Kêng măng 30/7, ta phường Pleiku (n’gor Gia Lai), Bộ Công an ƀư bôk nău kan n’glôch jêh trong  leo ƀư “Jut jăng jay truh sat, nkưp nde” ta ăp n’gor Tây Nguyên năm 2025. Ntơm bah bôk năm 2025 tât aƀaơ, mpôl Công an hŏ rdâk njêng mhe, nkra n’hanh rgâl uĕh tay 6.370 mblâm jay an rnăk ach o, rnăk dăch kêng ach o ta ăp n’gor Gia Lai, Lâm Đồng n’hanh Quảng Ngãi.

Đah lĕ rngôch prăk ntop kơl hao tât rlău 355 rmen prăk, bôk nău kan hŏ nsĭt tât an hang rbăn rnăk geh ntŭk gŭ đăp mpăn, rgop khlay tâm nău đăp mpăn n’hanh hun hao- rêh jêng kon nuĭh nkual Tây Nguyên. Ta n’gor Gia Lai, trong leo ƀư geh âk nuĭh tĭng ƀư bah cán bộ, tahen Công an n’gor, đah rlău 5,4 rmen rgop bah prăk khay, rgŏ jă tay 2,78 rmen prăk ndrel hang rbăn tấn lŭ choih mon jay bah lam nuĭh rgop kơl. Tâm bar pe khay, bơi 6.400 mblâm jay têh uĕh hŏ dơi mpôl Công an ăp gưl rdâk njêng ta ăp ƀon lan Tây Nguyên, nsĭt tât nău rhơn, nău rgâl kloh tâm tĭng rnăk wâl.