Ôi 22/5, ntơh măt Chính phủ, Bộ trưởng Bộ Giao thông Vận tải Nguyễn Văn Thắng rŏ rblang siƀŭt mbơh gŭ mĭn an ƀư nău dơi lor bôk năp trong nchrăp ƀư trong cao tốc Bắc - Nam mpeh nhâp nar gâl hăn rlău Gia Nghĩa (Dak Nông) - Chơn Thành (Bình Phước).

Aơ lah njăr trong me khlay, mbluh nthoi nkual Tây Nguyên đah nkual Đông Nam Bộ, nkual Tây Nam Bộ n’hanh nkual ƀon têh Hồ Chí Minh geh rnoh jong nklăp 128,8 km, rnoh ntuh kơl nklăp 25.540 rmen prăk. Mpeh nău ŭch ntuh kơl, Bộ trưởng Giao thông Vận tải Nguyễn Văn Thắng an gĭt, trong nchrăp kơl ƀư jêng njăr trong cao tốc khlay buăt nthoi nkual Tây Nguyên đah nkual Đông Nam Bộ, nthoi đah nkual ƀon têh Hồ Chí Minh đah ăp n’gor Bình Phước, Dak Nông, Dak Lak, Gia Lai n’hanh âk n’gor êng ƀa ƀă tâm nkual, njêng ntŭk soih aih hun hao mhe. Nkre, mât dŏng săk geh neh ntu, hun hao pâl nđaih,  công nghiệp nkret njêng, công nghiệp mât dŏng tơm loih kông... tĭng dơn dăp rgum tay wăng sa nkual Tây Nguyên; rgop tĭng ƀư geh nău dơi ăp rnoh tât kan, nău dơn kan hun hao wăng sa rêh jêng kon nuĭh, đăp mpăn njrăng n’gang neh dak- rnă njrăng nkual Tây Nguyên, nkual Đông Nam Bộ n’hanh neh dak tĭng Nghị quyết Đại hội đại biểu lam dak tâl XIII bah Đảng, ăp Nghị quyết bah Bộ Chính trị hŏ n’gluh an dŏng.