VOV4.M’Nông: Nau tâm lơh hŏ rŭch ngai, neh dak hŏ đăp mpăn, yơn ăp nŭih tahen bah Tahen ƀon lan Việt Nam ê geh du nar rlu. Nau kan mât nkuăl dak lêng, gôl dak bah neh dak, mât nau đăp mpăn n’gân tâm săng nglik bah Tahen dak lêng đah nau kan têh bah năp Đảng, bah neh dak ndrel ƀon lan. Nau roh hoach bah ăp nŭih kon chuêl săk nơm, khĭt yor neh dak geh rơh ƀa hin nkah đah nuih n’hâm ryơk. Ăp nŭih tahen choat tĭng ăp nô, mbŏ mro nsôih, chiăr nti mra tâm lơh gay ma mât nkuăl neh dak, dak lêng bah neh dak nơm ntŭk bôk trong rlong sial.

            Tâm dak lêng, tă nteh chuông tă bah chùa Sinh Tồn, ndrel ma nau ƀô bah dak lêng, nsum ma sial, nteh bah dak rdul. Ăp nê kơt lah nchôl jur, đah nuih n’hâm, nau nkah gĭt, tahen ndrel ƀon lan gôl dak Sinh Tồn mpoh kthup nkah ăp tahen dak lêng janh dăng hŏ nchlơi săk nơm tâm dak lêng, mpeh jâng nar...Dâk bah năp ntŭk nchih nkah moh bah 64 tahen khĭt tâm rnôk mât nkuăl neh dak lêng Gạc Ma, yuh Lữ Thị Kim Cúc, nŭih tâm gôl dak Sinh Tồn, ngơi:

“Rnôk tât mpoh kthup ân ăp nô tahen khĭt tâm Gạc Ma, săk gâp rngot klâng ngăn. Dŭt ntô̆ n’hao ăp nô. Ŭch huêng bah ăp nô kơl an ân ăp nŭih tâm gôl dak geh săk dăng lăng ngăch ndrel mih lăng prăng ueh gay ma ăp nŭih ueh lăng pah kan, rêh jêng tâm xã gôl dak”.

            Trung tá Đinh Cao Toan, Cán bộ gôl dak Sinh Tồn mbơh: Nau nkah ăp tahen khĭt gay ma mât gôl dak Gạc Ma lah rnôk gay ma ntĭm mbơh nau vay cách mạng, gay ma tahen ndrel ƀon lan tâm gôl dak gĭt lơn mpeh ăp nau kan ndrel nau roh hoach bah ăp rơh hăn lor, ntoh nuih n’hâm đah ăp kơn nô, mbŏ hŏ mô hoach nting mham gay ma mât nau đăp mpăn dak lêng. Ntơm bah nê ăp cán bộ tahen nsôih tâm rlong, nsôih ƀư ân jêh ăp nau kan geh jao:

            ‘Nkah nau roh hoach bah 64 tahen khĭt tâm gôl dak Gạc Ma, bah nê gay ma ntĭm nti nau ŭch rŏng neh dak ndrel nuih n’hâm ân ăp cán bộ, tahen lŏ choat tĭng ăp rơh mbŏ, nô tâm nau kan ndâk njêng ndrel ma mât neh dak dak lêng”.

            Tĭng Thầy Thích Tâm Thành, rđau chùa Sinh Tồn: Ăp nar khay 7, chùa Sinh Tồn-ntŭk n’gân ntŭk nchih nkah moh săk bah 64 tahen khĭt tâm nau kan mât gôl dak Gạc Ma geh âk ngăn cán bộ, tahen nŭih ƀon lan nkuăl têh Trường Sa ndrel nŭih nhŭp joi tui ka êp dak lêng hăn mpoh kthup, ăp tahen dak lêng janh, blau hŏ chôt săk đah nuih n’hâm nkah klâng. Chùa kŏ ƀư nau kuăl huêng ân ăp tahen khĭt, ăp ntil ndơ bu leo ôp brah lah kao, play geh ƀon lan tăm êng. Nau kan ntoh nau vay ơm “ngêt dak nkah gĭt tu”, “Kơl an” bah rnoi mpôl Việt Nam, nkah ăp tahen lĕ chôt săk nơm yor geh dak, dak lêng, yor nau đăp mpăn neh dak:

