Ta Dak Lak, ntoh lư măng nhạc Countdow (kơp rlơ̆) ta Quảng trường 10/3, phường Buôn Ma Thuột măng 31/12 đah bôk nău nghệ thuật “Rạng rỡ Dak Lak-Wơt rhơn năm mhe 2026”. Bôk nău ƀư dơi ndâk ƀư uĕh, tâm rgop âm nhạc, ŭnh ang n’hanh công nghệ mhe, đah tât râng bah âk ca sĩ, ban nhạc, rmôt njroh, DJ n’hanh ăp rmôt way mprơ.

Ndrel đah nĕ, ôi lơ 1/1/2026, ta Mũi Đại Lãnh (Mũi Điện) xă Hòa Xuân, mbra ƀư chào cờ bôk năm mhe, hăn ndrel đah nău ƀư wơt ăp năch bôk năp tât uănh nsong ta ntŭk dơi uănh lah ntŭk wơt măt nar luh ơm ngăn ta neh kơh Việt Nam. Ta aơ, ƀư bôk nău nghệ thuật wơt rhơn năm mhe, đah ăp nău ƀư chĭng gông rnoi mpôl đêt, gông lŭ n’hanh ăp nău ƀư an ndơ năch pâl nđaih...

Măng lơ 31/12, n’gor Gia Lai geh ƀư tâm ƀoh rup sŏng dăng bôk nău kahn Countdown tết Dương lịch 2026, njêng nău ntoh n’gôr, trĕ lam nău tâm rngpă, nău rŏng ueh n’hanh nău ŭch rŏng. Bôk nău kan geh bôk nău “mpoh ang play nuih- tâm rgop nău rŏng”, pơk sŏng dăng ta 2 ntŭk tâm ƀoh rup :Quảng trưòng Nguyễn Tất Thành phường Quy Nhơn n’hanh Quảng Trường Đại đoàn kết phường Pleiku, đah ntuk kan nghệ thuật geh ƀư dŭt ueh, tâm rgop đah âm nhạc ueh mhe, đah ntŭk ƀư mpoh ŭnh chrat ang n’hanh màn hình LED dŭt têh. Ngăn lah, ta ntuk tâm ƀoh rup Pleiku, nău ueh êng mpeh Tây Nguyên geh ryơk n’hao đah nău ueh bâh chĭng gong, njroh xoang n’hanh ăp nău njroh mprơ geh nău ueh êng, mpơl nău tâm rnglăp ueh đah nău way ơm n’hanh nău ueh mhe. Bâh âk nău pah kan mpeh văn hoá, n’gor Gia Lai knơm njêng nău ueh êng mbơh tơih rup ueh, nău nsrôih an năm 2026, Gia Lai leo ƀư năm pâl nđaih ngih dak.

N’gor Quảng Ngãi ƀư trong nău văn hóa, pâl nđaih ƀư ta nkual mper dak lêng n’hanh nkual yôk prêh. Bôk nău ƀư nghệ thuật “Quảng Ngãi-Wơt rhơn năm mhe 2026” ƀư măng 31/12 ta 2 ntŭk: Quảng trường trong Phạm Văn Đồng, phường Cẩm Thành đah bôk nău “Mpŏng ŭch dak lêng têh” n’hanh Quảng trường 16/3, phường Kon Tum đah bôk nău “Hơi thở đại ngàn”.Jêh nĕ, Pơh văn hóa-pâl nđaih Măng Đen đah bôk nău “Sắc hồng giữa đại ngàn” ƀư bah lơ 1-4/1/2026, ta xă Măng Đen. Pơh lễ aơ hôm geh lễ hội khinh khí cầu, bôk nău ƀư nghệ thuật “Măng Đen nar mhe”, rơh tăch ndơ lŏ mir-dak si Măng Đen 2026, ƀư ngăn mpli i ty n’hanh ngêt cà phê kah, ndrel ăp tour pâl nđaih sinh thái.