VOV4.M’nông: Pơh rlau aơ, tâm rơh rƀŭn tal 10, ngoai tâm ăp nkô̆ nau khlay lah Uỷ ban Rnâng kan Quốc hội hŏ săch 4 nkô̆ nau gay ma mêt uănh bah Quốc hội, Uỷ ban Rnâng kan Quốc hội tâm năm 2023 ndrel rgop nau tâm bôk nau kan bah rơh rƀŭn tal 3, Quốc hội gưl 15.

            Tâm 4 nkô̆ nau kan mêt uănh năm 2023, Quốc hội uănh 2 nau kan ndrel Uỷ ban Rnâng kan Quốc hội uănh 2 nkô̆ nau. Nê lah: Nau kan rgum, mât ndrel dŏng ăp tơm kơl an nau njrăng, rdâng srê Covid-19, nau ƀư nau kan, pháp luật mpeh dak si tâm dâng, dak si njrăng rdâng. Nau ntrŭnh ƀư ăp nau kan bah Quốc hội mpeh ăp Bôk nau kan bah neh dak (ndâk njêng ƀon lan mhe lvang năm 2021-2025, n’huch ach o nâp nâl lvang năm  2021-2030, hun hao nau văng sa, rêh jêng nkuăl nroi mpôl đê̆ ndrel gôl yôk lvang năm 2021-2030). Ƀư nau ntrŭnh mrô 88 năm 2014, Quốc hội gưl 13 ndrel nau ntrŭnh mrô 51 năm 2017, Quốc hội gưl 14 mpeh nau rgâl mhe bôk nau kan, săm ƀŭt ntĭm nti phổ thông. Nau ƀư nau kan, pháp luật mpeh hun hao ŭnh nar ndâk mhe.

            Geh nau đă ntop bôk nau kan mêt uănh mpeh nau kan ntop, leo nau kan cán bộ lvang năm 2011 tât rnôk aơ yor nau sa khâm dôl ma tât jêr, ƀư kol nau mât nau rđau tâm du đê̆ ntŭk, nau nâp ndâk njêng ndrel ƀư nau kan ntơm bah nau nâp bah nŭih kan. Yơn lah, Tổng thư kú Quốc hội Bùi Văn Cường ân lah, nau săch nkô̆ nau mêt iănh ƀư tĭng nau ntrŭnh. Nsing tâm nau dôl geh mra đă leo tâm ăp rơh ôp ndrel ơh nau ôp mô lah Bôk nau kan mêt uănh tâm rnôk ueh. Êng ăp nau đă mêt uănh đah bôk nau kan têm nkrem, njrăng mpŭng lir, têm nkrem, Kruanh Quốc hội Vương Đình Huệ ân lah:

            ‘Ăp năm nơm mêt uănh nau mbơh mpeh nau têm nkrem, njrăng rdâng nau mpŭng lir. Rnôk aơ nơm ân mêt uănh gưl prêh mpeh nkô̆ nau aơ. Ri ma săk gâp nơm ri mô ŭch ôh đah nau mbơh ăp năm, jêh ri mô geh mêt uănh. Ntoh ngăn kơt nau têm nkrem, rdâng njrăng mpŭng lir ăp năm kŏ geh nau mbơh đŏng ma mô êng knŭng mbơh ma hôm tâm nchră ta Quốc hội. Hŏ ngơi ri nơm mêt uănh, kơt lah geh tâm dăch ngăn tât nau rêh ƀon lan”.

