bôk năp rnôk kônh Phùng hăn ta aơ gay ma ntuh kơl nkra ntung tâm nkuăl, gâp geh ôp kônh lah ntŭk prăk kônh dăn moh ntŭk kan ân ma kônh, ri kônh mbơh lah prăk êng păng nơm. Gâp dŭt n’hâm rhơn ngăn yor nuih n’hâm bah du hê tahen Wa Hồ hŏ lĕ ranh săk yơn hôm hăn joi nŭih nkra, păng nơm uănh bu kan, nau nâp bah ntung gay ma đăp mpăn ân nau hăn ro bah ƀon lan”.

            Wa Huỳnh Thị Thu, ur wa Nguyễn Đình Phùng nkoch, bar hê ur sai khân păng hŏ rlet âk nau jêr tâm rnôk tâm lơh kăl e, ri ma lơn ma ŭch ngăn nau ueh bah nau đăp mpăn rnôk aơ, ndrel nkah ăp nŭih lĕ khĭt. Wa Thu nkoch, ur sai wa ăp khay geh rlau 15 rkeh prăk khay, yơn hôm nsôih têm, rgop đah ăp kon, sau gay ma nkra ntung ân ƀon lan:

            ‘Sai gâp nar lơn ranh, n’hâm soan mô dăng, ri ăp tŏ hăn uănh ntŭk nkra ntung ri gâp rvê ngăn, geh rnôk păng hăn ri păng tom ndeh păng tâm ndeh têh bu. Gâp rvê đŏng, yơn mĭn tât nau kan nsum ri ăp rnôk jêh du mlâm ntung lah rnăk gâp rhơn ngăn”.

            Mhe 19 năm, wa Nguyễn Đình Phùng râng tâm lơh mprơh Mỹ, rnôk ntŭk tâm lơh Quảng Nam tâm rnôk hô ngăn. Lôch tahen năm 1977, tâm săk jăn âk sôt rmanh, wa Phùng pah kan ytâm Ngih phat dôih nkuăl têh Tam Kỳ (rnôk aơ lah nkual ƀon têh Tam Kỳ, n’gor Quảng Nam). Ntơm rnôk sĭt rlu ranh tât rnôk aơ, wa lŏ râng âk nau kan tâm Chi bộ Khối phố ndrel rmôt tahen ơm Phường An Xuân, nkuăl ƀon têh Tam Kỳ. Wa Đỗ Văn Thương, Kruanh Rmôt tahen ơm phường An Xuân, rnê tât nuih n’hâm kan, lôch n’hâm nơm yor kan nsum bah wa Nguyễn Đình Phùng:

            ‘Nau ŭch bah wa Phùng lah pah kan tă bah nuih n’hâm bah nơm, pah kan êng mô kâp geh bu mbơh, đă, ntơm sa ơm tât rnôk aơ kơt nê mro. Rnôk ntơm lăp hăn tahen ân tât rnôk aơ ri wa Phùng mô mâp mĭn tât êng săk nơm, ma knŭng mĭn ân ntŭk kan, mĭn ân ƀon lan”.

            Bơi tât 80 năm, n’hâm mô hôm kơt ntơm, yơn tahen sôt rmanh Nguyễn Đình Phùng hôm mĭn đah ăp nau nkra ntung hăn tâm nkuăl ach o mpeh Quảng. Wa Phùng rhơn rnôk nklang khay 7 yơn jêh nkô̆ nau tâm năm aơ lah nkra 4 ntung. Hŏ geh 28 ntung yor wa Phùng nơm nkra, moh săk Phùng Hiệp 1 tât Phùng Hiệp 28. Nkoch tât nau moh Phùng Hiệp, wa nkoch, Phùng lah moh săk păng, hôm Hiệp lah moh săk băl păng lĕ khĭt, kŏ lah nŭih bôk năp rgop prăk gay ma ndrel rnăk păng nkra ntung hăn ƀon lan. Wa Phùng rhơn ngăn rnôk bơi tât 30 ntung jêh ndrel geh lăp dŏng di rnôk ăp nar lễ têh bah neh dak, đah nau ŭch lŏ rgop du gưl n’hâm soan nơm bah tahen wa Hồ ân nau hun hao bah ƀon lan, neh dak./.

Nŭih rblang: H'Thi