Nha hôm rêh, Tổng bí thư Nguyễn Phú Trọng êng uănh khlay tât nkual ƀon lan rnoi mpôl đê̆. Tâm ăp tơ̆ hăn khâl n’hanh pah kan, Tổng Bí thư way uănh khlay, mĭn rvê đah ƀon lan ăp rnoi mpôl đê̆; mhâm ƀư gay n’hao nău rêh drăp ndơ n’hanh nuih n’hâm an ƀon lan.

Đah kônh wa ăp rnoi nuĭh ta xã Ayun, nkuâl Chư Sê, n’gor Gia Lai, Tổng Bí thư Nguyễn Phú Trọng mô dơn lah nuĭh rđău kan du bông nău rêh rvê an neh dak, an ƀon lan, ma hôm lah nuĭh hŏ ntăm an kônh wa nău rêh hơm răm. Tâm rnôk hăn pah kan ta Gia Lai khay 4/2017, Tổng Bí thư Nguyễn Phú Trọng hŏ tât khâl xã Ayun – du xã dŭt jêr jŏt mha êng ta  nkuâl Chư Sê. Djăt nău ŭch rŏng mpŏng geh bah kônh wa geh dak bât gay tuch tăm, Tổng Bí thư hŏ rđău đă n’gâng kan ta ntŭk rgum  tơm ndơ gay rdâk ƀư dak bât Plei Keo. Bar năm bah kơi, dak bât Plei Keo lôch jêh hŏ n’hoch dak bah dak  me Ayun tât dâng sre nsĭt tay nău hơm răm an ƀon lan. Geh dak  bât Plei Keo, nuĭh ƀon lan xã Ayun hŏ srih tăm rlău 300 héc ta ba lŏ 2 tơ̆ tăm, đăp mpăn nău rêh. Che Đinh Miơch, ƀon Achông, uănh khlay nklâm ndơ bah Tổng Bí thư đah kônh wa Ayun.

“Kônh wa dŭt rhơn lôch rnôk Tổng Bí thư Nguyễn Phú Trọng rđău đă an ƀon lan geh dak bât ri  nău rêh ƀon lan mbrơi mbrơi hao geh. Mpôl hên mbra nchih nkah mbro n’hâm suan bah Wa hŏ rong an ƀon lan Ayun tâm nar aơ n’hanh let năp aơ tay”.

Rlău 10 năm bah năp, tâm lơ 17/3/2014, Tổng Bí thư Nguyễn Phú Trọng n’hanh Mpôl pah kan Trung ương lĕ tât khâl kônh wa ăp rnoi nuĭh xă Hồng Hạ, nkuăl A Lưới, n’gor Thừa Thiên Huế, uănh nđôi nu nău ndâk njêng thôn ƀon mhe, rgâl ntil tơm tăm mpa rong, jŭt n’hŭch ach o. Nkoch bri đah N’gâng kan ƀon lan n’hanh kônh wa ta aơ, Tổng Bí thư ntĭnh đă Đảng bộ, nuĭh ƀon lan tâm xă mât uĕh tay nău way ơm Janh dăng, ndâk njêng ƀon tơm nar lơ ndrŏng uĕh, mô ŭch ach o. Wa Hồ Viết Lương, Kruanh UBND xă Hồng Hạ nkah tay: Nar nĕ, lĕ n’gâng kan ƀon lan, kônh wa tâm xă tăng Tổng Bí thư tât khâl dŭt rhơn da dê.

Kônh wa ƀon lan kơt săk gâp nkah gĭt ngăn nău lah bah Tổng Bí thư lah nuĭh ƀon lan Hồng Hạ mât uĕh nău way ơm ƀon tơm janh dăng, tâm rnglăp ndâk njêng nău rêh hơm răm. Mô ŭch ji ngot ach o, nuĭh uĕh ri nsrôih  uĕh lơn. Tổng Bí thư roh, kônh wa dŭt rngot. Nar nđaơ ta jay Gươl yor Tổng Bí thư an, nuĭh ƀon lan jă tât mpêh koaih răk rao, tâm mâp nkah gĭt Tổng Bí thư n’hanh mô dơi chuel n’hâm soan wa.

Tăng lư Tổng Nguyễn Phú Trọng roh, ƀon lan Khmer ta ĐBSCL geh ăp nău rngot mham êng n’hanh mpơl nău rngot klâng dŭt n’hâm ân ntĭnh njăt kruanh rđău kan bah nuih n’hâm ƀon lan. Tâm nău nkoch bah he, wa Thạch Sinh, nuĭh tâm Ban mât uănh chùa Lò Gạch xã Lương Hòa, nkuâl Châu Thành, n’gor Trà Vinh mô rngơt nău rnê Tổng Bí thư, lah nuĭh way uănh khlay tât nău rêh ƀon lan rnoi mpôl đê̆ lah nsum n’hanh ƀon lan Khmer lah êng. Tâm nău ƀư Tổng Bí thư, wa Nguyễn Phú Trọng geh âk trong nchrăp, trong kơl  gay n’hao geh, rhuăt glêh nău rêh ăp ntil đah ăp rnoi mpôl đê̆,  đah ăp nkual. Nơm geh kơt nê ma nkual ƀon lan rnoi mpôl đê̆ hŏ rgâl, hun hao âk tơ̆ rđĭl đah ntơm  nơh. Wa Thạch Sinh lah: 

“Rnôk tăng lư lah Tổng Bí Thư Nguyễn Phú Trọng roh, gâp  lah du hê rnoi nuĭh Khmer, rêh nsum tâm nău rêh Việt Nam gâp dŭt rngot klâng wa. Tâm pe năm kan ƀư Tổng Bí thư, way saơ wa uănh khlay tât nău geh bah ăp rnoi mpôl đê̆. Păng hôm rôih dăng rdâng lơh sa khâm gay an đảng n’hanh cán bộ dơi kloh uĕh đŏng, gâp dŭt rngot klâng. Gâp mpŏng lah kruanh bah kơi aơ tay geh ăp trong kơl kơt wa  Nguyễn Phú Trọng gay mât njrăng an ăp rnoi mpôl, rhŏ dŏng an ƀon lan neh dak geh ndrŏng dăng lơn”.