Lôch jêh tĭng ƀư bôk  nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ hŏ rgop rgâl muh măt nkual yôk yang n’gor Bình Định. Ntŭk an ƀư tay ăp bôk nău kan, trong nchrăp kan jê̆ geh tât bah bôk nău kan dja.  

Ntơm nơh, gâl trong bah ntung Nước Lương tât thôn T6, xã Đak Mang, nkuâl Hoài Ân, n’gor Bình Định dŭt uĕh. Tâm khay mih, âk ntŭk gâl trong dja băm dak, kônh wa rsong hăn jêr jŏt. Bah tơm prăk bah trong nchrăp 4 mpeh ntuh kơl ntŭk ntô ndơ dŏng khlay bah bôk nău kan gưl neh dak  hun hao wăng sa- rêh jêng kon nuĭh nkual rnoi mpôl đê̆, mpeh yôk yang, UBND nkuâl Hoài Ân, n’gor Bình Định ntuh kơl 2,5 rmen prăk nkra têh hvi tay trong bah ntung Nước Lương tât thôn T6 n’hanh bê tông trong mbluh thôn tâm xã Đak Mang. Wa Đinh Văn Thanh, nuĭh ƀon lan xã Đak Mang, nkuâl Hoài Ân an gĭt, trong mhe dơi ntuh kơl, pơk hvi tay kơl an nău rsong hăn, nchuăn rdeng ndơ dơh ntơ lơn: 

“Trong bê tông dơi ƀư mhe kơl nuĭh ƀon lan rdeng ba bah lŏ sĭt jay ƀon lan. Trong kơl kônh wa rsong hăn dơh soih đăp mpăn rđĭl đah ăp năm bah năp nơh”.

 Nkuâl Hoài Ân ntrŏng ntuh kơl ƀư lôch jêh ntung trong lah “mâng rđăt” khlay, rgop ntrŭt ntrôl hun hao wăng sa- rêh jêng kon nuĭh nkual jêr jŏt, nkual jru, nkual ngai. Ăp nkual nchrăp kan hăn rlău, kônh wa tâm ban ŭch ntrơn du. Wa Nguyễn Xuân Phong, Groi Kruanh UBND nkuâl Hoài Ân, n’gor Bình Định an gĭt, nkuâl dôl ndop ăp bôk nău kan gưl  neh dak, ntik n’hao săk geh dơh uĕh bah nkuâl jêng nău kan tĭng rêng rnoh khlay n’hanh  ntop kơl pơk hvi, n’hao âk tâm rgop rêng rnoh khlay nkre đah tăch ndơ geh ƀư:

“An tĭng ƀư trong nchrăp kan hun hao tuch tăm nkual rnoi mpôl đê̆, ntop kơl trong ntĭt leo, tơm si ntil, kon ntil n’hanh ndơ  dŏng kan tuch tăm gay kônh wa dŏng ăp rgâl mhe khoa học kỹ thuật. Ăp trong ntĭt leo mât chăm an săk  geh âk nsĭt tay nău dơi tam wăng sa têh an  nkual rnoi mpôl đê̆ gay njêng nău mĭn n’hanh nău gĭt êng tâm nău n’hao săk geh ndơ tuch tăm tĭng blah neh tuch tăm n’hanh tĭng ntil ndơ geh ƀư. Ntơm bah nê, n’hao nău geh wăng sa, hun hao wăng sa rnăk wâl, hŭch bah rnoh rnăk ach o ta ntŭk”.

 Năm 2024, trong nchrăp tơm prăk tĭng ƀư bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang n’gor Bình Định rlău 412 rmen prăk. Tât nar 31/5, ăp nkuâl bah n’gor Bình Định hŏ n’gluh rlău 50,7 rmen prăk, geh tât 12,3%. Rnôk an ƀư ăp trong nchrăp kan, trong nchrăp kan jê̆ mpeh bôk nău kan dja nha hôm du đêt jêr jŏt đŏng. UBND n’gor Bình Định mât tay ăp rmôt pah kan tâm rgop âk n’gâng kan bah n’gor gay ƀư ôp uănh, groi nđôi lôch jêh tĭng ƀư n’hanh ntrŭt ntrôl, ntĭm nti, droh rklaih ăp nchiăng khan, kŏ kol tâm rnôk an ƀư  ăp trong nchrăp kan bah bôk nău kan gưl neh dak.

Wa Đinh Văn Lung, Kruanh Ban Dân tộc n’gor Bình Định an gĭt, đơn vị đă ăp nkuâl uănh khlay pah kan nkoch trêng, rgâl ngăch nău tĭng ƀư ăp trong nchrăp kan, trong nchrăp jê̆ bah bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang:  

“Dŭt âk trong kơl, jêng lah ăp nuĭh tĭng ƀư nkoch trêng ân rƀah gĭt. Tâl 2 ân âk mpôl  kan, âk n’gâng kan geh tât ăp nău dơn kan dja gay khân păng nkoch trêng nuĭh ƀon lan mơ gĭt wât dơi. Bôk nău kan âk gưl ủy hŏ geh nău nsrôih lơn đŏng, dơn kan âk lơn đŏng tâm nău nkoch trêng rgŏ jă gay mhâm ƀư an kônh wa geh dŏng dơi bôk nău kan dja, nsĭt tay nău rêh dơi uĕh lơn”./.