1. Rơh rgâl mhe ƀư ueh nău kan ngih dak, pă dăp tay nkual neh hành chính n'hanh leo kan n'gâng kan ta ntŭk 2 gưl.

 Lơ 1/7/2025, lam dak na nê̆ pơk dŏng n’gâng kan ƀon lan 2 gưl. 63 n’gor, nkual ƀon têh jêh rnôk nglăp nsum hôm 34 n’gor, nkual ƀon têh đah 3.321 xă, phường, đặc khu. Tổng Bí thư Tô Lâm lah rjăp ntrŭnh “dăp tay bri dak:” lah njoat hăn têh geh nkô̆ nău khlay, du lvang hun hao mhe tâm nău kan jêh n’gâng kan hành chính ngih dak, lôch jêh trong ƀư n’hanh rmôt kan  bah trong chính trị rĭng, đêt, tam, săk rnglăy, rƀŏng tât lôch jêh du trong hành chính mât uănh mhe, êp ƀon lan, dăch ƀon, yor ƀon lan rhŏ an, gay ăp nău geh sĭt đah ƀon lan.

Ta năp nĕ, ƀư tĭng Nghị quyết 18-NQ/TW bah Ban Chấp hành Trung ương Đảng khoa 12, jêh dăp, đêt lĕ hŭch 4 ngih pah kan Đảng mpeh tâm Trung ương; 25 ban cán sự đảng; 16 đảng đoàn; 5 ngih pah kan bah Quốc hội; 5 bộ n’hanh 3 ngih pah kan mpeh tâm Chính phủ; 30 tu bôk gưl tổng cục; 1.025 ntŭk kan gưl cục; 4.413 chi cục; jrô kan n’hanh 240 ntŭk kan sự nghiệp. Ta ƀon lan, hŭch 466 n’gâng kan; 644 đoàn, đảng đoàn n’hanh ban cán sự đảng; 3.984 ntŭk kan gưl jrô kan; 27 đảng bộ gưl bah lơ na nê̆ n’hanh ăp rmôt kan bah dâng đảng.

2. Ntrŭnh mbơh 7 Nghị quyết trong kan tơm ndơ̆ neh dak lăp ta rach năm hun hao mhe.

7 nghị quyết tơm khlăy bâh N’gâng kan Chính trị ntrŭnh dŭt năm 2024 n’hanh 2025, tâm nĕ 4 nghị quyết; Nghị quyết mbrô 57-NQ/TW mpeh hun hao khoa học, công nghệ, rgâl mhe nău mĭn kan n’hanh rgâl mhe rnoh mbrô ngih dak. Nghị quyết 59-NQ/TW mpeh rgâl mhe nău kan rdâk njêng n’hanh ƀư tĭng pháp luật an tâm di đah nău ŭch hun hao neh dak ta rơh rach năm mhe. Nghị quyết mbrô 68-NQ/TW mpeh hun hao wăng sa kan êng dơi geh uănh lah “poăn jrŏng tơm” đah ăp nău tơm khlăy gay ma hun hao neh dak ta rơh lăp kan mhe aƀaơ, 3 nghị quyết bôk nău kan mbrô 70-NQ/TW, 71-NQ/TW, 72-NQ/TW, tâm ban đah 3 trong kan “ƀon lan mât nău rêh jêng” geh nău tât đah ƀon lan lah nău dơi, ntĭm nti, mât chăm săk soan ƀon lan. Ăp nghị quyết rgum ta du trong kan tơm khlăy yơn dơn ngoăy du nău mpŏng nsum lah rdâk njêng nău kan nâp dăng gay ma Việt Nam hun hao ngăch, nâp nâl.

Ăp gưl uỷ, ntuk kan đảng, ntŭk kan ngih dak, mpôl kan bâh trung ương tât ntŭk kan ba dâng lĕ geh ngăch ndăn ƀư na nê̆ ăp nghị quyết jêng bôk nău kan, đề án, nău nchrăp ah kan na nê̆, ndrel đah nău dơn kan nuĭh leo bôk năp đah nău geh ƀu tĭng, “mât đăp mpăn kloh nău, di nuĭh, ngăch kan, geh săk rnglăy na nê̆”.

Quốc hội nkra rgâl Hiến pháp n’hanh mbơh an âk trong mkra mhe.

