VOV4.M’nông: Nau kan tâm rgop kơl an bah Rnâng kan tahen xã Hoà Phú, nkuăl ƀon têh Buôn Ma Thuột, n’gor Dak Lak ăp năm rlau aơ hŏ ƀư geh săk tam. Ntơm bah tơm prăk aơ, ăp tahen yông grat hŏ tâm mbơh nau ŭch rŏng, tâm kơl hun hao văng sa, rnăk vâl, đăp mpăn nau rêh, đăp mpăn nau kan, ndrel ma nau ƀư nau kan.

Lah nŭih pah kan lŏ mir ƀư tăm cà phê ndrel tiêu, roh khuch yor lah tơm ranh, rnoh thuk, nô Phan Sự tâm thôn 1, xã Hoà Phú mâp geh nau nkoch tât nau ŭch tăch ngih gay ma hăn Bình Dương ƀư công nhân. Yơn lah, rnoh manh 20 rkeh tă bah tơm prăk dân quân xã tâm năm 2012, hŏ kơl nô ƀư tay nau kan tâm neh mir rlau du ha bah nơm. Nô Sự rôk lơi cà phê ndrel tiêu, ntrơn jêng tăm play đung, play đur, ndâk nau mât rong sur ân deh kon. Nau ntrơn rgâl ƀư nơih, tăm tơm hun hao, ri ma rnăk nô geh têh ndrŏng:

‘Oh nô kơl an ân manh geh 20 rkeh prăk, ntơm bah tơm prăk nê gâp rvăt sur me jêh ri hao jêng. Ntơm bah nê gâm rong kon sur jêng sur me, rnôk aơ geh 6 mlâm me jêh ri du năm păng deh 2 tơ nklăp 100-150 mlâm kon sur. Ntơm bah rnoh nê gâơp tăch, sŏk prăk gay ma nkra tay ndrung ndrel pơk hvi lơn, rnôk aơ geh prăk đăp mpăn ntơm nklăp 200 rkeh tâm du năm”.

Mô knŭng tâm kơl gay hun hao văng sa, tơm prăk bah dân quân bah Rnâng kan rđau kan tahen xã Hoà Phú hôm năn kơl an ăp rnăk geh nau rêh mô lăng lap. Nô Nguyễn Đăng Huỳnh, Groi rdau kan, Rnâng kan rđau kan tahen xã Hoà Phú mbơh: Lah mô geh oh nô tâm kơl an, gâp hŏ dăn rlu, joi nau kan êng yor lah kon gâp hôm jê̆, ji kop mro, tâm rnôk nau văng sa rnăk vâl hôm âk nau jêr:

‘Gâp geh 2 hê kon, kon bôk ranh mô lah geh nau ji play nuih. Tâm rnôk nê oh nô rgop ân manh manh nklăp 40 rkeh gay ma rek play nuih ân kon ndrel ân manh tay 20 rkeh đŏng. Tơm prăk hŏ kơl an rlet bah nau jêr, kon gâp rnôk aơ hŏ bah nau ji”.

Nô Nguyễn Văn Tuyển, Rđau kan tahen xã Hoà Phú, nŭih bah rmôt ân manh prăk mbơh: Tơm prăk geh nau ƀư kan kloh rah vah ri ma ăp nŭih kŏ ŭch râng. Ăp khay, ăp nŭih nsing tâm nau geh bah nơm gay ma rgop ntơm 200-500 rbăn. Rnăk geh nau jêr ri kơl an manh đê̆ ngăn kŏ 10 rkeh prăk, âk ngăn ri geh manh 100 rkeh. Tơm prăk mro geh kơl an ân ăp nŭih mâp nau jêr ngăn:

‘Prăk khay bah oh nô mô âk, ri ma mô tŏng dơi nau geh văng sa rnăk vâl, bảo hiểm y tế mô geh. Kŏ âk nŭih hôm geh nau rêh jêr jŏt, ur sai mom mhe tâm gŭ. Phung hên rnôk aơ tâm kơl gay ma ndrel rlet rlau nau jêr jŏt ndrel ma đăp mpăn geh nau mĭn tâm rnôk ƀư nau kan. Gay oh nô tâm rnơm, sŏk prăk aơ ân manh gay ma ăp nŭih bu mô kâp manh bah dih, manh prăk kon jâk mô lah âk rnôk manh ngân hàng yơn ê tât rnôk nê nơm mô geh, văng sa hôm jêr. Lah mô geh prăk aơ ri ăp nŭih nê mra nchơi nau kan dơm”.

Tĭng wa Nguyễn Hữu Toàn, Kruanh UBND xã Hoà Phú: Ntơm bah tơm prăk aơ, ăp nŭih hŏ ntuh kơl hun hao tuch tăm, mât rong ndrôk, sur, djăt, kik, tăm byăp kloh, hun hao văng sa, pơk nau kan n’hao nau geh, rgâl nau rêh, rklaih luh lơi bah ach o:

‘Tơm prăk aơ pah kan mbơh kloh rah vah ngăn. Ăp nŭih ma mâp nau jêr geh sŏk tơm prăk aơ ân manh gay ma tâm kơl pah kan jan sa, văng sa rnăk vâl ân ueh lơn. Jêh ri ăp nŭih hăn râng 2 năm tă hăn tahen sĭt ma mô geh kan pah ri ăp nŭih tâm aơ kŏ kơl an ân manh prăk gay ma văng sa rnăk vâl. Jêh ri tahen xã râng nsum ma druh ndăm, tâm rgop ma n’gâng kan lăp tâm mâp ma ntŭk kan gay ma mbơh nŭih ân ăp ngih máy, ntŭk pah kan”.

Tơm prăk dân quân xã Hoà Phú geh ndâk ndrel leo lăp kan ntơm năm 2016 đah 20 nŭih râng ƀư. Jêh 7 năm, ăp nŭih kan nsum hĭ rgop tâm tơm prăk rlau 360 rkeh. Bah tơm prăk aơ, ăp rmôt kan hŏ geh manh prăk gay ma ntuh kơl ƀư nau kan tuch tăm, tăch rgâl. Nau rêh lơn lăp tâm nau đăp mpăn kơl an ân ăp nŭih đăp mpăn pah kan, ƀư rjăp nau kan bah nơm./.

Nŭih rblang: H’Thi