Ôi 3/7, Radio nău ngơi Việt Nam kan nsum đah Ủy ban Nhân dân n’gor Thanh Hóa ƀư hop báo mpeh Liên hoan Phát thanh lam dak tâl XVI - năm 2024. Ƀư ntơm bah nar 9 tât nar 14/7, ta n’gor Thanh Hóa, Liên hoan Phát thanh lam dak lah nău kan nghiệp vụ bah n’gâng kan pơk ƀoh nău ngơi Việt Nam, dơi ƀư 2 năm du tơ̆, gay năl saơ, mpư rnê ăp nuĭh tơm nchih, nău nchih dŭt uĕh blău bah ăp nuĭh ƀư báo pơk ƀoh nău ngơi lam.

Liên hoan Phát thanh lam dak – Nar rgum bah ăp nuĭh ƀư báo pơk ƀoh nău ngơi hôm lah rnôk gay ăp nhà báo, biên tập viên, phóng viên tâm mâp, tâm kơt nti nău tă ơm gĭt, n’hao nău blău kan. Liên hoan Phát thanh lam dak tâl 16 geh nău tât râng bah 81 đơn vị bah 63 Radio ƀoh rup- ƀoh ngơi n’gor, nkual ƀon têh, ăp đơn vị bah Radio nău ngơi Việt Nam, Trung Ntŭk rgum pơk ƀoh rup- ƀoh ngơi Tahen ƀon lan, Cục Truyền thông Công an ƀon lan, đah 380 nău nchih. Lôch tâm rlong bôk năp dơi ƀư ta n’gor Tuyên Quang, Ban Giám khảo hŏ sơch 228 nău nchih bah 81 đơn vị lăp tâm rlong n’glĕ dŭt.