Kêng măng 10/3, Thủ tướng Phạm Minh Chính ƀĭt joet rơh rƀŭn tal 3 bah Ban ntĭm rđău Trung ương mbơh ƀư jŭt ngih rông mpông sat ta lam dak. Tĭng nău mbơh, tât aƀaơ lam dak lĕ jêh, jao an rlău 65 rbăn mlâm jay gay ăp rnăk dơi gŭ tâm jay mhe; nkre dôl ndâk ƀư rlău 56 rbăn mlâm jay. Bah jêh rơh 2 (n’gul khay 1) tât aƀaơ hao bơi 16 rbăn mlâm jay lĕ jêh n’hanh 18 rbăn mlâm jay  ntơm ƀư.  

Ntoh ngơi ta rơh rƀŭn, Thủ tướng Phạm Minh Chính mĭn lah aơ lah du bôk nău kan geh nkô̆ nău kơl nuĭh âk bah Đảng n’hanh Ngih dak he đah nuĭh ƀon lan; mpơl nău rsơl plơng đah ăp nuĭh geh soan nuĭh lĕ nsơl săk yor cách mạng bah rnoi nuĭh, bah neh dak he rlău ăp rơh; mpơl nuih n’hâm tâm yô̆ tâm kơl, nuih n’hâm tâm rnglăp lam rnoi nuĭh. Yor rĭ, he kŭng tâm nchră ƀư, mô rŭch, aơ lah nău ƀư bah play nuih. Nău rƀŏng mô geh rgâl, tât lơ 30/10/2025 jêh nău rƀŏng aơ, jêng lah bah năp rlău 2 khay nkôp đah trong nchrăp ta rgŏ jă tă aơ 1 năm.