VOV4.M’nông: Tâm rơh rƀŭn tal 10 mhe aơ bah Uỷ ban Rnâng kan Quốc hội, ăp ntoh măt hŏ ntop du tơ̆ tay đŏng nau rgop mpeh Luật njrăng, rdâng nau tâm lơh rnăk vâl (rgâl nkra). Uỷ ban Rnâng kan Quốc hội tâm ban nau mpeh nau khlay tâm nau ndâk nau nchrăp luật, nkre đă ntop tay ăp nau tâm lơh tâm rnăk vâl gay ma nkoch ngăn tâm nau rêh ndrel der lơi dơm nau tih, ngăn lah nau tih đah nau ƀư Me yông lơh kon êng bah sai mô lah, lơh kon êng bah ur.

            Jêh bơi tât 15 năm ƀư, Luật njrăng rdâng nau tâm lơh tâm rnăk vâl hŏ geh âk nau ueh mpeh nau mĭn, rgop nau mât nŭih geh bu lơh tâm rnăk vâl, rklaih nau tih, tih pháp luật tâm nau njrăng rdâng nau tâm lơh. Yơn lah, hôm ơm âk nau khuch hôm geh nau tih, mpôn, jêr rdâng ndrel jêr rklaih đah nau ntrŭnh bah pháp luật rnôk aơ. Tĭng nau geh uănh bah neh dak mbơh năm 2030, lah geh 3 nŭih bu ur ri geh du hê sai lơh. Nau ngăn lah, geh rlau 90% bu ur geh sai lơh mô geh janh joi nau kơl an.

            Ăp nau đă n’hao ăp nau kan mbơh mpeh nau njrăng, rdâng nau tâm lơh tâm rnăk vâl, ăp nau ntĭm mbơh mpeh nau kan ndrel nau ƀư kơl an uănh ăp nau tih tâm lơh tâm rnăk vâl. Nkre, gay ma n’hao nau nkri, nau nchrăp luật ân geh ntrŭnh mbơh rnôk geh mbơh nau mpeh tâm lơh tâm rnăk vâl ri công an gưl xã geh nau dơi đă nŭih lơh bu gay tât ntŭk kan Công an xã gay ƀư kloh nau mbơh ndrel rklaih nau tâm lơh tâm rnăk vâl. Yơn lah, Kruanh uỷ ban neh dak ndrel đăp mpăn bah Quốc hội Lê Tấn Tới ân lah, nau nchrăp- luật ê geh jao nau dơi ân công an xã:

            ‘Nau tâm lơh tâm rnăk vâl lah nau tih pháp luật. Bol ma hình sự, dân sự mô lah nau tih pháp luật lah công an xã geh nau dơi gay ma rklaih. Jao ân công an xã uănh nau ƀư, mô ân geh tâm mâp...aơ lah nau kan jao ân công an xã kŏ jâk ngăn. Nau ntrŭnh Công an xã đă nau tih nŭih tâm lơh bah rnăk vâl hăn ngih xã. Lah ntoh mhô geh 3 nau aơ, ma bu mô kơt tĭng ri công an xã mhâm ƀư? Ndri ma, đă jao nau dơi ân công an xã tâm luật aơ”.

            Uỷ ban Rnâng kan Quốc hội đă ntiop ăp nau tih lơh tâm rnăk vâl gay ma mbơh ƀư nau ngăn tâm nau rêh ndrel der ăp nau tih, ngăn lah tâm rnôk aơ nau tâm lơh tâm rnăk vâl geh ân lah hôm jêng nau khuch ngăn đah ăp nau ƀư, nau tih. Nau ntrŭnh ăp nau tih tâm lơh tâm rnăk vâl ân geh nau tâm boh đah ăp nau kan njrăng, rdâng, mât ndrel kơl an nŭuih khuch, nau kan rklaih mhal nŭih geh nau tih tâm tnăk vâl. Kruanh n’gâng kan ntĭmn nti Nguyễn Kim Sơn mbơh luh ăp nau tih geh ân lah nau tâm lơh đah kon se tâm rnăk vâl:

            ‘Êp nau mât rong ri hôm ntĭm. Mô dơi ntĭm ndrel ntĭm hô ir ri geh ân lah nau lơh đah kon se. Tal bar, nchâp đă tâm nau săch nau pah kan, rƀŏng nau pah kan tih đah nau ŭch bah kon se. Me mbơ̆ ri ŭch kon ƀư nau kan ma mô tâm di ma nau ŭch, nau mĭn bah kon se. Êp nê, nau rdâng lơi ăp nau kan geh tĭng ăp nau ŭch bah kon se, nau aơ kŏ ân geh nkah uănh”.

            Bah năp nau aơ, Kruanh Quốc hội Vương Đình Huệ đă lŏ ntop tay, ƀư kloh nŭih tâm lơh tâm rnăk vâl đah ăp nŭih tă rêh nsum, tă geh nau tâm boh răk rong kơt lah kon rong, me mbơ̆ mô hôm ndơn kon nơm rêh nsum, ngăn lah kơp uănh ăp nau tih đah me yông lơh ngăn kon êng sai nơm mô lah sai yông lơh ngăn kon êng bah ur nơm:

            ‘Ndơn nau mhâm geh, moh nau kan gay ma rgum. Nau tâm lơh geh tât nau aơ ri jêr ngăn. Ăp nŭih ƀư nau kan tư pháp, khoa học pháp lý hùnh sự, công an, viện kiểm sát, ngih phat dôih...min ntop tay. Ngăn lah, uănh kơl an ân ăp nŭih lah me yông ma lơh ngăn kon êng bah sai nơm. Bơ̆ yông mô lah băl me păng, ê tâm di lah rnăk vâl yơn lah vay lơh ngăn kon êng ur nơm. Gâp saơ tâm luật aơ ŭch geh ƀư rjăp tay nau kan aơ”./.

                        Nŭih rblang: H’Thi