VOV4.M’nông: Kŏ tâm khay kan kơl an kon se, kơt tĭng Nar lam ntur neh njrăng, rdâng pah kan kon se năm 2022 đah nkô̆ “Pah kan kon se ndrel nau rêh jêng”, nkre n’hao nau kan bah aơ N’gâng kan, ntŭk kan, rmôt kan, ăp ntŭk ndrel nsum mpôl tâm nau njrăng, n’huch pah kan kon se, Bộ Lao động-thương binh ndrel Xã hội tâm rgop nsum đah ntŭk kan pah kan lam ntur neh (ILO), tơm kơl an kon se Liên hợp quốc UNICEF ta Việt Nam ƀư tâm nchră “Njrăng rdâng ndrel n’huch nŭih pah kan kon se ndrel đăp mpăn nau rêh jêng tâm nau ƀư nkô̆ nau hun hao nâp nâl”.

          Nau kan njrăng ndrel n’huch pah kan kon se ta Việt Nam tâm rơh rlau aơ hŏ geh âk nau ueh. Nau geh jêh mêt uănh bah neh dak mpeh pah kan lah kon se ân saơ, rnoh kon se râng pah kan n’huch ntơm 15,5% năm 2012 jur hôm 9,1% năm 2018. Rnoh kon se ta Việt Nam dêh rlau 2% rđil nau geh bah nkuăl Châu Á-Thái Bình Dương. Nau geh aơ geh âk lah rnơm nau n’hao nau ntĭm nti ân kon se, ƀư ueh nau kan kơl an nau rêh, nau n’huch ach o ta Việt Nam. Gay nsôih ƀư ăp nau ton bah Việt Nam tâm nau kan 8.7 mpeh jut lơi kon se pah kan tâm nau rƀŭn 2020, wa Vũ Thị Kim hoa, Groi Kruanh n’gâng kan kon se, N’gâng kan Lao động-Thương binh ndrel Xã hội nchrăp luh nau khlay:

          ‘Rgum ƀư ăp nau kơl an mpeh nau njrăng, saơ nau kơl an kon se pah kan, tâm nê rgum ntrŭnh ƀư nau kan kŏ kơt lah ntrong kan saơ oem nŭih pah kan lah kon se tâm rgop ma ntrong mât kơl an kon se, kơl an ăp nau dơi pah kan ân tâm di đah năm, rnoh geh têh jêh ri ntrŭnh bah pháp luật đah nau dŏng nŭih pah kan ê têh, kơl an nŭih pah kan kon se, kon se mra geh nau khuch jêng pah kan jâk geh ndơn kơl an ăp bôk nau kan, nau ƀư n’huch ach o ndrle kơl an nau rêh. Kơl an kon se geh nau khuch kơt lah kon se geh ndơn kơl ntĭm nti hăn nti ndrel ntĭm mbơh nau nti kan ân tâm di, ntrŭnh ƀư nau njrăng, n’huch rnoh nŭih pah kan lah kon se tâm nau kan tuch tăm”.

          Ndơn năl nau tâm boh ngăn đah ăp nau kơl an tâm nau rêh đah nau njrăng, n’huch pah kan kon se, rgop nau bư nkô̆ 8.7 mpeh jut nŭih pah kan kon se. Tiến sĩ Nguyễn Hải Hữu ân lah, nau khlay lah n’hao nau gĭt bah ăp me mbơ̆ ndrle nsum mpôl mpeh nau mât chăm nau rêh ân kon se:

          ‘Đah Việt Nam ân geh kơl an bôk năp lah nau gĭt, nau gĭt bah ăp me mbơ̆ kon se ndrel nsum mpôl gay ma mât chăm ân kon se mhâm ƀư gay ma ntĭm nti yơn dơi râng nau kan ma mô geh ăp nŭih lah kon se mô tih pháp luật. Ndrel bar đŏng lah ndơn năl mpeh ăp gưl kan geh tât nau ntuh kơl ân nau rêh jêng, ntuh kơl ân kon se, yor nau ntuh kơl ân kon se nơm dŭt dêh ngăn. Nau kan tal 2 ri nơm ân geh mât chăm kơl an geh dŏng đah ăp nau kan ntĭm nti lah ueh. Ndri ma kon se ân geh nti ndrel geh n’hâm soan ân jêh aơ mơ geh nau kan pah ân ueh. Đah rnăk vâl ri nơm ân kơl an, ngăn lah ăp rnăk vâl ach o ndrel êp ach o ân geh kơl khân păng mpeh nau kan. Ngăn lah me mbŏ ân geh kan pah đăp mpăn, nâp nâl ri khâl păng mơ geh prăk ân ma oh kon mô kâp hăn pah kan”.

          Ăp nŭih ƀư mât nau kan lah gay ân Việt Nam ndrel ƀư nkô̆ nau 8/7 mpeh nau jut lơi nŭih pah kan lah kon se, ân geh nau tâm rgop đah N’gâng kan tuch tăm ndrel hun hao ƀon lan, N’gâng kan ntĭm nti ndrel Tổng liên đoàn Lao động Việt Nam tâm nau ƀư ăp nau kan, nau njrăng rdâng, n’huch nŭih pah kan lah kon se./.

          Nŭih rblang: H’Thi