Tĭng ƀư bôk nău kan gưl neh dak tât geh tâm ban bu ur bu klô n’hanh nkra ăp nkô̆  nău khlay đah  bu ur n’hanh kon se, ta ăp n’gor Tây Nguyên, hŏ geh hang rhiăng Câu lạc bộ “Tơm me bah nău rgâl” dơi njêng.

Ta Dak Lak, tĭng wa Hồng Len, Groi Ban rnăk wâl- rêh jêng kon nuĭh- wăng sa Hội Liên hiệp bu ur Dak Lak, ăp nhih nti ta n’gor lôch rnôk lăp năm nti  mhe hŏ njêng dơi âk Câu lạc bộ “Tơm me bah nău rgâl”. Nău kan bah Câu lạc bộ rgum tâm pă nău lư kơi ntop tâm nchrăp nău mĭn tĭng năm deh, bu ur; nău rgâl mpeh nău gĭt êng, jăng bah nău mưch bu ur; kơi năp nti nău blău rêh mpeh joi nău gĭt êng, nău blău tâm dâl nău tâm rnăk wâl, nhih nti, nsum mpôl tâm lam ƀon lan; ƀư ăp nău kan pâl rlưn, gŭ rêh kloh uĕh tâm di đah tĭng ntil năm deh...

Câu lạc bộ “Tơm me bah nău rgâl” ri hŏ njêng hôm, Mpôl bu ur n’gor hŏ kan nsum đah ăp n’gâng kan hŏ njêng hôm. yơn lah tâm rnôk ăp kon se nti tât khay rlu nti ri geh mbrơi tay. Aƀaơ ăp kon se hŏ plơ̆ nti tay ri mpôl hên ntrŭt đă njêng tay âk Câu lạc bộ. njêng dơi dŭt âk đŏng”.  

Ma trong ntĭt leo, kon se, lơn lah kon se bu ur dơi mpơl nău ngơi bah he; tâm ban đah kon se bu klô n’hanh kon se bu ur tâm rnăk wâl, tâm nhih nti n’hanh dơi nsum mpôl mât njrăng. Măt êng, ăp kon se hôm dơi năp nău gĭt blău, nău dơi mât njrăng êng săk  nơm n’hanh nkra ăp nkô̆ nău geh tât săk nơm. Wa Tô Thị Tâm, Kruanh Hội Liên hiệp bu ur n’gor Dak Lak an gĭt, ntơm bah rnôk geh trong nchrăp bah Chính phủ mpeh bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang n’hanh nău rđău đă bah Trung ương Hội Liên hiệp bu ur Việt Nam, Hội Liên hiệp bu ur n’gor Dak Lak hŏ ndăn an ƀư rdâk njêng trong nchrăp n’hanh bôk nău kan:

Hội bu ur mpôl hên hŏ ƀư âk bôk nău kan rƀŏng sĭt tâm dâng. Tâm nê ƀư njêng ăp Câu lạc bộ “Tơm me bah nău rgâl”. bôk năp hŏ dơn geh nău tâm ban ŭch n’hanh nău kơl dŭt âk bah ƀon lan n’hanh bôk năp hŏ gĭt uĕh mpeh bôk nău kan dja”.  

Gay mât geh nău tam ăp Câu lạc bộ hŏ njêng, wa Tô Thị Tâm, Kruanh Hội Liên  hiệp bu ur n’gor Dak Lak an lah: Đah Câu lạc bộ “Tơm me bah nău rgâl”, Dak Lak ntrŏng nău mât trong leo nău dơn kan khlay bôk năp. N’gor mô n’gluh nău  tĭng geh rnoh âk ma mbra tĭng geh nău săk blău kan, geh nău tam ngăn ngăn:

“Nău nê kơt he hŏ gĭt, nău ngăn geh nê hŏ geh ta du đêt ntŭk đŏng. Tâm n’gor mpôl hên nơm tâm ban kơt nê đŏng. Rnôk du trong ntĭt leo, du bôk nău kan uĕh mô lah du nău  kan nê nơh mpôl hên an ƀư,, lah he mô tĭng tay, mô ntrŭt ntrôl, mô groi nđôi tay, uănh năl tay tĭng gâl kan ri trong ntĭt leo lor bôk năp ri tâm ban kơt lư bah lơ dơm, lôch nê ngâm roh mbrơi, geh rnôk n’hât dŭp ngăn. Yor kơt nê ri mpôl hên, rnôk geh trong leo ƀư ri ân mât mbro trong leo kan nê, n’hanh rdâk njêng trong leo kan nê, geh nău dơi n’hanh geh nău tam lah nkô̆ nău gâp ndơ̆ luh bôk năp”.