            ‘Tâm rnôk mpoh kthup, ôp brah kuăl huêng, gâp mro geh nau ŭch dăn ân ăp ding, chư Phật, ăp tahen lĕ khĭt tâm gôl dak dak lêng bah Trường Sa kơl an ân cán bộ, oh nô tahen, kônh wa ta aơ nau rêh hơm răm, bah nau ji kuet, geh âk n’hâm soan gay ma mât nkuăl dak lêng Trường Sa geh đăp mpăn ndrel ma lap săk”.

            Nau geh tâm Gạc Ma tâm ôi 14/3/1988 hŏ geh nkah tâm nau vay bah rnoi mpôl kơt lah du nau nkah mô dơi chuêl bah ăp nŭih kon neh Việt. 64 nŭih tahen dak lêng hŏ gơih n’or ndrel mom hŏ khĭt tâm dak lêng, yơn nuih n’hâm janh dăng bah ăp nô jêng nau mô dơi roh mpeh nau janh cách mạng, nkah ăp kơn ba lơi mpeh nuih n’hâm nsôih săk nơm gay ma mât nkuăl dak lêng neh dak. Nuih n’hâm nê lăp jru tâm nŭih tahen dôl ƀư nau kan tâm gôl dak Trường Sa nar aơ. Trung sĩ Nguyễn Quốc Thịnh, tahen gôl dak Cô Lin, ngơi:

            ‘Lah rơh ba kơi, săk gâp mro saơ geh nau ntô̆ n’hao nuih n’hâm mpeh nau dơi ueh ang bah ăp rơh bŏ, nô hăn lor hŏ ƀư jêng nau vay nsôih ân geh nau dơi bah tahen nơm, nau rhơn geh dơi ƀư kan tâm gôl dak Trường Sa, ntŭk ma cán bộ tahen dôl măng nar rklaih nau jêr jŏt gay ma mât nâp nau ƀư tơm bah gôl dak dak lêng bah neh dak. Gâp mro nsôih ntĭm nti, n’hao nuih n’hâm kan mra tâm lơh, mro nsôih chiăr nti n’hâm nơm gay ma tŏng dơi nau ŭch kan tâm nkuăl dak lêng”.

            Thượng tá Lương Xuân Giáp, Chính uỷ Lữ đoàn 146 (Đoàn Trường Sa), nkuăl 4 Hải quân, lah rjăp:

            ‘Mât nau ƀư tơm bah neh dak tâm gôl dak Trường Sa ân ueh, đăp mpăn lah nau kan bah tahen Trường sa ân ueh, đăp mpăn lah nau kan bah tahen Trường Sa tâm rnôk đăp mpăn bah phung hên, ueh ang yơn lah hôm âk nau jêr, nau roh, nau hoach mô êng geh nau gơm rhơn ma geh năp ma nau roh hoach, geh n’ăp ma khĭt, roh nting mham. Ndri ma, ăp cán bộ, tahen Trường Sa phung hên nar aơ mra nkah, mât nâp nkuăl dak lêng gôl dak bah neh dak. Ndâk njêng nkuăl gôl dak ân nâp mpeh nau njrăng, ueh mpeh nau rêh, ueh mpeh ntŭk ntu gŭ âm, leo trong mpeh nau tâm rnglăp tâm tahen ƀon lan, mât nkuăl dak lêng Trường Sa, nau ƀư tơm bah neh dak”.

            Gay geh du neh dak đăp mpăn, dah rŏng, đăp mpăn kơt nar aơ, geh âk ngăn nting mham bah mbŏ, che hŏ hoch jur. Rơh ba kơi nthoi tay nau vay nô, mbŏ, che nơm mra tâm lơh gay ma mât nkuăl neh, dak lêng, nkuăl neh huêng khlay bah neh dak ntŭk bôk trong rlong sial./.

            Nŭih rblang: H’Thi