Deh ta nkual ƀon tơm ach o Ea Súp, n’gor Dak Lak, nău nti nsơm hôm e âk jêr jŏt, bu ur Mường Hoàng Thị Thu Phương lĕ rlet rlău ăp mpêr n’gar gay mât nău ŭch rŏng. Aƀaơ sinh viên năm 4 nău kan Quản trị Nhân lực ta ngih sam ƀŭt Đại học Lao động Xã hội nkual ƀon têh Hồ Chí Minh, Phương mô knung geh nău nti nsơm gĭt blău ngăn, ma hôm lah nuĭh rmôt pah kan rêh jêng ta ngih sam ƀŭt đại học n’hanh gŭ ƀon tơm nơm, ƀa ƀơ râng ăp nău ƀư kơl kan.

Nuĭh kan mô dơi mô tŏng gay hun hao du neh dak, jêng oh mĭn mbra geh du trong hăn dŭt jŏ jong let năp aơ tay. Đah oh mĭn săk nơm geh nău blău gay ntĭm rđău mô lah mât uănh du rmôt kan jêng oh nti nău kan mât uănh nuĭh kan. Oh hôm ŭch dơi nsơr soan, dơi sĭt ƀon tơm nơm, lah dơi geh ri oh mbra nsơr soan ta nkuăl.

H’Uyên Byă, bu ur Êđê ta nkuăl Krông Bông, n’gor Dak Lak, aƀaơ lah sinh viên đại học ta nkual ƀon têh Hồ Chí Minh. Ntơm bah năm bôk năp đại học, H’Uyên Byă lĕ an mông nar râng ăp bôk nău kan kơl an yan rlu nti, yŭr mham kơl nuĭh n’hanh ăp nău ƀư bah dih ta ngih sam ƀŭt đại học. Nău kan ƀư ntop tay n’hanh ăp nău ƀư kơl kan H’Uyên ntop tay nău blău, nău nsing nơm, ƀư jêng nâp nâl an săk nơm dơi lôch uĕh đah  nău kan bah du hê nai ta ƀon nơm.

Rnôk dơi nti ta Nkual ƀon têh Hồ Chí Minh, du nkual ƀon têh dŭt hun hao ri oh mĭn nơm dơi dŏng ăp nău blău, ăp nău nti ma nơm lĕ nti nĕ gay dơi sĭt ƀon tơm bah nơm, trêng tay ăp nău nti, ăp nău blău nĕ, tâm pă an kon hŏk n’hanh kơl ăp oh nâp nâl tay tâm nău rêh jêng rgum lăp kơt aƀaơ.

Hôm đah H Sian Êban, nuĭh Êđê, ta nkuăl Krông Pắk, mpŏng ŭch kơl kônh wa nơm wât luật pháp n’hanh bah ir nău mô tŏng rnôk geh nău tât pháp luật, ntơm bah jêt oh lĕ mĭn nti blău gay jêng gay jêng du hê nuĭh luật uĕh bah ƀon lan. Aƀaơ dôl tĭng nti năm 3 ta Học viện Tòa án nkual ƀon têh Hà Nội, H Sian mô knŭng geh nău gĭt nti uĕh ma hôm lah du hê nuĭh ntoh lư đah nău ƀư nuĭh leo mbơh nău ngơi, gơih nđơr tâm ăp nău ƀư nsum mpôl. H’Sian nsrôih mbra sĭt ƀon lan jêh rnôk lôch nti.

Ntơm bôk năp nchrăp hăn nti ri oh lah đah mê̆ bơ̆ lah kon kon mbra sĭt Dak Lak gay hun hao ƀon tơm. Dŭt âk ntil ta bah dih, yơn ma ăp nuĭh ôp lah ƀư nău ntrong leo uĕh kơt nĕ, nsrôih nti kơt nĕ ri ŭch gŭ tay đŏng gay hun hao, oh lah mô, oh mbra sĭt Dak Lak gay hun hao rnoi nuĭh nơm.

N’gor Dak Lak geh hang rbăn sinh viên rnoi mpôl đêt dôl nti ta ăp ngih sam ƀŭt đại học, cao đẳng ta lam dak. Tâm nĕ geh âk sinh viên lĕ nsrôih hao nti nsơm, dŭt n’hâm râng ăp nău ƀư yor nsum mpôl tâm n’hanh bah ngih sam ƀŭt. Aơ lah ăp nuĭh gĭt blău tâm ăp nău ntrong leo đoàn hội ngih sam ƀŭt đại học cao đẳng kơt rnôk sĭt ƀon lan gŭ âm, pah kan.

Yuh H’Giang Niê, Bí thư N’gor đoàn, Kruanh Hội sinh viên Việt Nam n’gor Dak Lak an gĭt, đah nău ƀư n’hanh lĕ đah nău kan bah nơm, rmôt đoàn, hội sinh viên nta nơih mro an ăp sinh viên, ngăn lah sinh viên noi mpôl đêt râng tâm nău kan đoàn, hội. Ăp Câu lạc bộ “Sinh viên 5 uĕh” ta ăp ngih sam ƀŭt đại học dơi jêng đah nkô̆ nău n’hanh trong ƀư uĕh wăch rgum sinh viên râng.

Mpôl hên ŭch rƀŏng tât ăp băl sinh viên gĭt wât êng săk nơm, dơi rƀŏng êng trong hăn nơm ŭch hăn n’hanh mpôl hên hăn ndrel đah ăp băl tâm nău tiăr nti nău blău mbơh ngơi tâm nău rêng. Rlău ma nău nti nsơm ta ngih sam ƀŭt, an geh nău blău ƀư ngăn tâm nău rêh, tâm nĕ nău khlay ngăn mpôl hên ŭch ăp băl gĭt lah he an geh nău ƀư tơm nơm, lĕ đah nău kan tâm nău mât ndrăy, mât nău uĕh văn hóa bah tĭng rnoi nuĭh nơm n’hanh bah nĕ ăp băl mbra lah nkoch trêng gay rêng hvi ăp nău dŭt n’hâm, nău uĕh lăng tâm nău rêh jêng.

Luh ƀon lan, ăp sinh viên rnoi mpôl đêt ta Dak Lak lĕ dŭt n’hâm nti, rgum nău gĭt blău, tiăr nti nău blău ta ăp ngih sam ƀŭt đại học, cao đẳng kơt rgop soan tâm âk nău ƀư yor ntŭk gŭ rêh. Gĭt tât đah ăp ntŭk ntô nti nsơm mhe, ăp sinh viên mô rlu nsrôih, n’hanh rƀŏng tât ƀon tơm, ŭch nsơr soan gay ndâk njêng ƀon lan nơm. Aơ mbra lah ăp nuĭh rgop nuĭh kan tâm nău hun hao bah Dak Lak kơt nsum mpôl tĭng rnoi nuĭh tâm năm tât.