 Lơ 16/6/2025, ta rơh rƀŭn tal 9, đah 100% đại biểu geh măt nsơr ty tâm ban ŭch, Quốc hội lĕ mbơh an nghị quyết nkra rtgâl, ntop tay du đêt nkô̆ bah Hiến pháp năm 2013. Nău ntrŭnh têh aơ jêng trong pháp lý an nău dơh đêt n’gâng kan Ngih dak, tâm di nău ŭch hun hao tâm lvang mhe, lơn lah dăp tay n’gâng kan ƀon lan n’hanh ăp nău ntrŭnh mpeh măt trận Tổ quốc Việt Nam, ăp rmôt kan chính trị-rêh jêng, ăp rmôt nsum mpôl yor Đảng, ngih dak jao nău kan.

Rlău 2 rơh rƀŭn way ƀư n’hanh du rơh rƀŭn ndal tâm năm 2025, Quốc hội khóa 15 geh ăp nău mhe geh nău rgâl, tă bah dĭng lĕ 89 luật, 91 nghị quyết, geh rlău 40% dĭng lĕ luật, nghị quyết tâm lĕ năm kan khóa 15. Quốc hội lĕ nkra rgâl, ntop tay âk luật ntrŭnh ăp nău khlay kơt neh ntu, ntuh kơl nsum, rmôt kan n’gâng kan ƀon lan, jao an nău dơi an ƀon lan tâm nău ntrŭnh ntuh kơl, tâm pă tơm prăk, dăp n’gâng kan.

4. Đại hội Đảng ăp gưl geh nău dơi njêng bôk nău kan gay ma mpŏng tât Đại hội 14 bâh Đảng.

Rlău 60 rbăn ntŭk kan Đảng, tâm nĕ geh 40/40 Đảng bộ bâh Trung ướng lĕ ƀư lôch dơi Đại hội Đảng bộ năm kan 2025-2030 đah nău nsum ntoh lư lah nău kan nchrăp ƀư na nê̆, tâm di, mbơh tơih ngăch ueh n’hanh ơm đăp mpăn nău kan lôch đại hội. Aơ mô dơn lah rơh sinh hoạt chính trị têh khlăy tâm le Đảng, lĕ tahen, lĕ ƀon lan ma hôm nha lah nău kan gay ma ƀư dơi Đại hội 14 bâh Đảng. Ngăn lah, lĕ rngôch 34 bí thư thư n’gor uỷ, thành uỷ n’hanh du đê̆ ntŭk kan tơm ta ntŭk lôch đại hội lĕ mô di lah nuĭh ta ntŭk, tĭng di nău ntĭm đă bâh trung ương, mpơl nău nsrôih rgâl mhe nău kan cán bộ, n’hao nău dơi kan, n’huch nău tât ta ntŭk n’hanh n’hao nău dơi kỷ luật, kỷ cương tâm lĕ trong kan chính trị.

Ta gưl Trung ương, Đại hôị Đảng bộ Quốc hội, chính phủ, Mặt trận Tổ quốc Việt Nam, ăp ntŭk kan Đảng trung ương, Quân đội n’hanh công an lĕ leo kan pă dăp ntŭk kan tĭng nău mhe, ueh dơh lơn, gĭt na nê̆ nău dơi, dơn kan na nê̆, gĭt nău dơi, an tâm di đah nău ŭch bâh gưl leo kan tâm rơh hun hao mhe.

5. Hao jêng GDP âk ngăn tâm 5 năm bah năp

Tâm rnôk jâng wăng sa lam ntŭr neh âk roh đăp mpăn, lơn lah ntŭl rlong yor nău kơl soăy bah Mỹ n’hanh khuch hô yor trôk nar, Việt Nam geh ngăch hao jêng GDP năm 2025 rlău 8%. Aơ lah rnoh hao jêng âk ngăn tâm 5 năm bah năp. Tăch n’gluh lah ntŭk uĕh bah jâng wăng sa rnôk dăp rgâl ndoh ndo hao uĕh an rmôt nkret njêng, ê nkra. Geh prăk tăch n’gluh geh rlău 920 rmen đôlar. Wăng sa têh đăp mpăn tay, ntoh hao mhe dơi uănhg nđôi nchrăp ta rnoh bah dâng 4%. Sŏk an tơm prăk ngih dak tât n’gul khây 12/2025 geh nklăp 2,47 rkeh rmen prăk, rlău 25% nchrăp trok n’hanh hao âk nkôp đah rơh năm  bah năp. GDP rĭng geh bôk nuĭh geh nklăp 5.000 đôlar, hao 1,4 tơ̆ nkôp đah năm 2020, ndơ̆ Việt Nam tâm rmôt dak rĭng geh âk ngăn. Ntŭk tăch rgâl prăk kaih đăp mpăn, ntŭk tăch rgâl chứng khoán dơi hao ta ntŭk tăch rgâl mhe hao 2 gưl tâm năm 2025.

