Lôch rnôk tăng nău lư Tổng Bí thư Nguyễn Phú Trọng roh dơi mbơh, ta mạng xã hội, nuĭh ƀon lan ăp mpeh neh dak n’hanh ƀon lan he gŭ dak bah dih hŏ mpơl nău uănh khlay n’hanh nău rngot klâng dŭt n’hâm, rnôk ân ntĭnh njăt du hê nuĭh têh blău bah rnoi nuĭh, du hê kruanh rđău kan hŏ n’groh lĕ du bông nău rêh he an n’gâng kan cách mạng bah Đảng n’hanh rnoi nuĭh he:

Nkoch nău lư, video bah ăp trang fanpage nsing nơm, rgâl rup avatar jêng nđôch n’glang mô lah rgâl avatar ma ăp păng rup n’gul săk bah Tổng Bí thư n’hanh an tay ăp nău nchih lăp jru nău tâm rŏng – nê lah trong ma âk nuĭh mpơl nău rngot klâng nău roh bah du hê nuĭh geh bôk rngok gĭt blău têh bah cách mạng Việt Nam ta mạng xã hội. Mpôl hên dăn sŏk du gâl nău nchih nê.

- Dêh rŏng n’hanh nkah Wa dŭt n’hâm, Wa hŏ pah kan tât n’hâm n’hôr n’glĕ dŭt an ƀon lan an  neh dak

- Dŭt n’hâm rngot klâng du kon nuĭh ntoh lư bah Đảng Cộng sản Việt Nam.

- Nău nsing nơm tâm Đảng yor nuih n’hâm dŭt uĕh lŏng bah wa.

- Nău rong an n’hanh nău rêh ngăn bah Wa hŏ ƀư jêng du hê nuĭh rêh têh kuâng tâm kon  măt bah nuĭh ƀon lan.

- Nkêng săk he bah năp rup huêng Tổng bí Thư an tay nău nsing nơm kloh rsang n’hanh nău rêh uĕh lăng an neh dak let năp tay!

-Nklăp đah âk nuĭh, khân păng mô wât ngăn chủ nghĩa cộng sản lah moh ndơ Yơn uănh tâm Tổng Bí thư, khân păng gĭt du kon nuĭh cộng sản, du hê nuĭh cộng sản lah mhâm nuĭh.

N’hanh hôm dŭt âk ăp mbor nău mprĭng hoch ler bah tu tơm yô̆ rngot. Âk nuĭh hŏ nkoch ăp nău nkah uĕh  mha êng rnôk dơi  mâp đah Tổng bí thư Nguyễn Phú Trọng. Ta trang êng nơm, Đại sứ Vũ Quang Minh – Đại sứ Việt Nam ta Đức, Đại sứ ơm Việt Nam ta Campuchia n’hanh ta Anh Quốc, nkre mât uănh Ireland nkoch tay du nău nkah rnôk păng dơi groi tĭng Tổng bí thư Nguyễn Phú Trọng tâm rnôk  hăn khâl ngăn bah Tổng Bí thư tât Campuchia khay 7 năm 2017.

-Ta Sihanoukville, rnôk nchrăp jrô gay ƀư rơh mâp măt bah Tổng Bí thư đah oh yuh nô pah kan ta Tổng Lãnh sự quán n’hanh kônh wa, Tổng Bí thư tât ơm rnôk oh nur yuh nô dôl hôm rkơl nsưng mpan. Ndrât ndal, Tổng bí thư hăn lăp tâm jrô n’hanh ntơm rkơl nsưng mpan ndrel mpôl hên tâm nău rhih rhâl bah lĕ rngôch ăp nuĭh.

-Mpôl hên hôm tâm nkoch nsum rnôk nkah tât nău mô dơi chuêl dja, lah mpŏng ân hôm geh tay âk rnôk dơi ndrel Wa klôn ti ao tung rkơl nsưng mpan an ăp rơh nkoch bri răm mƀak n’hanh dêh bên tâm ban kơt tâm du rnăk”.

Hôm đah nhà báo, nghệ nhân trà Hoàng Anh Sướng, bar tơ̆ dơi geh rơh mâp Tổng bí thư Nguyễn Phú Trọng mbro lah nău nkah mô dơi chuêl, tâm nê geh rơh jă ngêt dak trà wơt Tổng Bí thư, Kruanh dak Trung Quốc Tập Cận Bình.  Nhà báo, nghệ nhân trà Hoàng Anh Sướng nchih:

"Rnôk wa Tập Cận Bình tât khâl Việt Nam, wa Nguyễn Phú Trọng hŏ jă gâp ƀư rơh ngêt trà tâm ôi nar 13/11/2017 ta jay sàn Wa Hồ. aơ lah tâl 2 gâp dơi mâp, nkoch bri na nê̆ đah wa.

Nha hôm trong gŭ rêh nê đŏng, dêh bên, nđik ryơm ƀư gâp saơ wa Nguyễn Phú Trọng tâm ban kơt du nai ntĭm  lơn lah nuĭh kan chính trị. N’hanh tơm suan nê bah wa hŏ ƀư an mông nar tâm mâp n’gôr gră đah bar hê  nuĭh mât bôk kan bar neh dak – Tổng bí thư Nguyễn Phú Trọng n’hanh Tổng bí thư Tập Cận Bình dŭt dêh bên, nđik uĕh, răm mƀak, uĕh lăng.

Yor kơt nê̆, jêh aơ nơh, uănh saơ ăp rơh “su ŭnh nuh” bah wa, gâp mô bah rhih rhâl, mha êng. Rŭ hôch tâm trôm dêh bên, mbleh mblôn, jê̆ rdjoch kơt du nai ntĭm tâm ƀon lan nê lah lĕ ma du nău kranh ntang, dăng nâp, lĕ nuih n’hâm lơh sa khâm, lơh nău tih, nău djơh. Ƀon lan dêh rmên, n’guh mbah wa lah ta ăp nuih n’hâm uĕh lŏng nê.

 Mbra mô dơi nkoch lĕ ăp nău ŭch rŏng, nău nkah n’hanh nău dêh rŏng ma nuĭh ƀon lan rong an Tổng bí thư Nguyễn Phú Trọng – kruanh rđău kan  dơi ƀon  lan dêh rŏng, băl mpôl dak bah dih uănh khlay; du hê nuĭh têh kuâng, uănh “Săk lư lah nău huêng khlay, dŭt khlay”, mât nâp nău way, rêh du bông nău rêh an neh dak, an ƀon lan.

Du play nuih nsrŭng tâm râp, hang rkeh dak măt truh./.