Nar 14/7/2016, Tổng Bí thư Nguyễn Phú Trọng hŏ khâl xã Bản Bo, nkuâl Tam Đường, n’gor Lai Châu. Ăp nău lah, nău rgŏ jă bah Tổng Bí thư hŏ jêng suan ntrôl ntop dăng tay gay nuĭh ƀon lan, n’gâng kan xã Bản Bo nsan hao klaih rlău ach o. Lăp jru nău rgŏ jă, nău ntĭm đă bah Tổng Bí thư, n’gâng kan n’hanh nuĭh ƀon lan ăp rnoi nuĭh ta Bản Bo nsrôih, rlău dơi jêr jŏt gay nar aơ, Bản Bo jêng “ndru me” tơm chè bah nkuâl Tam Đường, nău rêh nuĭh ƀon lan nar lơn ma geh mbơm oi. Đảng bộ n’gâng kan  n’hanh nuĭh ƀon lan ăp rnoi nuĭh xã Bản Bo way nchih nkah ăp nău ntĭnh ntăn bah Tổng Bí thư; nê lah rgum hun hao wăng sa ma nău kan tuch tăm, rdâk njêng ƀon lan mhe, dơh uĕh gay hun hao tơm sa play, mât rong sŭr ndrôk, tơm chè săk kah uĕh nkre đah doanh nghiệp gay joi trong tăch luh ndơ geh ƀư n’hanh rgâl mbrơi jêng tât trong rƀŏng hun hao ăp ndơ rhŏ dŏng gay wăch rgum năch pâl nđaih.

Tâm nkuăl n’har bri Tuy Đức, n’gor Dak Nông, tăng lah Tổng Bí thư Nguyễn Phú Trọng khĭt, cán bộ, đảng viên ndrel nŭih ƀon lan ăp rnoi dŭt n’hâm rngot klâng nŭih rđau kan yor ƀon lan. Wa Điểu Khanh, rnoi Bunong, Groi Kruanh UBND xã Quảng Trực, ngơi:

‘Ntơm bah nkuăl n’har bri ngai, tăng lah Tổng Bí thư Nguyễn Phú Trọng khĭt, cán bộ, đảng viên ndrel ƀon lan xã Quảng trực dŭt n’hâm rngot klâng ngăn du hê nŭih rđau kan yor ƀon lan, nŭih leo nau ang mpeh nau rêh cách mạng. Aơ lah nau roh hoach têh bah Đảng, Ngih dak, bah ƀon lan, ngăn lah tâm rnôk dak nơm dôl hun hao ntrŭnh ngăn nau kan ndâk njêng Đảng, njrăng rdâng nau sa khâm geh nau ueh ngăn ngên bah Tổng Bí thư Nguyễn Phú Trọng. Cán bộ, đảng viên ndrel ƀon lan ăp rnoi tâm xã hôm nkah mro nau ntĭnh bah Tổng Bí thư, ân mro tâm rnglăp, ndrel nuih n’hâm, rnơm tâm nau rđau kan bah Đảng, Ngih dak, lŏ nsôih ntĭm nti, nsôih ndâk njêng nkuăl n’har bri ân têh ndrŏng”.

Tâm ban kơt ăp rnoi nuĭh oh nô êng ƀa ƀă lam dak đŏng, rnôk tăng lư Tổng Bí thư Nguyễn Phú Trọng roh, ƀon lan Chăm ta n’gor Bình Thuận mpơl nău rngot klâng dŭt n’hâm. Wa Lâm Tấn Bình, cán bộ rlu ranh nuĭh Chăm ta xã Phan Hiệp, nkuâl Bắc Bình, n’gor Bình Thuận an gĭt, lôch tĭng groi nđôi ăp nău lah ta ăp rơh tâm nchră, nău kan khlay bah neh dak, păng dŭt nkah uĕh đah ăp nkô̆ rđău đă tam jru bah Tổng Bí thư n’hanh lơn lah ăp nău lah geh tât nkô̆ nău chroh rƀŭn, rnoi mpôl đê̆; bah nê, mpơl  suan dăng têh kuâng bah tâm rnglăp lam rnoi nuĭh tâm n’gâng kan hun hao wăng sa- rêh jêng kon nuĭh bah neh dak:

“Rnôk tăng nău lư Wa Tổng Bí thư Nguyễn Phú Trọng roh, tâm nuih n’hâm bah păng tâm ban kơt lĕ rngôch kônh wa Chăm dŭt rngot klâng. Wa Trọng roh an tay lam rnoi nuĭh Việt Nam nău rngot klâng. Yor, lĕ du bông nău rêh bah he, Wa hŏ nsĭt tay nău gĭt blău bôk rngok, n’hâm suan n’hanh nuih n’hâm n’hơr an neh dak, ƀư an neh dak Việt Nam têh ndrŏng n’hanh nâp dăng. Wa lah du hê kruanh rđău kan têh kuâng Việt Nam, Wa roh an tay nău lư uĕh n’gloh lam trôk ntĭt kơt ƀô kah n’hôl lam.

Tăng nau đồng chí Tổng Bí thư Nguyễn Phú Trọng lĕ khĭt tâm nau rngot klâng bah ăp kơn ƀon lan, tâm nê geh ăp nŭih văn nghệ sĩ lam dak lah nsum ndrel văn nghệ sĩ rnoi Khmer lah êng. Nô Thạch Sroh, tâm xã Đôn Châu, nkuăl Duy Hải, n’gor Trà Vinh, lah Hội viên bah Hội Văn học Nghệ thuật n’gor mbơh, ăp nŭih văn nghệ sĩ Khmer rơh rlau aơ geh âk nau rgop tâm nau mât ndrel ƀư ueh nau ơm bah rnoi mpôl. Êng săk nô nơm, rơh tât mra lŏ ƀư ueh lơn nau kan mpeh nau ơm.

          Mpeh nau roh bah đồng chí Tổng Bí thư Nguyễn Phú Trọng, nô Thạch Sroh ntoh nau rngot ngăn:

          ‘Tổng Bí thư Nguyễn Phú Trọng dŭt n’hâm geh nau blau, wa blau uănh kơl an mpeh nau ơm yau bah rnoi mpôl Việt Nam lah nsum, ngăn ngên uănh khlay, bonh đă, kơl an ăp rnoi mpôl mât ndrel ƀư ân ueh nau vay ơm bah rnoi nơm. Rnôk aơ, rnôk tăng lah Tổng Bí thư roh, gâp ndrel kônh wa rnoi Khmer rngot ngăn, dăn nkah mro nau kan, ăp nuih n’hâm ueh bah păng đah rnoi mpôl nơm”.