6.Ntrôl dăng nău mât đăp mpăn rêh jêng, ƀư lôch jut jăng ngih rông mpông sat.

Lơ 26/8/2025, bôk ntuh n’hanh nău kan tâm rlong “lam dak nsum ti jut jăng ngih rông mpông sat” lôch 1 năm 4 khay mbơh tơih, sĭt tât ơm lor rlău 5 năm 4 khay. Bơi tât 50 rbăn rmen prăk le geh dŏng gay ma jut jăng 334.234 ngih truh sat. Nar 30/11/2025. Thủ tướng Chính phủ geh rgŏ jă tay, mbơh tơih nău kan Quang Trung ngăch ndăn rdâk njêng tay ngih jay, nkra tay ngih jay geh khuch khat yor mih sial dak buk ta ăp n’gor miền Trung đah nkô̆ mpŏng ŭch ƀư lôch mhe 1.628 ngih jay ta năp lơ 31/1/2026 n’hanh ƀư lôch nkra mhe 34.352 ngih jay khuch djơh ta năp lơ 31/12/2025.

Ndrel đah nĕ, âk nău kơl kan mhe mpeh dak si, ntĭm nti lĕ geh ntrŭnh. Nghị quyết 71-NQ/TW geh nău mbơh tơih gưl nti mầm non 3-5 năm deh n’hanh n’hao rnoh mom ndăm lôch nti THPT hao dŭt đê̆ ngăn lah 85% ta năm 2030, bâh năm nti 2025-2026, oh kon se mầm non n’hanh kon hoc nti phổ thông công lập mô geh sŏk prăk nti. Ntơm bâh 100 ngih nti phổ thông 2 gưl bán trú ta ăp xã n’har bri. Nghị quyết 72-NQ/TW geh nău nchrăp năm 2026 lam ƀon lan geh uănh săm săk soan mô sŏk prăk.

7. Rgâl hao mpeh ntung trong, jêng n’gâng tơm nâp an neh dak hun hao

Năm 2025 nchih saơ nău rgâl hao dăng mpeh hun hao ntung trong, lah nău bôk năp, n’gâng tơm khlay an trong boăt nthoi ntung trong rĭng, mhe, tâm di nău ŭch hun hao bah neh dak tâm rach năm mhe. Jêh 3 lễ ntơm ƀư, sa nkra ăp ndơ ƀư, nău nchrăp ƀư têh khlay rĭng lĕ tâm lam dak; lĕ geh 564 ndơ ƀư, nău nchrăp ƀư đah dĭng lĕ rnoh ntuh kơl rlău 5,14 rkeh prăk; bơi 140 ndơ ƀư têh lĕ jêh, ndơ̆ an dŏng, sŏk dŏng săk rnglăy. Tâm nĕ, dôl uănh lah sa nkra, soih ndeh kỹ thuật rlău 3.500 km trong hăn ngăch, wơt rơh mpăr bôk năp ta tach ndeh par Long Thanh, ndơ̆ an dŏng Ntŭk rgum tăch mpla nsơ lam dak, ăp nău nchrăp ƀư ŭnh nar khlay... nkre, rdâk ƀư âk nău nchrăp ƀư tach ndeh păr Gia Bình, ndrâm dak lêng Hòn Khoai, nkual têh Cần Giờ, nkual têh thể thao Olympic, ăp nău nchrăp ƀư trong ndeh trêng nkual têh, nchrăp ndâk ƀư trong ndeh treng hăn ngăch Bắc-Nam, ăp nău nchrăp ƀư rhŏ an APEC năm 2027 ta Phú Quốc.

8. Leo ƀư dơi đại lễ kahgĭt 80 năm Cách mạng Khay 8 geh nău dơi n’hanh Quốc khánh lơ 2/9, 50 năm Nar rklaih đăp mpăn miền Nam dơn ngoăy neh dak.

