Nklang yôk bri Tây Bắc, ntŭk dơn way bên đah ba mir, kŭk kău, tăch ndơ ma ti ngăn, aƀaơ hŏ ntoh du rup gui dŭt êng: ăp mblâm điện thoại pet lât tĭng jâng kônh wa hăn luh mir ba. Bah mạng xã hội, ndranh tăch điện tử, nuĭh ƀon lan Lào Cai dôl nsing nơm nkoch mbơh ndơ geh ƀư bah he, buăt nthoi na nê̆ tât nuĭh dŏng sa. Du njăr trong hăn mhe bah mir ba tât ntŭk keh mbrô – dôl pơk luh du trong rƀŏng hăn mhe, nsĭt tay nău dơi tam ngăn ngăn an wăng sa nkual yôk prêh.

 Dơi năp nău blău dŏng keh mbrô, dŭt âk rnăk ƀon lan kan lŏ mir ta Lào Cai hŏ lor nchrăp nkơnh n’hơ ndơ geh ƀư ta mir he nơm dĭl. Đah du rơh livestream, nuĭh rvăt lam ntŭk mbra tĭng groi nđôi rêng tuch tăm, nchăm rvăt mô dơn nê ma hôm đăng ký rlong hăn pâl nđaih tuch tăm đŏng. Yuh Lù Minh Tình, nuĭh tơm mir quýt ta xã Mường Khương nkoch:

Kơt mpôl hên hŏ nchih nkoch ta TikTok ri âk năch hŏ tă lăp tâm mir gâp n’hanh plơng ơh tay lah rnoh khlay vé lăp tâm mir 30 rbăn prăk n’hanh sa quýt dah rŏng tâm mir lah dŭt tâm di, hôm rvăt quýt nsĭt ri 20 rbăn prăk du ký. Khay bôk năp rnôk lăp tâm jay gâp hŏ tăch bơi 3 tấn quýt.

Nău nê an saơ, công nghệ dôl kơl ndơ tuch tăm nkual yôk prêh Lào Cai rhuăt glêh tâm ƀah đah ntŭk tăch rgâl. Mô dơn quýt, âk ndơ tuch tăm ntĭt êng kơt chè, prit, sa nhân, phe Séng Cù… hŏ n’glăp “ta mạng”, buăt nthoi na nê̆ đah nuĭh tăm n’hanh nuĭh rvăt đŏng. Wa Phạm Đức Trung, Groi Kruanh UBND xã Mường Khương an gĭt:

Mpôl hên hŏ rdâk njêng trong buăt nthoi ntŭk tăch n’hanh nkoch trêng an nuĭh ƀon lan dŏng ndơ pơk lam nuĭh uănh saơ. Bôk năp ăp ndơ geh ƀư tăch dơi an năch wăr Lào Cai dơm yơn aƀaơ hŏ hao tât Hà Nội,  Hải Phòng…Nuĭh ƀon lan geh điện thoại pet lât jêng dŏng mạng xã hội dŭt uĕh.

Tĭng ƀư rnoh tât kan gưl neh dak 1719, Lào Cai hŏ an ƀư du rut bôk nău kan ntop kơl kơt ntĭm nti kỹ thuật, kơi năp nti mât bôk kan Hợp tác xã, ntop kơl manh dơh tơm prăk, đăng ký dŏng nău gĭt blău an ndơ geh ƀư, nkơnh n’hơ ndơ tuch tăm ta ntŭk... Tât aƀaơ âk ndơ kah khlay ta ntŭk rlău yôk, rhot ƀon, tât ntŭk tăch rgâl têh hvi lơn.  Wa Dương Tuấn Nghĩa, Groi Giám đốc Sở Văn hóa, Thể thao n’hanh Pâl nđaih n’gor Lào Cai lah:

Kônh wa ƀon lan tât dŏng công nghệ dŭt ngăch, dŭt âk trang web, tiktok facebook  hŏ dơi dŏng du trong geh nău tam. Nău dja geh nău ntop kơl bah ăp n’gâng kan tâm n’gor, kơt Sở Khoa học n’hanh Công nghệ, Sở Văn hóa, pâl nđaih. Mpôl hên dŏng âk công nghệ mhe đŏng, lơn lah ndơ̆ rgâl mbrô lăp tâm ƀon lan, lơn lah băl mom.

 Ntơm bah mir ba tât ntŭk pơk keh mbrô lah rgâl dăng tâm nău mĭn tuch tăm, tăch rgâl bah nuĭh ƀon lan nkual yôk prêh Lào Cai. Rnôk dơi ntop kơl di trong, kônh wa mbra ƀư tơm dơi công nghệ, luh tât ntŭk tăch rgâl têh hvi lơn. Rgâl mbrô – dôl jêng keh pơk mpông hun hao jŏ jong an tuch tăm ta ntŭk.