VOV4.M’nông: Tâm pơh rlau aơ, tâm rơh rƀŭn tal 9 bah Uỷ ban Rnâng kan Quốc hội, hŏ geh rơh rƀŭn ôp nau Kruanh n’gâng kan ntŭk ntu gŭ âm Trần Hồng Hà. Ăp ntoh măt đă geh nau kan gay ma rklaih rjăp âk ntŭk ƀư nau ntuh kơl trok prăk neh prêh, jêh ri nchlơi dơm, mô lah ân geh rklaih nau tih đah nau ƀư nau kan mô tâm di, geh nau ƀư rlăm gay ma n’hao rnoh tăch neh. Tâm nar ôp nau, Kruanh n’gâng kan ntŭk ntu gŭ âm Trần Hồng Hà hŏ ƀư kloh nau kan ma âk nŭih uănh khlay.

            Rơh ôp nau Kruanh n’gâng kan ntŭk ntu gŭ âm khuh n’gôr nkre tă bah ăp nau ôp bôk năp mpeh nau kan ndrel nau ƀư njrăg nau ndăn trok prăk tâm rnoh  tăch neh. Wa Nguyễn Đại Thắng, rmôt kan bah n’gor Hưng Yên ôp nau:

            ‘Nau ma cử tri mbơh lah rnoh neh tâm âk ntŭk rnôk aơ geh nau ƀư mpôn. Geh âk ntŭk ăp nŭih ntuh kơl ƀư nau kan kan nsum ma mpôn lor jêh ri nchlơi dơm. Nau geh dơi dơi rvăt đah rnoh khlay ir, rnoh âk rlau âk tơ̆ rđil đah rnoh ntơm geh, kơt lah nau ƀư leo tăch ndrel rvăt neh tâm Nkuăl đô thị Thủ Thiêm. Nau nê ƀư nau mô ueh tâm nau kan tăch rgâl, ntrŭt rnoh hao khlay, njêng nau kan ƀư khlay ma mô nâp, ndâk nau geh ân tâm ban neh mhe ƀư nau ntrơn leo ntŭk, ntrŭnh ƀư nau kan ri mâp nau jêr ngăn. Đă Kruanh n’gâng kan ân geh nau rklaih ndâk nau kan ba lơ nê”.

            Kruanh n’gâng kan Trần Hồng Hà lah rjăp, nau nchrăp rvăt neh ntu mô êng knŭng rŏng ma n’hao rnoh khlay ma hôm ƀư n’huch rnoh khlay ndrel phung ƀư leo hăn tăch rvăt neh ƀư jêng nau tăch rgâl neh ntu khuh n’gôr, ƀư roh rui drăp ndơ bah ngih dak:

            ‘Nau kan ƀư leo n’hao n’hapo rnoh neh mhe, khuch ngăn tâm ăp ntrong kan văng sa. Lah jru lơn tay, nau kan ƀư hao khlay mra geh âk nau khuch, ngăn lah ăp ngân hàng, Rnôk lah rnoh mô geh ngăn, mô mpơl ngăn yơn nau rhuăt prăk bah ngân hàng mra ngăn. Khuch ngăn tât nau mât đăp mpăn bah prăk kaih”.

            Nkô̆ nau nau kan aơ, tĭng Kruanh n’gâng kan Trần Hồng Hà dôl lah nau kan ntrơn rgâl ăp luật êng, kơt: Luật đấu giá, Luật neh ntu ndrel ăp nau ntrŭnh geh tât tơm prăk ndrel ma soay. Ndri ma, hôm âk luật geh tât nau ntrŭnh mô geh ngăn, kơp n’ăp ma nau ƀư kan:

            ‘Ân geh ntrŭnh nau kan tâm rnôk ƀư leo tăch rvăt đah drăp ndơ lah neh ntu. Ân geh nau kan êng lơn rđil rnôk aơ, nau kan ƀư ân rjăp lơn. Luật neh ntu mhe ntrŭnh nau dơi ăp ntŭk kan tăch rgâl râng nau tăch rgâl yơn ê geh ntrŭnh n’hêl ăp nau nchrăp mhâm ƀư, ngăn lah ntoh nau dơi ân ntŭk ƀư nau kan tăch rgâl ê geh ƀư tĭng luật, nau kan...mô lah ntrŭnh nau mpeh prăk nchăm, mô lah rnoh rnôk tăh ndrel jêh rnôk ntoh nau n’hao lơn âk tơ̆. Ăp nau kan kơt nê lah du nau nchrăp leo rvăt ueh ndrel mô geh ueh ri ân geh ntrŭnh yor pháp luật”.