Âk nău kan kahgĭt  tâm năm 2025 lĕ geh ƀư geh nău dơi, dŭt ueh, tâm di đah nău kan têh n’hanh dŭt đăp mpăn. Tâm nĕ, ăp nău kan bâh 2 rơh lễ têh kahgĭt 80 năm Cách mạng khay 8 geh nău dơi n’hanh Quốc khánh 2/9, 50 năm nar rklaih đăp mpăn miền Nam, dơn ngoăy neh dak lĕ an tay nău kahgĭt tê khlăy ê hŏ tă geh bâh ntơm. Rơh hăn tahen, hăn nsong ta Quảng trường Ba Đình ôi lơ 2/9 ta thủ đô Hà Nội n’hanh ta trong Lê Duẩn ôi lơ 30/4 ta nkuăl ƀon têh Hồ Chí Minh đah rkeh nuĭh ƀon lan n’hanh ăp mpôl kan tahen tât râng. Rup bâh ăp mpôl hăn nsong, tahen hăn tâm ti ut bâh ƀon lan mô dơn trĕ lam nău ueh mpeh nău ŭch rŏng đăp mpăn ueh lăng tâm rnglăp tât băl mpôl lam ntur neh ma hôm nha geh an tay nău kahgĭt têh khlăy mpeh nău ryơk kan, n’hao mpư mpôl rnoi.

 9.Trôk nar lơh hô ngăn n’hanh sôt rmanh mô hŏ tă saơ khuch khat hô đah nuĭh n’hanh drăp ndơ.

Năm 2025 dơi uănh lah ngoăy tâm ăp năm trôk nar geh ndôt ndal, hô ngăn n’hanh sôt rmanh ngăn tâm lịch sử trôk nar Việt Nam đah âk rup ndah klach ntoh ta lam hvi, nthoi tay n’hanh nklân âk kơt phŭt, mih têh lam hvi, dak bŭk, dak rchoh n’hanh pĭch rlâm neh. Trôk nar ta lam dak lĕ ƀư 468 nuĭh khĭt, roh, 741 nuĭh sôt rmanh; bơi 4.200 jay geh rlâm, chôt, 348.834 jay djơh; 545.395 ha ba, tuh mbo geh dak băm, khuch khat; 71.687 mlâm ndrôk rpu, 5,16 rkeh kik djar khĭt, klôn rdu; 171.763 nkĭ nkân tui ka geh khuch khat; 1.070 km rbông, n’hong dak geh khuch khat; 140 km kơh dak me, kơh dak lêng pĭch rlâm; 1.259 km trong ndeh geh khuch khat. Dĭng lĕ khuch khat kơp êng rlău 98.677 rmen prăk.

10. Công nghiệp văn hóa nkah mbơh đah âk bôk nău kan nghệ thuật, phim geh dŭt têh rnê nsơm mpeh nău geh n’hanh rnoh năch uănh dŭt âk ngăn.

Năm 2025 mpơl an saơ du nău geh nău dơi bah dih bâh n’gâng kan công nghiệp văn hoá Việt Nam rnôk ma ntŭk mbơh nău njêng ăp nău kỷ lục ê hŏ tă geh mpeh nău geh prăk n’hanh rnoh nuĭh uănh. Ăp bôk nău kan geh ƀư tĭng nău mpŏng lam ntur neh, tâm rgop ueh đah rnoh khlăy way ơm n’hanh nău ngơi ueh mhe, geh âk nău ueh, ntop trĕ lam nău mĭn rŏng dak tĭng trong geh gĭt mhe. Ta trong kan điện ảnh, kơp dơn rnoh kỷ lục nău geh âk ngăn tâm lịch sử phòng vé Việt Nam đah phim “Mưa đỏ” geh tât rlău 714 rmen prăk n’hanh âk phim geh prăk tât rhiăng rmen êng.

Lơ 14/11/2025, Thủ tướng Chính phủ Phạm Minh Chính lĕ geh ký nău ntrŭnh an dŏng nău kan trong kan hun hao ăp n’gâng kan công nghiệp Văn hoá Việt Nam tât năm 2030, mpŏng uănh tât năm 2045. Tâm nĕ mpŏng tât năm 2030, ăp n’gâng kan công nghiệp văn hoá geh nău hun hao râng geh klâp ma 10%/1 năm n’hanh tâm rgop geh 7% GDP bâh neh dak. Tât năm 2045, Việt Nam jêng ngih dak hun hao mpeh công nghiệp văn hoá, công nghiệp pâl rlưn ta nkual châu Á.