Lơ 12/1, ta Ngih Trung ương Đảng, Tổng Bí thư Tô Lâm lĕ wơt Mpôl đại biểu gưl prêh N’gâng kan Công an Lào yor đồng Đại tướng Vilay Lakhamphong, Groi Thủ tướng Chính phủ, Kruanh N’gâng kan Công an Lào leo trong dôl geh rơh khâl n’hanh pah kan ta Việt Nam.

Ta nar wơt, Tổng Bí thư Tô Lâm mĭn lah Việt Nam uănh khlay mro n’hanh an lor âk ngăn an nău nâp nâl n’hanh n’hao tâm boh tâm rnglăp dŭt n’hâm Việt Nam-Lào, uănh aơ lah nău kan têh, geh nkô̆ jŏ jong đah nău hun hao bah ăp dak; lah rjăp Việt Nam bah năp bah kơi kơt du nău kơl Lào hun hao, mbra tâm pă nău blău ơm đah Lào ta lĕ rngôch nău kan, 2 dak Việt Nam-Lào mbra djôt nâp ty hăn ndrel hun hao. Tổng Bí thư đă tâm năm tât N’gâng kan Công an 2 dak an mât uĕh tay nău way ơm, n’hao tâm kơl ndrel, tâm rgop rjăp, n’hao tâm rgâl nu nău, nău blău trong kan, gĭt na nê̆ nu nău, tâm rgop njrăng n’gang geh săk rnglăy đah nău ƀư phah bah ăp nuĭh rlăng; kan ndrel rjăp njrăng n’gang nu nău đăp mpăn, rŭng răng rlơt n’glưh, nking n’gang njrăng ăp ntil nău tih rlŏ rlău neh dak.