Wa Y’Dhun Hmok, bu ranh ƀon Dur 1 hôm nkah ngăn ăp nau ƀư tâm dăch dơh bah Tổng Bí thư Nguyễn Phú Trọng rnôk tât khâl ndrel râng Nar tâm rnglăp ăp rnoi tâm xã Dur Kmal, nkuăl Krông Ana, n’gor Dak Lak rnôk dŭt năm 2018. Wa geh ntoh măt ân kônh wa pă ân Tổng Bí thư ao tanh bah rnoi rđe. Wa Y’Dhun Hmok nkah:

‘Wa lah: kônh wa ân rgum pah kan jan sa gay n’hao nau rêh, oh kon ri ân geh hăn nti nê lah nau ŭch bah Wa. Ri tât rnôk aơ kônh wa geh tŏng sa, tŏng nsoh, oh kon geh hăn nti, nê lah nau rhơn. Ƀon lan ri geh rgâl mhe, kônh wa tâm ƀon lan lah ueh nau ŭch rŏng jri bah Wa hŏ ân ma ƀon lan Dur Kmal”.

Hôm wa Hmyet, Bí thư nkre lah Kruanh ƀon Tiêng 2, xã Tân Sơn, nkuăl ƀon têh Pleiku, n’gor Gia Lai hôm nkah ơm tât nŭih rđau kan tâm dăch dơh ma nơm:

‘Năm 2011, wa Nguyễn Phú Trọng tât khâl 2 ƀon rnoi Jrai hên tâm xã Ia Tiêm ndrel xã Ayun, nkuăl Chư Sê. Kônh wa saơ wa mleh ngăn ndrel kơl an âk. Wa lah nŭih rđau kan dŭt n’hâm ueh hĭ geh rđau kan Đảng nơm lơh rdâng ăp nau sa khâm geh nau ueh ngăn ngên. Gâp ndrel kônh wa Jrai rnơm ngăn rnôk geh Đảng ma nau rêh văng sa, rêh jêng bah kônh wa Tây Nguyên nơm mra geh rgâl âk lơn”.

Ntoh nau rngot klâng đah Tổng Bí thư Nguyễn Phú Trọng, wa Bon Yô Soan, nŭih geh bu rnơm tâm nkuăl ƀon têh Đà Lạt, n’gor Lâm Đồng, ntoh nuih n’hâm rnơm tâm nau rđau kan ndâk neh dak bah Đảng:

‘Nau kan lơh rdâng, njrăng nau sa khâm, nau mhik đah cán bộ đảng viên geh đồng chí Nguyễn Phú Trọng ƀư rjăp, mô geh ntŭk mô dơi. Rnôk aơ, kônh wa rnoi mpôl đê̆ tâm n’gor Lâm Đồng mro djăt tĭng nau rnơm tâm nau rđau kan bah Đảng”./.