Ta phường Phú Yên, ngoăy tâm ăp ntŭk geh dak băm jru, jêh rnôk dak rhoăt, Ntŭk kan rhŏ nău hành chính nsum lĕ ndăn pah kan plơ̆ tay gay rhŏ an nuĭh ƀon lan. Du nar, ntŭk kan wơt dơn rĭng rlău 100 samƀŭt rhăch nău, dŭt âk lah kơp dơn samƀŭt samtra, samƀŭt rhăch nău neh ntu, samƀŭt kơp dơn rnoi nuĭh. Wa Hồ Thị Bước, thôn Lộc Đồng, an gĭt rơh dak bŭk lĕ ƀư dak băm tât chor jay, lĕ rngôch drăp ndơ n’hanh samƀŭt samtra bah rnăk wâl geh klôn rdu da dê. Gay geh nkô̆ nău mkra tâm pit neh ntu ta ngih phat dôih, wa an hăn phường ƀư tay samƀŭt mbơh nuĭh khĭt bah sai n’hanh kon.

Gâp kâp ngăch đŏng mô geh jŏ, yor gâp sŏk mrô ntŭk tât ƀư ntŭk nĕ. Ăp cán bộ ƀư uĕh ngăn, ntĭm gâp ƀư tay samƀŭt rhăch nău, bu uĕh lăng ƀư an gâp.

Gay n’hŭch mông nar kâp n’hanh ntop kơl nuĭh ƀon lan tâm nău jêr jŏt jêh dak bŭk, n’gâng kan ƀon lan lĕ rgŏ jă tay âk rmôt ndrel râng mkra samƀŭt hành chính. Rlău ma cán bộ, công chức way kan, nuĭh kan bưu điện dơi đă ntop tay ta ntŭk kan du mpông.

Yuh Huỳnh Thị Lệ Chi, nuĭh kan Bưu điện phường Tuy Hòa, dơi đă ntop kơl ta nkual hành chính nsum phường Phú Yên, an gĭt nău kan rgum ntop kơl nuĭh ƀon jêh samƀŭt rhăch nău ta ntŭk điện tử, lơn lah ăp nuĭh têh, đêt gĭt công nghệ.

Oh ntop kơl kônh wa nglăp samƀŭt hành chính nsum, samƀŭt rhăch nău dŭt âk lah kơp uănh tay bản sao, nglăp ăp samƀŭt geh tât neh ntu. Gâm nkre ntĭm, nkre ntop kơl an nuĭh ƀon lan dâl.

 Tĭng wa Nguyễn Xuân Cảnh, Kruanh UBND phường Phú Yên, jêh dak bŭk, rnoh samƀŭt rhăch nău hao âk ndal, geh âk nuĭh roh lĕ rngôch samƀŭt tơm. Ta năp nu nău nĕ, ƀon lan lĕ pơk tay ăp rmôt rhŏ nău nsum ntŭk gŭ rêh, ndơ̆ cán bộ jŭr tât nkual ƀon lan gŭ gay ntĭm, ntop kơl nuĭh ƀon lan mbơh, ntop tay samƀŭt rhăch nău.

Jrô kan hành chính nsum ăp nar tâm pă 1-2 cán bộ ƀa ƀơ ntĭm mpeh pháp lý. Jŏ jŏ tâm pă mpôl druh ndăm, bưu điện lah nsum ntil nău, an geh nuĭh.

Mô knŭng phường Phú Yên, lĕ rngôch ăp xă mpeh bah lơ luh nar n’gor Dak Lak geh khuch khat yor dak bŭk. Tâm nĕ, 3 ntŭk kan rhŏ an hành chính nsum ta Hòa Xuân, Đông Hòa n’hanh Tuy An Tây geh dak băm jru, ƀư djơh du đêt ndoh ndơ n’hanh khuch tât ndơ ƀư. Ăp ntŭk kan aơ an roh nklăp du pơh gay nkra n’hanh dŏng plơ̆ tay nâm ơm.

Ta xă Tuy An Đông, ntŭk kan hành chính nsum geh dak băm, âk ndoh ndơ geh djơh. Yơn lah, n’gâng kan ƀon lan lĕ ndăn nkra, tâm pă tay nuĭh kan gay mô ƀư tăch proăt nău mkra samƀŭt an nuĭh ƀon lan. Wa Trần Văn Biên, Kruanh UBND xă Tuy An Đông an gĭt:

Băng: Tât aƀaơ ntŭk kan lĕ hăn lăp dŏng, dôl ntop kơl nuĭh ƀon lan ntop tay kơt nkra du đêt samƀŭt rhăch nău khay đah rnăk wâl. Aƀaơ rnoh cán bộ công chức tŏng ăp, uănh nău ŭch ƀon lan têh mbra rgŏ jă tay rmôt druh ndăm, du đêt rmôt ntop kơl gay tŏng ăp ngăch an kônh wa.

Du khay jêh dak bŭk, ăp nău rlŭk rlăk đah samƀŭt bah kônh wa nkual mpeh Bah lơ nhâp nar n’gor Dak Lak ntơm jêh mkra lôch uĕh. Nău nchrăp lor n’hao nuĭh kan n’hanh mkra tay trong măy mŏk ngăch lĕ kơl ăp ntŭk kơt Tuy An Đông mô lah Phú Yên mô geh nău nkân samƀŭt rhăch nău. Ăp samƀŭt hành chính dơi pă tay ngăch jêng ndơ ƀư nkô̆ nău tâm di an nuĭh ƀon lan đăp mpăn joi nău rêh n’hanh mkra ăp nău kan nkân jêh trôk nar lơh.