            Lŏ nchră nau đah Kruanh N’gâng kan Trần Hồng Hà, wa Nguyễn Thị Xuân, rmôt kan ntoh măt Quốc hội bah n’gor Dak Lak ndrel wa Tạ Văn Hạ, rmôt kan ntoh măt bah n’gor Quảng Nam mbơh, rnoh prăk Ngih dak dôl ma geh nau khuch ngăn ndrel đă ân geh rklaih, mô lah ân mhal tih hình sự. Wa Tạ Văn Hạ đă:

            ‘Lah geh nau kơt ma nơm ndơn saơ lah ƀư nau mô ueh, geh nau ŭch ƀư rlăm gay ma n’hao rnoh neh, manh ngân hàng, in tih prăk ngân hàng. Rlau ma nê đŏng lah nau ŭch ƀư khuch ngăn tât jâng văng a bah neh dak. Mhâm nơm mô rklaih nau nê? Ntŭk aơ ân geh rklaih ân năn ri mơ bah ăp nau khuch kơt rnôk aơ? Nau kan, nau ntrŭnh mpeh rnoh ndoh ndơ ri mhâm ƀư, hŏ geh tâm di đŏng mô la ê dơi ri mhâm nơm mô ntrŭnh ân geh tâm dăch kơt nê, gay ma n’hao âk tơ̆”.

            Kruanh n’gâng kan Trần Hồng Hà tâm ban nau ân geh rklaih nau kan aơ, yơn ân geh uănh kloh ndrel leo mhal tih bah ăp ntŭk kan. Ndơn ntop ơh nau bah Kruanh n’gâng kan, Kruanh Quốc hội Vương Đình Huệ, ngơi:

            ‘Gâp gĭt kloh nau kan ƀư kơt nê, nê lah nau leo lăp kan bah ƀon lan ndrel nau tâm boh ma n’gâng kan ma hôm njêng jêng nau tih hình sự ri mơ kuăl lah nau ƀư jêng hình sự. Đah nau kan leo rlong tăch rvăt ndrel ma nchlơi lơi prăk nchăm mhe nơh, nau kan uănh gay ma mhal nau tih dân sự ri ân geh mhal tĭng pháp luật dân sự. Hôm nau tih hành chính ri mham tih hành chính. Lah tâm nau kơp, uănh nau tih hình sự ri ân geh mhal tih hình sự. Tâm nau kan aơ, tih moh nau kan ri mhal tĭng pháp luật tâm nau ƀư kan nê”.

            Mpeh nau kan tâm rơh tât, Kruanh n’gâng kan Trần Hồng Hà lah rjăp tât nau kan tơm prăk ndrel nau kan soay:

            ‘Gay dơi geh dŏng nau kan kơl an hŏ ƀư jêh, neh ntu ê geh jêh ri ân geh n’hao nau ntop tơm prăk gay ma ntop ân tơm prăk soay. Đah nau ntuh kơl rvăy neh ntu, nau leo tăch nkra ri ân geh sŏk soay prêh lơn tay. Yor neh ntuh kơl mô geh ntoh luh ăp nau kan geh tât rnoh văng sa ân nau rêh lah ăp nau kan gay ma geh ƀư”.

            Mbơh tay nau kan tâm nar ôp nau, Kruanh n’gâng kan tơm prăk Trần Đức Phớc lah rjăp du đê̆ nau kan tâm rơh tât ân geh rgum soay mpeh ntu neh tâm di đah rnoh leo tăch neh ntu. Êp nê, n’hao prăk nchăm ndrel njoăl tâm tìa khoản yor rmôt kan nchrăp rvăt mât. Kruanh n’gâng kan tơm prăk đă nau rgâl ăp nau kan tăch rgâl neh tâm rnôk ntơm ƀư:

            ‘Lah kơp nau ntrŭnh 44 ndrel nau ntrŭnh 36 mô geh nau rgâl, ri rnoh neh hôm geh năl lah mô gĭt kloh ngăn ndrle mô tâm ban, nau kan ƀư jêng rmeh lah nơm ân geh leo ăp rnoh mrô yơn lŏ kơp luh rnoh mrô ri mô geh nau tâm di ôh. Ăp nŭih nơm ân geh mĭn uănh tay, lah mô geh nau rgâl cán bộ mêt uănh ri hôm geh nau tih ndrel lah mô rgâl nau mĭn kan aơ, ri ntŭk kan mêt uănh êng lŏ geh nau tâm nchră êng. Ndri ma phung nơm sŏk nau nchrăp ƀư kan, nau geh, tơm prăk ƀư nau kan gay ma kơp tât nau ƀư kan lah mô geh tâm di”./.

                        Nŭih rblang: H’Thi