Nchih nkah nău wa Hồ ntĭm, âk druh ndăm xung phong ơm  ta Dak Lak nsrôih rlău jêr jŏt gay hun hao wăng sa, ƀư geh ndrŏng tâm di. Khân păng lah ăp nuĭh nsrôih râng ăp nău kan yor tâm rŏng băl tahen, ntop kơl ăp nuĭh jêr jŏt geh ndơ ma nsan hao.

Rlău 20 năm leo rnăk wâl hao Dak Lak njêng nău kan, tât aƀaơ, druh ndăm xung phong ơm Vũ Văn Khanh ta thôn 7, xã Ea Nam, nkuâl Ea Hleo, n’gor Dak Lak njêng du mir têh hvi mât tăm ăp ntil ndơ. Đah 12ha neh, păng tăm rlŭ âk ntil tơm kơt cao su, tiêu, điều, play đŭr, sầu riêng; nkre đah mât rong, ntu ka n’hanh n’gâr ntêm dak gay tŏ djrah. Bah mir têh hvi dja, ăp năm rnăk nsĭt geh rlău 1 rmen prăk; nta joi nău kan mbro an 10 nuĭh kan. Wa Vũ Văn Khanh nkoch:

“Ntĭk uĕh nău way ơm bah mpôl druh ndăm xung phong ơm lôch âk năm wăng sa jêr jŏt ri mbrơi mbrơi jâng wăng sa đăp mpăn. Đăp mpăn hôm ri he ân mbơh nti an  ăp nuĭh jêr jŏt rlău he, ntĭt kơt ntop kơl dak tŏ an ăp oh nô rnoi mpôl đê̆ wăr nkual,  năm aơ kơl  lĕ ma bar pe jât ha đŏng. Thôn mô  geh hội trường ri he ntop kơl nklăp 1.000 mét vuông neh gay ƀư hội trường an kônh wa ta ntŭk rgum hop nsum mpôl”

 Lah druh ndăm xung phong ơm râng mât njrăng n’har bri mpeh bah lơ, lôch neh dak  dơn ngoăy, wa Nguyễn Đình Chiến du bah ƀon tơm Quảng Ninh lăp gŭ ta phường An Lạc, thị xã Buôn Hồ. Lôch âk năm đăp dêh đah nău kan wăng sa. Tât aƀaơ păng hŏ rdâk  geh du jay nkret njêng cà phê môi, pơk ntŭk  tăch  rgâl ndơ dŏng kan tuch tăm, rhŏ dŏng pâl nđaih, nsĭt geh wăng sa rlău 1,5 rmen prăk ăp năm. Nkre ƀư wăng sa, wa Chiến hôm nsrôih râng tâm ăp nău kan, trong leo ƀư ta ntŭk đŏng, kơl ăp nuĭh jêr jŏt manh tơm prăk wăng sa, ntop kơl ndơ dŏng kan tuch tăm mô deh  prăk kon. Ndăm xung phong ơm  Nguyễn Đình Chiến nkoch:

“Kơt nti tĭng nău bah Wa ri ân tâm rŏng ndrăng băl tahen, tâm rnglăp, tâm kơl nsum tâm trong leo jut jăng ji ngot n’hŭch ach o. Saơ ăp nuĭh geh nău rêh jêr jŏt ri kơl, nta joi nău kan an lĕ rngôch ăp kon său hội viên. Rgŏ jă hội viên he râng di, kơt nti di pháp luật, rdâk njêng ƀon lan lôch nê rdâk njêng nkual ƀon lan gŭ ta ntŭk he gŭ rêh”.

 Tĭng ƀư trong leo “druh ndăm xung phong ơm wăng sa jăp blău- yor an nău tâm rŏng ndrăng băl tahen”, ta Dak Lak hŏ geh âk trong ntĭt leo wăng sa ntoh lư  tâm  ăp trong leo kan kơt trong leo ƀư nkret njêng ndơ tuch tăm nkre đah mât rong, tăch rgâl,…Tâm 5 năm aơ, hŏ geh bơi 50 rnăk n’hanh hợp tác xã tuch tăm ƀư wăng sa jăp blău tă bah druh ndăm xung phong ơm ƀư tơm dơi kơp dơn, nta joi nău kan an bơi 200 druh ndăm xung phong ơm n’hanh rnăk wâl.

Tĭng wa Trần Thị Xuân, Kruanh Mpôl druh ndăm xung phong ơm n’gor Dak Lak, bah meng nău tâm kơl nsum ƀư wăng sa, ăp hội viên hôm nsrôih rgop rdâk njêng prăk nkrem tâm rŏng ndrăng băl tahen đŏng, way ntop kơl prăk kan an mpôl kan tâm dâng, kơl ăp nuĭh geh nău rêh jêr jŏt, kop ji.

“Trong leo ƀư “druh ndăm xung phong ơm wăng sa jăp blău, yor nău tâm rŏng ndrăng băl tahen” n’hanh trong leo ƀư  “Yor nău tâm rŏng ndrăng băl tahen, ăp du hê hội viên ƀư âk nău kan uĕh”, nê lah 2 trong leo ƀư ma druh ndăm xung phong ơm ân way kơt nti, rgŏ jă  trong leo tâm rlong bah Hội gưl n’gor an tât hội viên. Tâm trong leo “druh ndăm xung phong ơm wăng sa  jăp blău, yor nău tâm rŏng ndrăng băl tahen” ri aƀaơ plơ̆ sĭt đah nău rêh ngăn, druh ndăm xung phong ơm hôm geh n’hâm suan ri nha hôm râng pah kan jan sa gay rgop tâm n’gâng kan hun hao wăng sa, văn hóa rêh jêng kon nuĭh ta ntŭk đŏng”.

Nchih nkah nău wa Hồ ntĭm nti “Mô geh ntil nău jêr, klach nuih n’hâm mô nâp  dơm, kuĭh yôk n’hanh bôr dak, rôih ƀư mbra geh nău dơi”, lôch ƀư jêh nău dơn kan neh dak,  plơ̆ sĭt đah nău rêh ngăn tâm ƀon lan,  ăp druh ndăm xung phong ơm ta Dak Lak n’hao tay nuih n’hâm “druh ndăm dâk chŏl lor, ranh leo trong jăp blău”. Khân păng dôl nha  hôm rêh an lĕ suan he râng hun hao wăng sa  n’hanh rgop uĕh tâm nău hun hao wăng sa, rêh jêng  kon nuĭh ta ntŭk đŏng./.