Tâm măng 19/7 dâl, Radio ntuh ngơi n’hanh ntuh rup Nhật Bản NHK pơk du phóng sự đah jŏ mông, tâm nĕ nkoch ăp n’hâm soan bah Tổng bí thư Nguyễn Phú Trọng đah nău kan ndâk njêng, mât njrăng n’hanh hun hao neh dak bah Việt Nam ndrel ăp nău rgop khlay tâm boh tâm rnglăp nchră nău đah ăp dak geh n’ăp Nhật Bản. Phóng sự dŏng ăp rup gui ơm khlay mpeh Tổng Bí thư kơt: Nău ntoh bah Tổng bí thư ta ăp nău ƀư têh, rơh mâp đah Tổng thống Mỹ Joe Biden, rgum nchră đah Tổng bí thư-Kruanh dak Trung Quốc Tập Cận Bình, mâp đêp rmên đah Thủ tướng Nhật Bản Abe Shinzo...

Phóng sự lah rjăp: “Tổng bí thư Nguyễn Phú Trọng lah nuĭh kruanh têh, lĕ rlet rlău âk nău kan khlay. Wa lah nuĭh ntrôl dăng trong kan njrăng n’gang sa khâm sa ƀer bah Việt Nam, janh rmal n’ăp ăp cán bộ gưl têh ngăn tâm trong kan chính trị. Mpeh tâm rnglăp nchră nău, tâm rnôk lam ntŭr neh dôl tâm pă jêng 2 gưl, wa hôm e mât nău kơl tâm rnglăp nchră nău pơk hvi, rgop âk ntil, âk trong ăp nău tâm boh nchră nău, mpŏng ŭch ƀư băl đah lĕ rngôch ăp dak n’hanh nkual neh ta lam ntŭr neh. Mpeh tâm boh đah Nhật Bản, phóng sự nkah tay rơh mâp bah Tổng Bí thư đah Thủ tướng Abe Shinzo. Ta nĕ, 2 kruanh mĭn lah du tơ̆ tay mbra pơk hvi tâm boh kan ndrel ăp ding. N’ha báo wăng sa Nhật Bản (Nikkei) ndơ̆ ăp nău mbơh kơt NHK yơn nkoch tay ăp nău rgop bah Tổng Bí thư an nău hun hao wăng sa bah Việt Nam, tâm nĕ nkoch trong mkra geh tât nău Việt Nam ký ton hiệp định tăch rgâl dah rŏng đah âk dak n’hanh lah rjăp: “Tổng bí thư lah nuĭh ƀư jêng wăng sa Việt Nam hun hao têh”./.