Tât tâm ntŭk ntơm sa nkra ân mbluh trong ndeh hăn tâm Bôk nau kan trong hăn ngăch Khánh Hoà-Buôn Ma Thuột tâm lơ 19/12 mhe rlau, âk nŭih bon lan ntoh nau rhơn rnôk ăp trong ndeh têh geh mbuh hăn, ŭch mra rhuăt gleh mông hăn ro, pơk trong nơih ân nau kan tăch rgâl, hun hao tuch tăm, pâl n’aih ndrel n’hao nau geh prăk. Wa Nguyễn Văn Hạ, tâm xã Ea Knuêc, geh rlau 4 sào neh tâm rnok geh sŏk ƀư trong, nkoch:

            ‘Aơ lah nau ŭch bah nŭih ƀon lan ta aơ, âk ngăn nau rhơn, rnôk aơ geh trong hăn ngăch, nau kan hăn ro, tăch rgâl geh nơih ueh, ndơ tuch tăm bah ƀon lan jêh geh nsĭt ri ăp bôk ndeh bu hăn tât tâm mir gay ma rvăt ri rnoh bah ndơ tuch tăm bôk năp lah đăp mpăn nau ueh kah, tal bar lah rnoh ndoh ndơ geh n’hao lơn tay”.

            Mô êng pơk luh trong hăn, ma ntrong hăn ngăch aơ hôm pơk luh ntŭk kan hun hao mhe ân ăp nkuăl tuch tăm tơm. Wa Ngô Thị Minh Trinh, Bí thư Đảng uỷ xã Ea Knuêc-nkuăl geh trong hăn ngăch rlet rlau 6 ntrong, nkre lah ntŭk rvăt tăch sầu riêng têh ngăn tâm n’gor, đah 5.100 ha, ân lah:

            “Gâp mĭn ntơm bah ăp ntrong hăn nê geh nau rgop ƀư nau kan nthoi trong tăch rgâl ndrel geh nau tâm rgop ngăn mpeh văng sa rêh jêng ndrel nau ơm geh đŏng. Bah năp nê, nkuăl Krông Pách ơm phung hên hŏ geh ăp rmôt ƀư nau kan công nghiệp bah Tân Tiến, êp nê lah nkuăl logistic gay geh nau tâm nthoi rjăp n’hêl ndrel dŏng ƀư lĕ nau dăng geh dơi bah ăp xã gay ma nthoi tay gay njêng du nkuăl geh dơi hun hao văng sa rêh jêng bah xã”.

            Bôk nau kan ƀư 3 ntrong hăn ngăch Khánh Hoà-Buôn Ma Thuột jong 48km, hăn rlet 7 xã, ƀư nau tơm tâm nau nthoi trong Tây Nguyên dnrel duyên hải Nam Trung Bộ. Ndrel ma nê, Bôk nau kan trong Hồ Chí Minh rlet mpeh ba dâng Buôn Ma Thiột jong bơi tât 40 km dôl tâm nau kơl huch oi nau nkol trong tâm nklang nkual, n’hao săk tam nau dŏng dơi trong hăn bah ăp nkuăl.

            Tâm mpeh ba lơ bah n’gor Dak Lak, jêh rlau 10 năm kâp rnơm, Bôk nau kan ƀư pâl n’aih rlu rlau gưl prêh Cù Lao Mái Nhà ntơm geh ndâk nkra tay tâm dŭt năm 2025. Đah nau âk dŏng neh ndrel măt dak geh nklăp 137 ha, rnoh prăk ntuh kơl bơi tât 5000 rmen, bôk nau kan geh mpŏng lah njêng nau kan mhe ân ntŭk kan công nghiệp-pâl n’aih, nkre rklaih nau rvê mô tŏng tơm neh ƀư nau kan pâl n’aih geh âk nau dăng dơi. Wa Võ Văn Ngầu, nŭih ƀon lan Xã Ô Loan, mbơh:

            ‘Gâp rhơn lah nau kan hŏ geh ndâk, yor Bôk nau kan geh nau ntơm nkra tă bah jŏ, kônh wa kâp rnơm ngăn. Nar aơ rhơn tât rnôk rŭng dak măt yor lah bôk nau kan geh ntrŭnh ƀư ri ntŭk bah hên aơ mra lah ntŭk ang ueh ngăn”.

            Nau ngăn ân saơ, gay dơi geh nkô̆ nau hun hao 10% hao gŏ lơ ri tĭng nau ntrŭnh bah n’gor, Dak Lak ŭch ăp nau kan têh, geh n’hâm rêng dăng rjăp. Rnôk aơ nkuăl êp meng dak lêng hŏ geh 43 nau kan geh pă săm ƀŭt kơp dơn đah rnoh ntuh kơl nklăp 90 rbăn rmen. Nau tơm lah nuih n’hâm ngăn bah ăp n’gâng kan, ntŭk kan ndrel xã tâm nau hăn nsum ma ntŭk ƀư kan tăch rgâl, doh rklaih nau jêr nkol. Aơ kŏ lah nau ma ăp tơm ntuh kơl dôl kâp rnơm. Wa Đào Mỹ, Groi Kruanh UBND n’gor Dak Lak, mbơh:

            ‘Phung hên geh ăp nau kan ân bôk nau kan hun hao ndrel geh nau rđau đă ƀư bah ăp nau kan tâm nau dơi ƀư nê ri hên mra nkân uănh ân rjăp bah ăp năm gay ndrel nhoat hao ndrel geh choat hăn mpeh bah năp”.

            Tĭng nau nchrăp, mpeh ba lơ bah n’gor Dak Lak mra loh ndâk âk nau kan têh,  tâm nê geh 3 nau kan tơm tâm nkuăl văng sa Nam Phú Yên, geh: Ndrâm Bãi Gốc, ntŭk ntu ƀư nau kan công nghiệp Hoà Tâm ndrel nkuăl công nghệ prêh Phú Yên, đah rnoh ntuh kơl nklăp 5 rmen đôla tâm rnoh 750 ha. Ăp nau kan aơ geh mpŏng lah mra ntơm ndâk rnoh neh êp dak lêng, pơk trong nơih ueh ân nkuăl công nghiệp, ndâk nau lŏ mât nau dơi hăn leo trong lor tâm nau hun hao tâm năm 2026 ndrel ăp năm bah kơi tă./.