Tâm bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang geh trong nchrăp “Tâm ban bu ur bu klô n’hanh nkra ăp nkô̆ nău jăch ndăn đah bu ur n’hanh kon se” (way kuăl lah trong nchrăp 8). Ăp năm aơ, trong nchrăp dja dôl dơi ndop đah ăp bôk nău kan êng ƀa ƀă. Lôch  jêh gŭ mĭn ngăn ngăn an ƀư, ăp nuĭh khoa học dăn đă mpeh jŏ jong, trong nchrăp mpeh tâm ban bu ur bu klô ân dơi ƀư ntuh kơl êng.

Trong nchrăp 8, tă bah Hội Liên hiệp bu ur Việt Nam ƀư tơm, hŏ ƀư nar lơn ma geh nău tam lơn nău nkoch tâm ban bu ur bu klô n’hanh nkra ăp nkô̆ nău jăch ndăn đah bu ur n’hanh kon se. Gay ntik n’hao nău dơi n’hanh hăn ngai lơn tâm rơh II (2026-2030), Tiến sĩ Lê Ngọc Thắng nchŏng luh puăn nkô̆ nău ân dơi nkra du trong lôch lĕ. Bôk năp lah Ndop bu ur mô lah ntuh kơl êng? Tĭñg păng, hŏ tât rnôk rgâl nău mĭn. Lah ntơm nơh nău ndop bu ur tâm ăp bôk nău kan êng lah nău khlay gay n’hao nău gĭt êng, ri mpeh jŏ jong, tâm ban bu ur bu klô ân dơi an ntuh kơl êng.

"Gâp mĭn lah, nkô̆ nău tâm ban bu ur lah bah n’gul tâm nău rêh... Lơn ma ndop đêt lơn ma uĕh, yor tâm ban bu ur bu klô ân dơi uănh du trong an ntuh kơl êng lor, mô dơn lah ndơ kơi ntop kơl"

Nkô̆ tâl 2 lah nău bên di đah rgâl dơh glêh siƀŭt. Nău glêh tam nuĭh kan hôm bar gưl n’gâng kan tâm dâng lah gưl n’gor n’hanh gưl xã n’gluh nău ôp têh mpeh nău tâm n’guăk bah Hội bu ur n’hanh nău dơi an ƀư bah cán bộ tâm dâng. Nău dja ân n’hao dăng kơi năp nti, n’hao nău dơi kan an rmôt cán bộ Hội gưl n’gor n’hanh xã gay khân păng wât n’hanh an ƀư trong nchrăp kan geh nău tam.

Nkô̆ nău tâl 3 lah nău đă mpeh n’glôch jêh khoa học. Tĭng Tiến sĩ Lê Ngọc Thắng, ân geh du nău n’glôch jêh 10 năm (2021-2030) du trong khoa học n’hanh ngăn ngăn gay plơng ơh nău ôp: Trong nchrăp 8 hŏ njêng luh moh ndơ nău rgâl ngăn ta mpeh tâm ban bu ur bu klô an bu ur rnoi mpôl đê̆? Ăp nău uănh năl dja mbra lah ntŭk nsĭng nâp an nău tor luh trong kơl an let năp tay.

N’hanh nkô̆ nău tâl puăn lah nkrêp uĕh đah ăp nkô̆ nău lam rêh jêng kon nuĭh jăch ndăn khlay. Tâm ban bu ur bu klô mô dơi tâm ƀah rih ăp nkô̆ nău ji bôk rngok kơt tâm gŭ ur sai mô tŏng năm deh, tâm gŭ ur sai nha hôm ndŭl mham, nău tâm ntlơi ur sai rnôk bu ur hăn kan ngai, tom  mpeh bu ur mô lah tăch rvăt nuĭh. Trong nchrăp 8 ân ntrŏng năl n’hanh nkra ăp nkô̆ nău dja, uănh nê lah du gâl mô dơi lah mô geh tâm njăr trong hăn ntăm nău dơi an bu ur.

Tiến sỹ Lê Ngọc Thắng dăn đă let năp tay ân tât du trong lam lĕ rngôch yơn ân geh rgum tơm. Grêt dăch tay ăp rnoh tât kan n’gâng tơm: n’hao nău gĭt êng, mât njrăng nău dơi n’hanh nău geh tâm di, mât chăm nău rêh dăp ndơ, nuih n’hâm lơn lah n’hao nău dơi n’glêh an wăng sa an bu ur.

Trong kơl rnoi mpôl đê̆ lah tâm rgop âk n’gâng kan, âk ntil trong kan, ring tam tât kon nuĭh– mô dơn 53 rnoi mpôl đê̆ ma lĕ ma ƀon lan nuĭh Yuăn đŏng. Păng geh lĕ ma dak si, văn hóa, ntĭm nti, jut jăng ji ngot n’hŭch ach o. Jêng, ăp trong nchrăp bôk nău kan gưl neh dak ân dơi mĭn uănh du trong nkrum lam lĕ rngôch. Mpeh nău mĭn tât dơi trong kơl, gâp tâm ban ŭch đah nău grêt rnoh tât, nuĭh kơl n’hanh ntŭk kơl hŏ ntrŏng năl tâm bôk nău kan, lơn lah an lor ăp ntŭk dŭt jêr jŏt mha êng.

Trong nchrăp 8 mô dơn lah du bôk nău kan ma lah ndơ an saơ nău nsrôih chính trị têh bah Đảng n’hanh Ngih dak. Đah nău khlay an ƀư lor bah Hội Liên hiệp bu ur Việt Nam, nău rgum tâm ăp bôk nău kan na nê̆, nkra ăp nkô̆ nău khlay jăch ndăn n’hanh mbrơi hăn tât uănh tâm ban bu ur bu klô lah du trong ntuh kơl mpơl ngăn ta năp măt mbra lah mâng rnăng pơk ăp nău rgâl jŏ jong, nta trong dơh an du nău rêh geh nău tâm ban.