Rhơn bkah 69 năm Nar rklaih Thủ đô (10/10/1945-10/10/2023) rơh rlau aơ, ta Hà Nội geh âk nau kan geh nau khlay. Bôk nau nkah, tâm n’ur đah tahen sôt manh jru tâm lam dak gẹh moh “Chông ŭnh tă bah play nuih”, geh nau râng bah 100 ntoh măt lah tahen ơm sôt rmanh, 50 cán bộ, nai dak si tă bah 14 ntŭk kan mât rong tahen sôt rmanh tâm lam dak dnrel bơi tât 600 druh ndăm, sinh viên tâm lam Thủ đô Hà Nội.

Ăp ntoh măt djăt ăp tahen ơm tâm n’ur, nkoch tât nau kan, nau roh hoach ndrel nau kan ma ăp tahen ơm hŏ ndrel rlet rlau. Bah nau nkoch, nau rêh tâm lơh, nau kan ndel ăp nau hoach, sôt rmanh geh nkah tay gay ăp nŭih djăt ngăn lah ăp sinh viên saơ dơi nau tâm lơh jang, dăng, nâp kŏ kơt lah nau kan bah ăp tahen ơm lah êng ndrel rơh hăn bah năp lah nsum. Oh Lê Thảo Đan, sinh viên Ngih săm ƀŭt Đại học Kinh tế Quốc dân nkoch:

“Rnôk geh râng bôk nau kan, geh djăt ăp wa tahen ơm nkoch tât du rơh tâm lơh kăl e, gâp saơ nau roh hoach têh ngăn bah ăp wa, nau roh hoach năm mom bah nơm gay ma hên geh nau rêh kơt nar aơ. Săk gâp mra nsôih chiărr nti gay rgop nau leo neh dak hun hao lơn, tâm di đah ăp nau roh hoach bah ăp rơh nô, rơh mbŏ hăn lor”.

Rƀŏng tât nkah ndray 69 năm Nar rklaih luh Thủ đô. Hội Liên hiệp bu ur nkual ƀon têh Hà Nội hŏ ƀư Nar rgum “Bu ur Thủ đô ntơm njêng nău kan” năm 2023. Nar rgum lah rnôk gay mpơl nuih n’hâm nđơr ntơm njêng nău kan n’hanh rgâl mhe bah bu ur nkual ƀon têh Hà Nội, nta trong dơh an ăp nuĭh mât uănh nău kan, doanh nghiệp, n’hanh ăp mpôl ntop kơl ntơm njêng nău kan tâm mâp, tâm ôp nău tă ơm gĭt kan, kơt nti n’hanh buăt nthoi tâm boh hun hao. 

Hội Liên hiệp bu ur nkual ƀon Hà Nội hŏ mpư rnê 10 nău blău ƀư mhe. Ta nar rgum dja đŏng, ăp oh yuh hŏ blău ƀư mhe ăp ndơ sa kah khlay bah ntŭk nơm. Yuh Phạm Thị Tư Hậu, Nuĭh tơm njêng ndơ sa Yến Anh Food an gĭt:

Ba Vì ƀon tơm gâp lah nkual neh yôk ăp nuĭh way tâm pleh tăm âk ntil bum blang ma mô geh trong tăch luh. Tăch an bu hăn rvăt way geh mpet rnoh khlay jêng gâp hŏ njêng luh rlău 10 ndơ sa geh tât bum blang: kơt bánh bum blang gŭch dak đung, bánh bum blang gŭch phomai, bánh bum blang gŭch sầu riêng, bánh bum blang hôl lha mƀêt, bánh bum blang dim café… ntŭk ƀư aƀaơ tâm pă tăch an ăp nuĭh nđơn tăch lam dak n’hanh du  đêt dak băl kơt Lào, Campuchia”.  

Rhơn nkah 69 năm nar rklaih Thủ đô, ta Hà Nội hŏ geh nau mpla n’hơ rup đah nkô̆ “Ƀư nâp, ƀư rjăp nau kan, blau nau mhe, hun hao”. Mpla n’hơ năm aơ geh 260 plơk rup geh ƀư bah ăp ntil: Hội hoạ, đồ hoạ ndrel trah, geh Hội đồng nghệ thuật săch tă bah rlau 365 plơk rup bah ăp hoạ sĩ. Tâm nê, geh 229 rup vẽ, đồ hoạ ndrel 31 păng rup trah.

Tĭng nau năl bah ăp hoạ sĩ, nau ntoh ngăn bah ăp ntil rup mpla bah Thủ đô năm aơ lah nau blau lơn ma prêh. Nê lah ăp nau ntoh bah ăp ntil rup ueh ndrel nau ƀư rjăp ngăn bah ăp nŭih. Mpla n’hơ pơk luh nau dơi geh tâm n’ur bah ăp hoạ sĩ. Aơ lah rnôk ma ăp nŭih hoạ sĩ Thủ đô ndrel tâm rgop, rƀŏng tât nau hun hao nâp nâl nau kan mỹ thuật Thủ đô jêh aơ. Nŭih trah rup Nguyễn Xuân Thuỷ-Kruanh Hội Mỹ thuật Hà Nội, mbơh:

‘Mpla n’hơ rnôk aơ geh nau ueh nê lah rnê kon nŭih Hà Nội, rup ueh ndrel nau ơm yau bah Hà Nội. Bah rnôk mpla rup aơ, ăp nŭih ŭch njoăl tât nŭih ŭch ma rup bah Thủ đô nau mbơh lah Nghệ thuật Hà Nội mro hun hao, ăp nau ueh mro geh bonh kŏ kơt lah geh ndơn ƀư ndrel ƀư ueh ăp nau vay ueh ơm bah nŭih Hà Nội, nau ơm ndâk njêng ndrel mât Thủ đô kŏ kơt lah nau vay bah nŭih Hà Nội lah nsum./.