Rvăch tâm nchră n’glĕ dŭt Liên hoan phát thanh lam dak tâl 16 dôl ƀư ta nkual ƀon têh Thanh Hóa, n’gor Thanh Hóa. Lah ta rơh lễ ntơm pơk, Kruanh Ban Tuyên giáo Trung ương Nguyễn Trọng Nghĩa ŭch rŏng n’gâng kan ƀoh ngơi mbra way ƀư jăp nău Wa Hồ ntĭm nê lah: “Ƀư báo ngơi ri ân njrăng uănh mhâm nchih, mhâm ngơi gay nuĭh djăt tăng rlup rlip gĭt dơi  nău he ŭch nkoch trêng tay, mhâm ƀư an nuĭh djăt dơh nkah, dơh ƀư tĭng”.

Ndrel đah ăp ntil báo chí, pơk ƀoh nău ngơi mbra way mât nâp nău khlay kan dâk chŏl lor kalơ trong hăn rƀŏng nău mĭn - văn hóa bah Đảng, di đah nău mpŏng  n’hanh nău nsing nơm ƀon lan. Ƀư ntơm bah nar 9 tât 14/7, Liên hoan phát thanh lam dak tâl 16 hôm geh ăp nău kan khuh n’gôr. Nê lah tâm nchră dak bah dih “rgâl mbrô pơk ƀoh nău ngơi: Ngăn geh dak bah dih n’hanh Việt Nam”; Tâm nchră pơk ƀoh nău ngơi pơk sŏng dăng tâm rơh dŏng âk ndơ nkoch trêng nău lư, âk ntŭk pơk uănh; Bôk nău kan “Tâm nđŭr ăp nuĭh rŏng mprơ Chèo lam dak tâl 9 năm 2024” n’hanh tâm rlong nchuăt “Yor n’gâng pơk ƀoh dăng”.