            Tĭng bôk nau kan rơh rƀŭn tal 3, Quốc hội rgum tâm Ngih kan Quốc hội. Yơn lah hôm geh nau nchrăp nau rƀŭn trực tuyến lah ŭch. Nchrăp mông pah kan bah Quốc hội lah 2 nar. Quốc hội ntơm rƀŭn tâl nar ngoai, lơ 23/5, nchrăp lôch lơ 17/6. Chính phủ đă ntruch tay nar mbơh bôk nau nchrăp Luật neh ntu (rgâl nkra) yor nau ƀư bôk nau nchrăp ndâk Luật hŏ ntoh du đê̆ nau kan mhe ân geh tay nar gay ma mĭn rjăp. Kruanh Uỷ ban văng sa bah Quốc hội Vũ Hồng Thanh mbơh:

            ‘Geh tât Luật neh ntu, hên dôl nsôih tâm rgop đah N’gâng kan Tài nguyên ndrel Môi trường gay ma râng rƀŭn, tâm nchră ƀư rƀŭn Luật neh ntu. Ăp ntŭk kan kŏ ntrŭnh âk nau kan êng êng ri mơ tâm nchră gay đăp mpăn nau nâp bah nau nchrăp Luật. Mô lah nau nchrăp Luật aơ ân geh mbơh dăn bah ƀon lan đŏng. Ŭch đăp mpăn nâp ân Chính phủ nchrăp n’hrrl ndrel mbơh Quốc hội rơh rƀŭn tal  puăn”.

            Chính phủ kŏ đă ntop tay nau mbơh Quốc hội nchrăp Luật rgâl nkra, ntop tay du đê̆ điêug bah Luật Công an ƀon lan, Nau ntrŭnh mpeh nau ntoch jong mông ƀư nau ntrŭnh mrô 42 năm 2017, Quốc hội gưl 14 mpeh nau rklaih rnon mô dơi trok bah ăp ntŭk ân manh, Nau ntrŭnh mpeh rlong ƀư nau kan hun hao n’gor Khánh Hoà. Mbơh rgop hội ân rgop 03 nau nchrăp: Luật trong hăn, Kuật đăp mpăn, đăp mpăn trong hăn, luật rmôt kan râng nau mât rna ửnăng đăp mpăn tâm dâng. Nkre mbơh Quốc hội ntrŭnh ƀư nau ntuh kơl 05 nau kan: Trong teng 4 nkuăl Thủ đô Hà Nội; Trong teng 3 nkuăl ƀon têh Hồ Chí Minh; Trong hăn ngăch Châu Đốc-Cần Thơ-Sóc Trăng; Trong hăn ngăch Khánh Hoà-Buôn Ma Thuột, Trong hăn ngăch Biên Hoà-Vũng Tàu. Geh tât nkô̆ tâm nchră mpeh nau ntrŭnh ƀư trong Hồ Chí Minh rơh mhe, Kruanh Uỷ ban Khoa học ndrel Công nghệ ndrel Môi trường bah Quốc hội Lê Quang Huy ntoh nau hôm kol rnôk aơ lah pă tơm prăk:

            ‘Tơm prăk ntuh kơl nsum ngoai tâm ăp nau kan nê lah ăp ntrong ƀư  ê năn jêh, hôm du đê̆ dơm gay ma ƀư ân geh nau tam. Phung hên đă âk tơ̆ gay ma pă, mbrơi ngăn ma rnôk aơ knŭng hôm 200km dơm. Trong Hồ Chí Minh hăn rlet nklăp 30 n’gor. Rnôk aơ hôm nklăp 200km geh nklăp 9 n’gor Thái Nguyên, Phú Thọ, Hoà Bình, Hà Nội. Mpeh ba dâng Tây Nam Bộ ri ngăn đah Kiên Giang, Bạc Liêu ndrel Cà Mau...Phung hên đă lah ân geh nau tâm nchră ri nau ntrŭnh gay ma ƀư”.

            Kruanh Quốc hội Vương Đình Huệ  đă uănh khlay tât nau rgum, rgop nau đă mbơh bah Quốc hội tâm nchră tâm rmôt ndrel ngih rƀŭn, tâm rgop, ƀư ân ueh mpeh nau kan, săm ƀŭt, nkoch mbơh, báo  chí, ăp nau dơi mpeh ntŭk ntu ƀư kan, njrăng, rdâng srê nuh, gay ƀư ueh ân rơh rƀŭn./.

            Nŭih rblang: H’Thi