Kêng măng 11/3, Bộ trưởng Bộ Tài nguyên n’hanh Môi trường Đặng Quốc Khánh ndrel mpôl pah kan hŏ geh rơh pah kan ta n’gor Dak Lak mpeh pah kan mât uănh ngih dak mpeh tài nguyên n’hanh môi trường. Ta rơh pah kan, UBND n’gor Dak Lak hŏ n’gluh 18 nkô̆ nău geh tât jêr jŏt, kŏ kol tâm pah kan mât uănh ngih dak mpeh tài nguyên n’hanh môi trường. Tâm nê, kŏ kol dŭt âk lah mât uănh neh ntu geh tơm luh bah neh bri lâm trường. Lơn âk rnoh neh geh tơm luh bah neh nông lâm trường jao mplơ̆ an n’gor nha hôm tă bah UBND gưl xã mât dŏng đŏng.

Lah n’glôch jêh rơh pah kan, Bộ trưởng Bộ Tài nguyên n’hanh Môi trường Đặng Quốc Khánh an gĭt, mpôl pah kan bah bộ pah kan đah ăp n’gor gay droh rklaih jêr jŏt, kŏ kol an n’gor. Nkre, Bộ sŏk nău rgop bah ăp n’gor gay ơm rdâk njêng, lôch jêh tĭng ƀư Nghị định n’glăp Luật neh ntu 2024 tâm nău rêh. Êng đah nkô̆ nău dŭt khlay lah neh nông lâm trường, Bộ trưởng Đặng Quốc Khánh đă n’gor Dak Lak ân ôp uănh tay ăp tŏng lam lĕ  rngôch n’hanh tâm pă ntil gay rnôk Luật neh ntu 2024 geh nău tam ri mbra nkra dơi âk rnoh neh.