Ta ăp  n’gor Dak Nông, Kon Tum, Gia Lai, Lâm Đồng, hang rhiăng trong ntĭt leo Câu lạc bộ “Tơm me bah nău rgâl” ntoh măt đŏng. Nău njêng trong ntĭt leo hŏ ntop kơl  n’gâng kan ta ntŭk, ăp nhih pah kan dơi kan tĭng ƀư jăp bôk nău kan, trong kơl geh tât kon se; ntop kơl ăp nai ntĭm nti tĭng ƀư jăp bôk nău kan ntĭm nti  an kon se nti n’hanh nking nchăng nău tâm lơh nsing tâm bu ur, tom mpet kon se, tăch rvăt, nhŭp kân n’hanh gŭ ur sai ơm ta kon se. Ta n’gor Kon Tum, Hội Liên hiệp bu ur nkuâl Đăk Glei kan nsum đah Jrô kan ntĭm n’hanh nti nkuâl ƀư njêng n’hanh ntoh măt 6 Câu lạc bộ “Tơm me bah nău rgâl” ta ƀon lan n’hanh ăp Nhih nti Tiểu học – Trung học cơ sở ta nkuâl. Ăp Câu lạc bộ dơi njêng geh ntơm bah 15 tât 30 nuĭh, lah ăp kon se nti ntơm bah jrô 6 tât jrô 9 (geh lĕ ma bu ur n’hanh bu klô), ntơh măt an gưl nti, rnoh năm deh. Rlău ma nê, geh Ban Chủ nhiệm ntơm bah 3 tât 5 nuĭh; Nuĭh leo ntĭm nti ntơm bah 1 tât 2 hê lah nai ntĭm nti tổng phụ trách mô lah nai ntĭm bộ môn. Oh Y Ngọc, Nhih nti THCS thị trấn Đắk Glei râng Câu lạc bộ “Tơm me bah nău rgâl” an gĭt:

“Nău ŭch gâp râng Câu lạc bộ lah gâp ŭch rŏng ring lam nău mbơh gĭt lor bah Câu lạc bộ tât lĕ rngôch ăp kon se nti lah êng n’hanh nuĭh rnoi mpôl đê̆ lah nsum mpeh nău rgâl tâm nău mĭn bah ăp nuĭh. Câu lạc bộ geh dŭt âk nău kan gay kơl kon se nti năp ăp nău gĭt blău, nău dơi geh tât tâm ban bu ur bu klô n’hanh mât njrăng kon se. Yor kơt nê̆, Câu lạc bộ “Tơm me bah nău rgâl” lah nău dâk leo lor tâm nău rdâk njêng ƀon lan đăp mpăn n’hanh mô geh tâm rkeh bu ur bu klô”.

 Ăp nuĭh lăp nsum tâm Câu lạc bộ “Tơm me bah nău rgâl” mbra lah ăp găr ntil dâk leo lor trong rgâl nău mĭn, jăng bah tâm mưch bu ur, nău rluk mâl ơm, rdâk tay rêng kan geh nău ntop kơl gay ăp băl mom dâk leo lor tâm trong rdâk njêng nsum mpôl lam ƀon lan đăp mpăn n’hanh mô geh tâm lơh bu ur ta ntŭk, ta nhih nti. Nkre, nău njêng ăp Câu lạc bộ gay năp an kon se ăp nău gĭt blău, nău dơi geh tât tâm ban bu ur bu klô n’hanh mât njrăng kon se, ntơm bah nê geh nău rgâl uĕh mpeh mbơh ngơi, nău gĭt êng n’hanh nău way ntăt tâm nău nking nchăng n’hanh rdâng lơh đah nău tâm lơh, tom mpet kon se; n’hao nău gĭt êng, nău mbơh ngơi n’hanh nău way ntăt bah kon se, nai ntĭm nti, me bơ̆ tâm trong tĭng ƀư nău dơi n’hanh nău way bah kon se, mât njrăng ăp kon se bah geh nău tâm lơh, nău ntêt, nău dŏng prơ, tăch rvăt, nhŭp kân n’hanh gŭ ur sai ơm./.